بموت من عذاب الضمير

السلام عليكم ..
يابنات انا تعبانة مرة وماني عارفة ايش اسوي ..
أنا رحيمة جدا لكن تصرفت بطريقة انا نفسي استغربتها وكأنه كان فيه غطاء على عيوني خلاني اسوي اللي سويته وفجأة ****ل الغطاء عن عيوني ..
احنا عندنا حوش في بيتنا وتجي القطط احيانا في الحوش ونحط لها باقي الأكل .. وفي يوم قبل حوالي سنة لقينا قطة في الحوش وشكلها اليفة مرة كأنها مرباه في بيت جلست تنوي وكذا وصرنا نحط لها اكل ومويه .. لكن صارت تضايقنا وتحاول تدخل البيت وتجي عند شباك غرفتي وتجلس فيه واحيانا تزعجني تصحيني آخر الليل بصوتها مع انه نكون اعطيناها اكل واذا انفتح البيت تدخل جوه على طول ونخرجها الحوش .. الى قبل اسبوع صارت القطة تموي بقوة عند الباب فتحت الباب لقيت دم كثير عند الباب وفي الحوش .. حطينا لها اكل مارضيت تاكل .. المهم قمت انا وغسلت الحوش وتعبت مرة لأن الحوش كبير وانا ماعندي شغالة وغسلت الفرشات اللي في البيت لأنها دخلت البيت كمان .. المهم تعبت وضاق صدري منها وطفشت .. قمت اخذتها وروشتها ولفيتها بمنشفة وجففتها بالسشوار عشان ماتطلع برا وهي مبلولة وتبرد .. وخليتها كم ساعة وبعدين اخذتها انا وولدي ووديناها حي بعيد عنا حواليى5 كيلو وخليناها هناك ورجعنا .. ولما رجعنا جاء في بالي لاتكون والدة ويكون عيالها مدسوسين في اي مكان ورحت دورت في البيت وفي الحوش وارسلت ولدي يشوف الشارع وفي عمارة مهجورة جنبنا ومالقينا شي .. بعد كذا رحت انا وولدي للمكان اللي حطيناها فيه ومالقيناها وكلمنا الأولاد اللي في الحي اذا احد شافها يتصل علينا وصرنا كل يوم انا وولدي ندور عليها في الحي ومالها أثر لدرجة حطيت اعلان فيه صورتها ومواصفاتها وفيه مكافأة 500 ريال للي يلقاها ..
بنات انا تعبانة صار لي 4 ايام ماآكل واذا دخت اخذ تمرة وموية بس فقدت شهيتي تماما.. انا بس ابكي ومالي رغبة في اي حاجة .. تخيلوا فيه ناس شافوخا عندنا وطلبوها ورفضت .. وفي لحظة انا بنفسي اوديها واتركها ماني عارفة انا ليش سويت كذا .. كأني كنت نايمة وصحيت .. انا تعبانة بموت من عذاب الضمير وفاقدة صوتها ..قولوا لي ايش اسوي عشان ارتاح وارجع لحياتي ..