بكيت من كلامها بكيت كثير الله يكون بعونها

السلام عليكم و رحمة الله
كيفكم خواتي ان شاء الله كلكم بخير وعافيه وامن وامان
خواتي انا توني كنت اتنقل في مواضيع عالم حواء ودخلت لموضوع وحده ياليتني ما قريت لها شي
اااه يا بنات من ألمها الله لا يذوقه لاحد والله ينصرها ويكتب لها اجر الصبر ويارب يا رب تكون هي الحين بألف خير
قصتها بإختصار كانت تعيش مع ام و اخت زوجها بنفس البيت وكانو متسلطين عليه وعلى اولادها الاثنين و زوجها يوقف مع اهله ضدها و وصلت بينهم للطلاق واخذو اولادها غصب عنها و طردوها ورجعت بعد ثلاث اشهر ولكن ما طولت عند زوجها و تطلقو واخذ منها اطفالها الكبير سنتين و نص والصغير سنه و نص ومااااشافتهم ابد ابد لمدة سبع سنوات يااارب يارب تلطف بها وحسبي الله على كل رجال يحرم ام من اولادها هالكلام من سنة ٢٠١٢ .. يا بنات بكيييت بكييييت من مواضيعها اللي تكتبها عن اولادها يارب كيف هالبشر يحرمون انسانه من اولادها كيف والله مافي قلوبهم رحمه لا على الام ولا على الاطفال .. وتقول ان بعد طلاقها بمده سلفتها توصل لها كلام تقول اولادك اذا سألو عنك يقولون لهم ماما ماتت خلاص ... وفي بداية طلاقها حاولت تاخذ حضانتهم ومنزله موضوع انها بتشوف اولادها ويرجعون لحضنها وكاتبه مواضيع وكلام كثير عن شوقها لهم وانها تبكي عليهم كل يوم .. والله على كل موضوع كتبته بكيييت وعلى كل كلمه كتبتها بكيت من قلب .. والله الرجال مو حسافه عليه والطلاق تجربه تهوون عند الحرمان من الاولاد والحسافه والخساره هم الاولاد والضنا بس .. وهي من جنسيه عربيه و زوجها غير جنسيتها والغريب انهم تزوجو عن حب .. ذكرتني بحالي لاني عشت نفس تجربتها الله لا يعيدها من ايام جلست ببيت اهلي ست اشهر وما شفت ولدي فيها إلا مرتين كنت اشتاق له يا بنات بشكل فضيع كان عمره ست سنوات واذا رحت عزيمه او اجتمعنا وشفت وحده مع ولدها كبر ولدي كانت عيني تدمع واحاول ابين ان مافيني شي .. والله يا بنات كنت احسب الايام واعدهم عشان اشوفه واقول اول ما اشوفه ببوس حتى رجوله وفعلا كنت ابوس رجوله جعلني فدوه لها والله هذيك الفتره عرفت ايش يعني كلمة (اصبري عشان عيالك) .. يا رب كيف هي صبرت وتحملت في عام ٢٠١٢ كملت سبع سنوات ما شافتهم عاد ما ادري ايش صار بعدها شافتهم او للحين .. و واضح من كل كلامها انها ضعيفة شخصيه ما قدرت تسيطر على شي كان الكل اقوى منها .. ولمن تطلقت المره الاولى ما شافتهم لمدة ثلاث اشهر ورجعت لزوجها كانت فرحانه انه التم شملهم وشافت عيالها وتقول بسوي اي شي عشان عيالي ما اخسرهم .. حسبي الله على طليقها واهله كسرو فرحتها بعيالها وحرموها منهم الوحده اذا صارت ام مكانها بين عيالها وبس إلا اذا تطلقت و وصلو السن المشروع لانتقالهم لابوهم..
واصلا الرجل اللي يحرم ام من عيالها هذا يدل على انه مافيه مروه ولا شهامه .. انا ولد خالي طلق زوجته وعنده بنت منها والله ماحرمهم من بعض بالعكس البنت عاشت مع امها برغبتها لين وصلت الثنوي وامها تزوجت وكملت حياتها مع جدها و جدتها اهل امها.. ابوها عطاها الحريه في المكان اللي تبي تعيش فيه وبين فتره وفتره تروح لابوها واذا ابوها و زوجته وعياله سافرو خارج السعوديه ياخذها ويرجعها بيت اخوالها الله يجزاه كل خير ..
اسأل الله العلي العظيم والحين مع اذان الفجر ان يجبر قلبها وان يكون اولادها رجعو لها وتكون هي وهم بألف خير .. والله لا يوفق كل زوج او اهل زوج يحرمون ام من اولادها .. والله يخلي لنا اولادنا ولا يحرمنا منهم ..