بما اني حامل اقدر اقولكم الفرق بين اعراض الحمل والدوره

السلام عليكم اول شي لله الحمد والمنه حامل بعد محاولة سنة تقريباً واول حمل لي يعني فريش مااعرف شي بس هذا الي لاحظته😬
اولا قبل دورتي بتقريباً ١٤ ايام مسك معي مغص والالم ظهر كان الدوره بتنزل لما ركضت للحمام لقيت افرزات بيضاء مخلوطه مع شوي بني ووردي خفيف جدا وبس وقف والمغص استمر يوم ونص ووقف استغربت بس طنشت الموضوع
بعدها بديت احس بخموووول خموول لما اقولكم خمول يعني مااتحرك من مكاني بس نايمه لو انا عشر ساعات ستل داااايخه وبس ابي انام لما قلت لامي هالاعراض قالت مبروك حامل🤣
هذا الي شككني بس طيرته من مخي قلت انتي يابنت كل شهر توسوسين خلي عنك
بس سبحان الله امي عندها نظره وقلبها حاس كانت يوميا تتصل علي تحلفني اخذ حمض الفوليك وانا اضحك اقول ماما تونا باقي على دورتي اسبوعين ايش حامل توه حتى مانبت واضحك اثره نابت وقتها ومخلص🤣
لما قربت دورتي تقريباً باقي لها ٥ ايام مسك معي الالم ظهر شديده شديده شديده مو العاديه؟ لا الي بعدها الي بس اصيح منه ماخليت لصقة ظهر ماخليت فكس ماخليت شي ماحطيته ولا خف ابدا😥 يعني غير محتمل كان كنت احسه بينكسر حرفياً
وبطني كان مغص خفيف الي يروح ويجي بس الي حسيته بظهري
وبس ماعندي اي اعراض ثانيه نفس الي تجيني قبل الدوره دوخه وكتمه واحس بستفرغ وصدري ونغزات وكل شي لا هنا بس ظهري الي لاحظته
وقبل دورتي بيومين لاحظت فجاءه قمت لقيت صدري محتقن ومنتفخ! يعمي فجاءه ماقد حصلت معي كذا بالعاده قبل دورتي باسبوع يحتقن بعدها يفش الى يوم الدوره استغربت
وطول هالاربع ايام الي قبل الدوره وانا بس خلاص احسها نزلت الحين وكل شوي اركض للحمام مافي شي امسح مافي شي حتى افرازات مافيه بس نزل معي افراز بني غااامق واختفى قلت اكيد محبوسه مدري ايش اسوي عشان تنزل وجاء يوم الدوره ولا نزلت ولا لها نيه
وسبحان الله حجزت لقاح كورونا وقالو لازم تحليل حمل عشان تتاكدين مافي حمل قلت ايييه بس ابشرو واروح الساعه ١٢ بالليل للمستوصف وياخذون عينة دم وقالو بتطلع الصبح بنكلمك قلت اوكي كذا يعني يمدي يكلموني وانا بالطريق للقاح
ركبت السياره وقلت لاختي قالت خذي تحليل بول اسرع قلت تهقين؟ يلا مو ضارني واشتري تحليل ابو عشره ريال مستحقره الموضوع حتى
وارجع للبيت ازينه وحطيته فوق المغسله وقعدت اغسل قالت اختي يوه خط ثاني😨 قلت ايشششش مستحيل قالت الا والله شوفي واطل الا من جد الخظ الثاني خفيف بس واضح قلت لا اكيد ملخبط وانتظر اتصال المستشفى على احر من جمر ماقدرت حتى انام😓 كلموني قالو مبروك حامل😭😭😭😭❤️
مو مصدقه ابدا ماتوقعت كان واقع في قلبي في مره لما جامعت زوجي قلت اكيد بحمل بعد هذا الجماع وقعدت اضحك من جوا نفسي وبس نسيت السالفه وامي تحاول تنبهني وانا اطنش اقول لا لا توسوسين بتجيك الدوره لا توسوسين اثاري اخر خبري فيها من شهر😭 الحمدلله يارب الدعاء من جد الدعاء يغير لك حياتك كامله لا تتخلون عنه❤️
وبس ان شاء الله ماطولت عليكم بس طول عمري احلم اكتب هالموضوع في هذا القسم وواعده نفسي اذا حملت اكتبه والحمدلله الي حققه لي❤️ دعواتكم لي