قسم الحياة الاسريه قسم كثيره مؤلم وقليله مفرح (رأي شخصي)
تعرفون الجلسات التأمليه في حياة الانسان ..محاسبة النفس .... محاولة تجنب الاخطاء .. معرفة التصرف الصحيح بمختلف المواقف اللي تمر علينا (انا أمر فيها حاليا)
كل وحده فينا تتمنى تكوني حكيمه ..والدليل ان كثير من البنات يكتبون مشاكلهم عشان يعرفون كيف يتصرفون صح بالموقف اللي يمر عليهم
وهنا نرى مآسي في بعض الاحيان .. في بعض ردود العضوات
فحبهم للمساعده ينقلب الى تدمير للموقف بشكل أسوأ مما هو عليه
كثيره هي المرات اللي اقرى فيها شكوى عضوه واتفاعل معاها وودي اقول كلام وكلام (ينبع من القلب).. بس ارجع وافكر(بالعقل) بكلامي وأسأل نفسي ردي راح ينتج منه خير والا شر ؟ .. فأتراجع واترك لذوي العقول الحكيمه في الرد
همسه ( انتبهو يا بنات تكتبون شي .. تريدون فيه الخير وهو فيه شر وتحاسبون عليه يوم القيامه )
الحين ادخل في موضوعي <------------------<< طيب واللي فوق شو كان !!!!
وانا في تفكراتي التأمليه .. في حالات الطلاق المنتشرة وبطريقة مرعبه .. وفي المشاكل الزوجيه
حاولت اعرف شو السبب في كل هذا
وقعدت اعصر مخي ابغي اعرف لان بكره عيالي يكبرون ويتزوجون ومادري منو اللي يسلم زواجه ومادري اللي يطلق او تطلق (لا قدر الله)
انتبهت لنقطه مهمه جدا
ان اكثر اللي داخلين الزواج مو فاهمين معناة الزواج وشو الحكمه من الزواج ( الا من رحم ربي )
وترى انا منهم هالناس اللي دخلوا الحياه الزوجيه وماعرف شو الحكمه من الزواج غير تلبية الرغبه الفطريه لدى الرجل ويلقى وحده تنظف له وتخدمه لان امه تعبت وكبرت وما عادت تقدر وعشان يصير رجال ويصير عنده عيال يشيلون اسمه ويحفظون نسله .. والبنت عشان تكمل نص دينها وما كنت اعرف شو معناته بس امشي وياهم مثل الاطرش بالزفه .....وتجيب عيال لزوجها وتتحرر من امور كانوا اهلها مانعينها مع انها بتنحرم من غيرها ويصير عندها بيت هي الملكه فيه
فتلقون الزواج هش يتأثر بالعوامل الدنيويه لان أساسه مبني من دواعم دنيويه
صحيح ان الرغبه امر فطري .. ولكن الاهم منه ان الزواج مفروض ينبني على امور ايمانيه اخرويه
المفروض ان كل شاب وشابه مسلم على وجه يعرفون عدة نقاط قبل ما يدخلون القفص الذهبي
ومن رأي الشخصي هي
1- **ان الزواج الغرض منه اجتماع جسدين لطاعة الرب
فالزوج والزوجه يتعاونون معا لمساعدة بعضهم على طاعة الخالق عزوجل
2- ** ان الزواج يقي كل شاب وشابه فتن هذا الزمان بتلبية رغبتهم الفطريه على وجه مشروع
3- ** انجاب الاطفال وتربيتهم على طاعة الله
بعضهم يجبون عيالهم عشان النسل وحفظ الارث ومتناسين ان الاهم من هذا هو تربيتهم على طاعة الله(والدليل في موضوع ان اغلبية المجتمع يفضل الولد)
4- ** ان الزواج هو مسؤليه كبيره (يتحول فيها الانسان من قول أنا الى هو او هي .. وبعدها هم)
وهذي نقطه مهممممممممممممممممممممممممممه جدا .. لان الاغلبيه ما بعرفون ان الزواج معناته تتخلى عن الانانيه ويكون الافضليه والاولويه لعائلتك
اسس كثيره
حابه نتناقش فيها انا وانتو ونغرسها في عقول اطفالنا نكون بهذا ادينا واجبنا امام الله والتوفيق منه عزوجل ومالنا بعد ذلك الا الدعاء لهم ان الله يحفظهم و يجنبهم شر الفتن ما ظهر منها وما بطن ويرزقهم الصحبه الصالحه ويكرمهم يحياه هانئه
انتظر تفاعلكم
لكم مني كل الحب
