بموت من حركات سلفتي .. علموني كيف اتعامل معها ؟؟؟؟

السلام عليكم 

كيفكم يابنات 

اليوم بقولكم سالفتي مع مرت حماي يعني سلفتي  وانتوا قولوا لي انا غلطانه ومكبره السالفه او لا ؟؟؟؟
او بمعنى اصح كيف اتعامل معها ؟؟؟؟

انا متزوجه من عشر سنين تقريبا وعندي بنتين وهي توها متزوجه حماي اللي اصغر من زوجي واكبر واحد بعد متزوج قبلنا طبعا لكن عمري ماشكيت من زوجته او حسيت باي شي بلعكس طيوبه ومحترمه وملتزمه وفرفوشه وامورنا طيبه الحمدالله وعمرها ماترضى بالغلط او اتكلم على اهل زوجي مع انها ساكنه فوق اهل زوجي وتعبانه منهم بس ماتجيب طاريهم الا بكل خير الا اذا ضاقت فيها الدنيا مسكينه منهم ومن زوجها تتكلم وتتفضفض بس باسلوب جداً محترم ولا في اي غلط

المشكله عند مرت حماي الجديده تقريباً متزوجه من 3 سنوات 
للحين ماشفت منها الا كل خير الله يشهد علي مابي اكذب بس احسها منافقه جداً وكذابه وانسانه ذكيه الى ابعد الحدود تعرف تجذب كل الناس بصالحها بهدايا بفلوس بكلامها اللي ينقط عسل بس من وراه ياويله 

والله اتعجب من تصرفاتها 

تتكلم على اهل زوجي بكلم قوي قوي مررره وفضايحهم كلها تعرفها وسوالفهم الخاصه واللي ماحد يدري عنها الا هي لانهم يوثقوا فيها لابعد درجه وهي تنشرها على الناس كلها تجي تقولي صار مذا وكذا وعلاقتهم ممتازه مع عمات زوجي وخالته ويناتهم اكثر من صداقه بالرغم انه اهل زوجي مو حيل مع اهلهم وتقولهم عن اهل زوجي كل شي 

وانا اول ماكانت تكلمني بعد ماتزوجت تقولي شنو يقولوا عني اهل زوجي من كلااااااام كثير انصدمت لما سمعته عمري من تزوجت وانا ادخل واطلع عليهم ماحسيت بشي ولا توقعت انه شايلين علي الا لما جت هي وعلمتني بكل شي وصارت نفسيتي زفت انه انا ماسويت لهم شي وانا اصلا ساكنه بعيده عنهم ومالي شغل باحد ودايما تحرضني عليهم 

هي بالها طويل انا ما اتحمل كلام كثير وكذا مره لمحت لها اني مابي اتكلم لاني اتعب نفسيا ومالي شغل باحد كيفهم حتى لو تكلموا عني طول هالينين عايشه ومرتاحه خلني اقابلهم واسلم واضحك ولا ادري عن شي عادي 

طبعا ماتكلمني الا صاير شي عن اهل زوجي ام خبر جديد مخبين عليها او مسمعينها كلام ام الحين الامور بينهم طيبببه وماتكلمني ابد وهو يمدحوا فيها قدامي طيبه مسكينه
زوجها موظف وظيفه راقيه وهي كوافيره وعندها خير واهل زوجي يحبوا الفلوس دايم تعطيهم هدايا وتستري لهم صحون واغراض للمطبخ و تعطيهم فلوس وتعشيهم ويموتوا عليها 
وهي في المقابل ماتطيقهم وكل تحش فيهم لدرجة تقول اتمني اشوف ام زوجي دمعتها على خدها حسره على بناتها لان حماتي ماجابت عيال عشر سنين بس الحين الله رزقها كلام كثير
وانا اطبخ واودي لهم صراحه ماعندي ميزانيه اعطيهم فلوس او هدايا اسوي اطباق لما انزل الديره ورق عنب حلويات وحيل يحبوا طبخي ويمدحوا فيه وهي تقول لا تسوي لهم ولا تودي شي مايستاهلون ودي لاخوانك وعليكم بالعافيه 
ولما جو اهل زوجي عندي زياره طبخت لهم عشا كامل ولما طلعوا مدحوا بطبخي قدامهم هي جت تقولي زعجتنا هالعجوز تقول عجبها الكباب والاطباق ومدري ايش 


والحين كاتبه بقروب تبي تسوي عيد الام لام زوجي وتبي كل وحده فينا تدفع 2000 ريال واحنا مانقدر وتقول بشتري لامي مطبخ كامل تستاهل ومدري ايش 
انا انقهرت مستحيل نقدر ندفع 2000 وادري كل واحد وقدرته بس مابي كل مره هي تدفع واحنا لا وهي تطلع في نظرهم الحبوبه الطيبه واحنا لا وهي هذا هدفها مظاااااهر شوفوني انا شريت وسويت وفعلت وقلت لزوجي يبونا ندفع 2000 لعيد الام وعصب وقال بيكلم اخوه عن حركاتها واللي بيدفع يدفع اللي يقدر عليه ليش محددين مبلغ انا مابي يعلم ولا يتكلم بلعكس حيل ودي ادفع معهم بس المبلغ كثير علينا ولاودي اخد يتكلم علينا مثل السنه الماضيه متفقين يشتروا جوال ودفعوا 400 وزوجي ماعنده دفع بس 100 وتمسخروا وسووا سالفه عليه بالقروب مين محول 100 وشنسوي فيها وبرجعها لصاحبها هذا كلام خواته عشان كذا السنه قلت بدفع مبلغ حلو وبكسر عيونهم مابيهم ينظروا انه احنا اقل منهم هالشي حيل يتعبني واتحسس منه 
قبل يومين بس راسله جهاز تكسير الشعر شاريته هديه لحماتي وتقول شوفي شريت لك الجهاز وبكره العصر هو عندك
احس ماله داعي الحركه ترسل لها خاص ليش بالقروب انه شوفوني انا اعطي وانتوا لا 

والمشكله نبني شقه فوق اهل زوجي وهي بتكون جنبي خاااايفه مره متاكده مليون في الميه تتكلم عني مثل ماتتكلم على اهل زوجي بالعاطل 
واخاف يصير اي موقف بسيط بينا تروح تقوله للعايله كلهااااا لان كلهم ربعها 

والله مدري كيف اتعامل معها
وهل انا غلطانه ومبالغه 
والله مابي اظلمها بس تصرفاتها تنرفز والله خلاص اتاكد اسوفها تتكلم على اهل دوجي ولما تشوفهم حبيبتي ومن عيوني وانا اجيب لكن واوديكم وامشيكم 
مع العلم اهل زوجي مو موافقين عليها بس حماي اصر وتزوجها وهي اكبر منه بسنه وديما تمدح نفسها وانا حلوه واحلى منهم وهم يفشلوا وان شاء الله عيالي مايطلعوا عليهم 


عذروني يابنات طولت عليكم
هالكلام بقلبي من زمان