بلا هم بلا تفكير بلا بطيييخ تعااالوا اقولكم كييف يا حلوات :)

السلام عليكم ورحمة الله وبركاته

كيفكن حبيباتي؟؟ عساكم طيبات يا رب ومستانسات:)

قبل ماابدي بالموضوع ودي اسألكم كذا سؤال وخاصه العصبيات واللي يفكرون كثير ويخلون للشيطان مجال بانه يوسوس لهم ويزيدهم عصبيه وافكار سوداا أعوذ بالله منه ومن شره :09:

بنات
منو منا ماتمر بظروف صعبه؟؟ أوقات حزينه؟؟
مرات تمر علينا مواقف تتطلب منا الهدوء والتريث وعدم الانفعال السريع والعصبيه
وغالباً (خاصه اللي تتنرفز كثير وعصبيه موت) تصدر منها أفعال تندم عليها بعدين موووت
كأن تغلط على خويتها بكلمة أو تصرف ما
أو انها تحرق اعصابها على الفاضي والمليان ويبان الهم والتفكير على محياها وصحتها

انا ودي أسألكم صراحه الحين شو تساوون أوقات العصبيه واوقات مايبدا الشيطان شغله:angry2:
واللي مرت عليها ظروف سيئة ولها من الذكريات الحزينة والمآسي الكثير الكثير،، طبعاً لازم تمر عليها اوقات تذكرها او تقعد تذكرهاا غصب عنها
تهاوشتي مع زوجج اختج ربيعتج أو أي انسان بالكووون وحز(أثر) الموقف بخاطركم شو تسووون

ابا اقولكم شي رهيييييب اكتشفته قريته بالصدفه برد صغير من ردود البنات جزاها الله خير ماقصرت والله وقريته بالصدفه ولااذكر وييييييين

الحل يا حلوات لما يجي الشيطان الرجيم أعوذ بالله منه ومن شره ويبدا يلعب بعقولنا ويمخمخ بدالنا:hahaha: افكار جهنميه عشان أطلع ضيقتي على اللي ضايقني وأدور أي شي يضايقهم(على قولته آخذ حقي بذي الطريقه لكن على مين:30: ) أو يذكرني بناس لازم انساهم من زمان لكنه يحب يذكرنا بالأحزان والمآسي ويحاول انه يقسي قلوبنا اكثر عليهم ويذكرنا بكل اللي ساووه لنا من ضرر وحزن عشان نرد عليهم أو مانسامحهم!أو تنزرع بذرة الكره بقلوبنا معاذ الله

انا ماأقولكم أني قدرت أتغلب على هالشي تمام 100% لأني قاعده أحاول أطبقه من فترة وكل بدايه صعبه بعدها أوتوماتيك إن شاء الله راح تلقين كل شي ميسر ومسهل لج بعون الرحمن والتوكل على رب العالمين واحتساب الأجر عند الرحمن
حبيت أفيدكم لاني أشوف ثمارها طيبة والحمدلله

الحل يا حلوات وسوري على المقدمه الطويله
يا صاحبة الذكريات المحزنة الأليمة ساعة ماتذكرين ذكرى مؤلمة محزنه انتي تبين تنسينها عشان ترجعين تعيشين حياتك صح بلا هم ولاأوجاع
أو ساعة ماتغضبين وتبدين تمخمخين(تفكرين) كيف وكيف وشو أسوي (هنا أقصد التفكير السلبي اللي يضر الطرف الآخر) مثلا تقولين راح أفشلها قدام الناس لاسمح الله أو تقولين راح اسوي شي يضايقها ويأثر عليها وتنسين ايام العيش والملح كلها اللي كانت بيناتكم ،،حتى لو كنتي ماتطيقيييييييييينها يا شيييييييييخه هو انتي ناقصه هم وتفكير ووقت ضيعتيه مع الشيطان على الفاضي وناس حتى ماتفكر فيج وبزعلج :(

الحل بهاللحظه بلحظه هذي الأفكار السودااا تقطعين أي تفكير سلبي وتبدين تستغفرييييييييييييييين ورببببببببببببي راح ترتاحين وتتيسر أمورج بعون الرحمن
اليوم مثلاً تضايقت من شخص حيل حيل وكنت عازمه أرد عليه بالمثل وأضايقه بعدها دخلت غرفتي قاعده أفكر(ترا هذا وقت افكار الشيطان أعوذ بالله منه:angry2: ) فجأه تذكرت كلام البنت اللي أحاول اطبقه كل ماذكرت ولله الحمد مع اني أكون بقمة حزني وضيقتي وسبحان الله كيف تيسر الأمر
الشي اللي كنت متضايقه منه فجأه تذكرت اني ممكن أساوي حاجه ثانيه وأتحاشى الصدام مع هالشخص عشان لايقهرني أكثر واكثر والحمدلله عدت على خير بعد ماهديت واستغفرت وتذكرت شي يعوضني عن اللي ضايقني بطريقه عجيبه سبحان الله

وأيام كثيرة أعاني من هم مايعلمه غير ربي ،، واشيا كثيره غصب تذكرني بهالشي كل فترة بسيطه
والوضع الجديد اللي أسويه الحين بدل الهم والتفكير والبكا اللي خذوا مني الكثير وتعبت نفسي وصحتي على الفاضي!!! قعدت هالمرة كل ماأتذكر هالذكرة أو ذكرى حزينه على طوووووووووووووول أستغفر ربي واقعد استغفر

طبعاً لاتنسين معاهم الوضوء الذي يطفئ نار الغضب وتغيير الوضعية وصلاة ركعتين لله والدعاء في جوف الليل
يكفينا شعوراً بأن رب السماوات والأرض قريب منا يسمع شكاتنا ودعاءنا
قولي
اللهم إني أشكو إليك ضعف قوتي،، وقلة حيلتي،، وهواني على الناس،، برحمتك يا رب العالمين أنت رب المستضعفين و أنت ربي . إلى من تكلني ؟ الى بعيد يتجهمني أم الى عدو ملكته أمري ؟ إن لم يكن بك غضب علي فلا أبالي ،، ولكن عافيتك أوسع لي من ذنوبي ،، أسألك بنور وجهك الذي أشرقت له الظلمات،، و صلح عليه أمر الدنيا و الأخره من أن يحل بي سخطك ،، أو ينزل علي غضبك ،، لك العتبى حتى ترضى ،، ولا حول ولا قوة الا بك،،

استغفري الله كثيرا ورددي دائماً: حسبي الله لا إله إلا هو عليه توكلت وهو رب العرش العظيم
وأكثري من الحوقلة(لا حول ولاقوة إلا بالله العلي العظيم) والتسبيح والتكبير

نصيحه يابنات ساعة ماتجيكم حالات الحزن والغضب استغفروووو على طول بلحظتها واكثروا من ذكر الرحمن تهدأ نفوسكم ويجعل الله لكم من كل همٍ وحزن مخرجا وفرجاًً قريب بإذن الله
ولاتنسون يا بنات تدعون لاخوانكم المسلمين بكل مكان ولكم الأجر في ذلك إن شاء الله

والله مافي شي بهالدنيا يستاهل منا الزعل وحرقة الاعصاب على الفاضي

اتمنى تستفيدون من كلامي وتشوفون أثره عليكم والله يبعد عنا جميع الضيق والاحزان

ولاتنسونا من صالح الدعاء يزاكم الله كل خير

محبتكم في الله
مستحيل انسى ولكني سامحت بإذن الله
:)