ابشركم كل شي كويس...


خلونا ندخل في السوالف....

دريتوا أني صرت أدرس حريم المسجد عربي....والله ماقدي أحد:)

حتى الانغريزيات صرت ادرسهن....


............




بدا الأمر مع خويّتي البنغالية اللي تطلّبني أدرسهم شوي عربي....

انا تصورت في البداية ان أساسات العربي عندهم موجودة على الأقل معرفة الحرف العربي وأصواته ...



المهم ويجي هكاليوم واتواعد معاهن الأخوات....قلت يالله تعالن ...

وطبعا أحسبن الدعوى زي الديرة قومي واطمري ونظفي البيت لو انه من حينه نظيف :)


بس هماه بيجيك ضيوف....قومي نظفي ...لو تقحشين الفرشة وتنقشينها لو تنظفين الجدران....


القهوة قامت تعط في البيت والبخور...حسيت لحظتها اني بالسعودية...

واطمر بزهم على اختي تجيني....مير اذكر اني منب هناك..

قلت يالله معليش شباب...:)


عاد تحسبوني ابالغ....والله ياهكالايام اللي راحت زادت حالتي النفسية سوءا...والأحلام بأهلي كانت كلمالها تزيد...وكل مرة اقوم القاني انادي أمي ولا حدا خواتي...


طبعا مايحتاج أقول لكم عن فجعتي بخالتي أم سعد....واللي للحين مانيب مستوعبة هل هي حقيقة ولاحلم...

أتمنى حقا أرجع للديرة والقى كل هذا كان كابوس...مجرد كابوس كبير...


...........




لايامال الجنة ياام سعد....


................

ولأن الموية هارد ....ثقيلة دم ولاتنشرب حتى ....فقد دمرت بشرتي وشعري وكل ما مني...

وصرت كلما شفت روحي بالمراية فعلا تجيني روعة....من اللي سوى بي هذا كله...

انا وش جابني هنا؟؟؟


...........


المهم كانت زيارة خوياتي هذي فرصة كبيرة اني افكر بطريقة ايجابية واطالع لعمري بعين ثانية...


خلاص يابدورة الحرمة ماهيب فقط شكل وجمال وسواليف ولبس ....تقدرين هالمرة تسوين لنفسك واخواتك شي ثاني مختلف...

فعلا بمجرد دخلتهم علي هكاليوم فهمت قديش الفرق بين ثقافتنا وثقافتهم...بين تفكيرنا وتفكيرهم...


كانوا من الميانة يفتحون دولاب التعليق الداخلي جنب المطبخ (اللي بوسط الجدار) ويعلقون جاكيتاتهم..

لأبعد الحدود فاجأتني هالميانة والبساطة في التصرف وخلتني بالمقابل ارتاح لأني فعلا ماني قدام ناس بينقدون علي ولا على مستوى الضيافة ولا على اي شي...

فعلا سبحان الله حسيت اني مع اخوات بمعنى الكلمة....الشي اللي افتقدته من زمان زمااااااااان


....


اختكم في الله ماكذبت خبر قامت تفلسف على هالضعوف عن بنية الكلمة العربية وعن الفرمتة (التصريف والاشتقاق) وكلمة تجر كلممة وكلمة تجر كلمة...وانا اكتب على اللوح قدامي احسبنهم فاهمين من الطبخة شي...



وان اكتب لهن الضعيفات .....(شرب ...شارب...مشروب...وهذا نسميه تصريف واشتقاق...وهذا يجعلك باتباع القاعدة توسعين قاعدة الألفاظ الموجودة لديك ...وأبشركم ان الجميل في اللغى العربية انها معتمدة كثيرا على الاشتقاق...

وهات ياطمبقة مدة نص ساعة والضعيفات ينقشن حرف حرف...

مير تكلم علي هاجر البنغالية : يابدورة نحن لانملك أساسيات اللغة العربية ولاحتى الحروف العربية....ونحتاج الى كلمات اساسية في التخاطب والتحيات والأسماء ومن ثم سنصل الى هذه المرحلة فيما بعد...


رحم الله حالتس من بدّورة:)




...........




هنا قمت اشاهق من الضحك قلت اجل وش تكتبن ؟؟؟


قالن نكتب اللي انتي قدرتي عليه من كلمة اللي فهمناهن...ولاحتى هالدرس لو عطيتينا اياه بالانغليزي وجبتي نماذج انغليزية مافهمناه...قال فورميشن قال...


بدينا عقبها نقرأ الفاتحة ونفصّل في معنى كل كلمة وتصنيفها...وانبسطوا بالحيل على هالطريقة...

عاد عقب ماتقدمنا شوي وعرفوا يقدرون يصوغون الفعل المضارع من الماضي...ويفرقون بين الضمائر...ويعرفون افراد العائلة ....

صرت اصلح لهم قصص صغيرونة بالعربي تحتوي جمل مفيدة دارجة زي التحايا وزي الأسئلة المعتادة وزي المواقف اليومية والحكايا....


فعلا من هالدورس بديت احس باحترام لنفسي من جديد ...وبعودة كبيرة للثقة في نفسي من جديد...

موب سهل اطلاقا انك تحسين انك مبهدلة وفي نفس الوقت مانتي قادرة تسوين لنفسك شي

في الديرة الله لايخلينا تقدرين تسوين نفسك في يوم واحد وفي مكان واحد

بديكير ومنيكير وقص وصبغ وفرد وحمام مغربي وتشقير وحلاوة في مكان واحد ...

لكن هنا احجزي موعد وعساتس تطيحين بوحدتن مثل الناس ...على قص وهاي لايت بس....

وهذا اللي سويته :)


هاي لايت ديتس أم صالح ....


جايتكم....:)

ماقلت لكم ....تجمعت السواليف لين تشققت بهن الجعبة :)


حتى وزني زاد بصورة مرعبة ...


الله يخلي الفضاوة والبلع والخبز المحمص والزبدة ....


ماقلت لكم انا مابي ملح الا قمت ابلع ؟؟؟


ولاالنفسية الا ساءت ماايبرد غلي الا ابلع بطريقة هستيرية


ويوم اروح للصيدلية اللي جنبنا والقى جهاز الميزان اللي يحتسي ذاك ....


واطير اشحذ رجلي عطني باوند عساك الفقر وهو يقول استحي بخلق الله يشوفونتس...



المهم ويطلع وزني زايد سبعة كيلو ...ويضرب معاي الفيوز سبعة وسبعين :)




سبعة منين ؟؟منييييييييييييييييين ؟؟؟؟



لاعاد اني كل يوم امشي واروح اداوم واتقضى واكرف ....على خبزتين وكم حلاوة وباونتي وتويكس صارت سبعة ؟؟؟؟


هنا عادت وصلت النفسية الحضييييييييييييييييييييييييض....قلت حدك عاد ...حدددددددددددكك

انتبهي لعمرك ......




........


قضبت يدي شوي ....وصرت اسوي ريجيم قويسي....مهوب قاسي....



ولما خفيت شوي وبديت أخف نفسيا....واقرر أهيلت شعري (حلوة أهيلت ؟؟؟:)يعني اسوي هاي لايت)....


واعرم هالشوشة ....


وامر وانا راجعة هكاليوم على كوافيرتن جنبنا تسنها الشيفة ....

ادخل انا احسبني بالسعودية...ولاها تقص بالمكينة وتحلق وتحلق قلت انا واحزنيه به حريمن يحلقون شعورهن نمرة واحد؟؟؟



ولما قام ينفض شليله والاه رجالن حاطن روج وكحل....



لايامال البلا والبلش والمواذي كلها:(


واع واع واع....



.............


ويوم قضت منه وهي تقول لي ها ؟؟؟قلت ابقص واصبغ وافرد ...

قالت مانسوي فرد بس نسوي هاي لايت ونقص...

قلت زين طيب ...يالله كم تبين ؟؟؟

:)





هههههههههههههههه


ماقلت لكم القروي قروي وين ماراح ....؟؟؟



قالت يالاخت يبيلتس تحجزين وتجين بوقتس بعد هميييييييين جين تقصين؟؟؟

قلت لها وشو انتم مستوصف و كوافير؟؟؟بعدين ودي اسوي بديكير ومنيكير ....


وتقعد تضحك قالت هذولي لهن محلاتن جنبنا مانسوي انحن....



لاياعساكم للفقر والعجز....



.................


أشر لي بالمنديل ....ياهوه...وقال انا ماشيييييييييييييي...




:)

طبعا فقدت الأمل أني يدياتي الجميلات اللي صارن (خضر) من الكرف والبرد والهوا والمصايب اللي تحذفت علي في هالشقة المبروكة....فقدت الامل انهن يرجعن لحالتهن الآدمية من جديد....

قلت مالي الا اسوي لي تلميع بالبيت والله اقوى...


ومن باتسر ...الموعد اللي حجزته للهاي لايت ياعله موب حليل...واطمر من فجر الله من الحماس..

واسوي نفسي انغريزية واروح قبل الموعد بخمس دقايق...وانطر قدام الباب..عاد يوم دقت الساعة ثلاث اللي هو موعدي...واتسفت بوسط المحل حقها قلت هذاني جييييييييييت...



قالت من انتي؟؟؟؟



:(



........

وحدتن الخالق الله تسنها وحدتن من حريم اخواني...


ياكثر اللي يشبهنها...:(


قلت شوفي دفترتس عساتس للفضيخ امس وحدتن كشرتها هاذا طولها حاجزتن لي موعد...



قالت لي باسم باتّورا؟؟؟؟قلت ايه بدورة ...


والله ياهم يلعبون باسمي لعب....


نوبتن هو باتّورا...ونوبتن باتيرا....ونوبتن بدينة....ونوبتن بايينة....


والا عاد وش اشوف في هالمحل ...

ياعالم والله والله على وسخ المشاغل عندنا بالسعودية منتب شايفين اوسخ من اللي شفت ...



والله ياتقولون صندقة هنود في مزرعة بالدوادمي ولا الزلفي...ماهوب حتى بالرياض....


وسخ ...عجايب....والشعر اوطّي عليه ...وياعاشقين ولكم الله...



وتسبدي شوي وتجي جميع....قلت يابدّورة وبشّر الصابرين...بعد شوي تطلعين زي القمير وتنسين كل هالوسخ وكل هالفتساير ...


الفنايل الملفّزة حدر الكراسي والجاكيتات معنقداتن بكل صوح ....وعصّارات الصبغات متلفزاتن حدر المرايا...وحالتن ياسف لهالعدو...

قلت اخاف مار يجيني أيدز ولابلا من هالشوفة....بغيت أصفر...

وادخل قلت يامرة....نظفوا المكان...وترا ابي مكان متطرّف طلبة ....تخبرين ابشيل حجابي واخاف يمر رجال ....


وتاخذني لمكان متشطّرن مرة...وهي تنتفض...


مدري مستحيتن من الوسخ ولا خايفتن مني؟؟؟

انا مادري ماقد شافت محجّبات من قبل؟؟؟لاوبالعباة السعودية فل اتوماتيك ...



بعذرهن تقوضبت ركبهن الكوافيرات ...قلت شوفي ابي كتالوج بختار لوك وبسوي هاي لايت اول ...بس شوفي تراها اول رة اسوي هاي لايت بحياتي يعني تراها مجازفة اني اجي لكم وانا ماعرفكم حتى


وتقوم تنتفض....يا نشبة منين جيتي...


قالت اجل بأخذ من شعرك جزء واختبر عليه الصبغة قلت ايه اجل؟؟؟جبتي جديد يعني


قالت طيب ممكن ألمس شعرك ؟؟؟
:):):)

هنا تمزعت تسبدي من الضحك فعلا...


ياعالم هم صدق اغبياء والا يتغيبون؟؟؟


يعني جايتن لمتس بصبغ واقص يعني منتب لامستن شعري؟؟؟

ولابالريموت تبي تحورفين بي...

؟؟؟؟؟؟؟؟؟
:hahaha:

...............



ونرسي على هكالهاي لايت ....قلت انا ولين منب لاعبتن بشعري منب حاطتن بيسك ...بس هاي لايت ثقيل كستنائي على لون شعري الاسود الفاحم...

طارت عيونها الضعيفة ماقد شافت فحم زي شعري....شكلها قالت الصبغى ماهيب صابغتها ذي....


وتقوم تبالع ريقها انا مادري وش السالفة ....وراها كنها تعلّم على شعري؟؟؟


هي ماتدري...؟؟


المهم ...وتبدا تهيلت شعري....وخصلتن منا ومنا لين صرت زي العنز الصمعا...قصدير وحالة


واقوم انزل عيوني عن المراية لايجيني شي...اش بيسوي ابونا لو شافني على هالشوفة؟؟؟


:)

حياكي الله يبدوره وعظم الله اجركم في خالتك ام سعد الله يرحمها ويغفر لها ...اسعدتينا برجعتك وسواليفك الي تسعد القلب وننتضرك بكل شوق ...