بكيت من ثلاث اردتها .. وبكيت ل ثلاث رأيتهآآ ( مواقف لي بالداخل ) ....

السلام عليكم ورحمة الله وبركاته

انا صار لي من زمان وانا اودي انزل هالموضوع لكن لااجيد سرد المواقف وكتابة المواضيع

لكن بقولكم شيء واحد .. احمدووا الله كثيررا فنحن في نِعم كثيره

بأتم خلق ونعمه وعافيه ..

انا حالي حال البنات ابي وابي وابي

كان تفكيري سطحي

يمكن بتضحكون علي .. لكن اهم شي الفايده

ومواقفي رغم بساطتها الا انها حررركت كل عرق فيني

من احدى المواقف ( يوم مع تفكيري السطحي )

كنت في احدى ممرات الجامعه امشي بروح للمحاضره

الا اشوف البنات والطووول ماشاءالله < مو جديد هالمنظر لكن الايام ذيك مسكت معي كلمه

وهي ( ليه انا قصيره لييه ؟ ) ياربي ليه انا اقصر صديقاتي ليه انا البس كعب وصديقاتي مايلبسون

كنت متضايقه من نفسي مرره واحس شكلي غلط ( استغفر الله )

انا طولي لايق علي بس مع بنات الجامعه احس روحي نقطه خخخخخخ

المهم وانا في الممر وقاعده اضرب اسداس باارباع على هالتفكير

وكان الممر ضيق شوي وفيه زحمه .. الا اشوف بنوته صعنوونه من بعيد بهالممر

قمت احرك راسي يمين يسار فوق بشوفها < احب الاطفال

قرربت البنوته لين شفتهاا زين .. طلعت وحده من بنات الجامعه

الحمدلله والشكر هي قصيره وحبتها صغيره مرررره يابنات وهي اقصر بنت بالجامعه

واعرفها من ايام الثانويه .. والله يابنات قعدت اقول الحمدلله الذي عافانا

ياحلو طوولي والله .. والله يابنات لو اوقف عندها تجي عند خصري

واقول يالله لك الحمد .. حسيت ان الله ارسلها لي عشان ارضى بحالي

وفعلا يابنات والله اني من يومها الى يومنا هذا وانا اقووول الحمدلله والشكرر

الله منعم علي وانا مو حاسه .. والبنت هذي الله خلقها بأحسن حال ومتعافيه واحسن من غيرها

مايعني كلامي اني افضل منها لا والله بس موقف حرك كل عرووقي

ورضيت على حالي يالله لك الحمد

::::::::

موقف ثاني ( يوم من تفكيري السطحي )

انا بشرتي تعبانه حييل يابنات كلها حبووب ولابيوم ارتحت ببشره صافيه من سنيين ولله الحمد

المهم بيوم بكيت على حال بشرتي وتضااااااااايقت حيييل منها

وذيك الليله ياصغر الدنيا بعيني والسبب بشرتي

واقول ليه بشرتي كذا ووش الحل ووش ووش !!

وانا كنت جالسه ع بدايه وكنت سرحانه في بشرتي مو يم التلفزيوون

والله يابنات رفعت رأسي وانا ماااالي خلق ابدددد

الا اقرا في الشريط وحده تقول تكفووون يابنات البهاق بدأ ينتشر فيني وش اسوي

قريتها وكأن احد عطاني كف ويقول لي : اصحي وشوفي غيرك واحمدي واشكري

ياصغرر مشكلتي ساعتهاااا والله قلت يالله لك الحمد شيء اهوون من اشياء كثيررره

همسه للي الله ابتلاهم بالبهاق ( احتسبي الاجرر )

انا مابي اجرح احد بموضوعي بس والله يابنات حبيت نعزز مافينا من اشياء حلوه

واللي الله بلاهم اصبروا فالدنيا فانيه واخر اجسادنا عظام وهيكل نسأل الله السلامه

وبنات همسه لكم ترى قصري وحب الشباب مايعني اني جيكره < خخخخخخخخ لاوالله حلوه وكتكوته هههههه

بس البشره :44: خخخخخخ

المهم باقي موقف ماخلصت

يوم مع تفكيري السطحي خخخخخخخ

كان وقت العيد واستعداد الناس للعيد

انا للحين ابوي ماحول لي فلوس < ابوي بعييد عنا

المهم وماشكيت لامي ولاقلت لها شي تحسب ابوي ارسل لي

وانا ماباقي ع العيد الا كم يوم

والناس تستعد الا اناا .. وانتم عارفين فرحة الاستعداد للعيد وناسه

الكل راح واشترى الا انا .. والله يابنات طول الايام وانا ابكي بغرفتي ماحد يدري

وانا ادري انه بيجيني فلوس لكن بوقت ضيق بتجيني اكيد

المهم امي قالت لي يابنيتي برسلك لحرمه اعرفها ابيك تعطينها اغراض مني لها

قلت ابشري يمه وانا بداخلي مكسوووره < حساسه مرره خخخخخخ

الناس تروح تتسوق وانا اطلع اشوفهم وانقهر خخخخ

المهم قلت ابشررري ورحت انا وولد اخوي لهم واطق الباب الا بنتهم فتحت لي الباب

وجات وراها امها واسلم عليهم طبعا انا اعرفهم على خفيف اذكر لما كنت صغيره رحت لهم كذا مره

مع امي لهم .. الا اشوف ورا هالحرمه بنتهم مو صاحييه وشعرها منفوش

اذكرها لما كنت صغيره ولما شفتها قعدت اردد واكرر الحمدلله الذي عافانا مما ابتلاك به وفضلنا على

كثير من خلقه تفضيلا .. والله طلعت وانا افكر

البنت هذي تحس باحساس العيد مثلنا ؟!!! حياتها كلها كذا ؟!

ساعتهااا قلت والله لو ألبس اردى ثيابي بس عقلي معي وانا بنعمه وعافيه ولله الحمد مابي شيء

..

والله يابنات هالمواقف خلتني على طووول اشكر واحمد

اللهم لك الحمد كما ينبغي لجلال وجهك وعظيم سلطانك

اللهم لك الحمد حتى ترضى ولك الحمد اذا رضيت ولك الحمد بعد الرضا



الشاهد يابنات / ارضوا باحوالكم في اي شكل من الاشكال