بناتي ملاصقين معي حتي فى جلساتي مع زوجي و الأهل

صباح الخير

كيفكم حبايبي

خواتي حبيت استشيركم اكيد اغلبكم ماشاء الله عندها اطفال وخصوصا من عمر 9سنوات وتحتها انا الصراحة تعببببببببببت وانا اقول اصعب شي في الوجود التربية ماادري العيب فيني او اني ابحث عن الكمال وهذا شي مستحيل :42: ولا انا موقادرة اربيهم صح ؟

المهم ياخوات الحين بعرف لما تجلسون مع ازواجكم اطفالكم طول الوقت في وجيكهم :09:

انا عندي ثلاث بنات الله يصلحهم ماغير اربع وعشرين ساعه في وجهي مااعرف اتابع تلفزيون مااعرف اجلس مع ابوهم افتح معه موضوع مااعرف اجلس ع النت من جد هبلوا فيني تخيلوا جايبة لهم العاب الدنيا عندهم غرفة لوحدهم عندهم التلفزيون وقنوات الاطفال لوحدهم والبيت ماشاء الله كبير وفيه حمولتي في الدور الارضي ومع ذلك مايجلسون الا عندي في غرفة الجلوس اقولهم ياماما روحوا العبوا يقولوا ايش نلعب لعبنا وطفشنا وطفشنا تخيلوا :( اول مرة اشوف اطفال يطفشوا من اللعب

والله محتااااااااارة معهم وكله كوم والبنت الكبرة اللي عمرها 9 سنوات كوم ياربي تخيلوا اذا رحت لاهلي تمووووت في الجلسة مع خالاتها الكبار وانتم عارفين الحريم وسوالفهم وخرابيطهم وانا تعبت وانا اقولها قوووومي يابنت وحتى هي صارت تحسس تقول ياماما انتي دايم تحرجيني كل مااجلس تقولي قومي طيب مع مين اجلس المشكلة مافيه احد بعمرها من البنات كلهم كبار او اصغر منها والله اني انا تعقدت خايفة عليها من هالجلسات لا تخربها واحيانا ارحمها لما اقومها من عند اللي اكبر منها بالله شوروا علي يابنات تكفوووون مع العلم ولله الحمد انا وابوهم مو مقصرين معهم باي شي سواء معنوي او مادي
كيف تسوون مع اطفالكم وكيف تنظمونهم وهل يجلسون معكم وهل فيه لهم تلفزيون وريسيفر لوحدهم وكيف وكيف
انصحوني الله يجزاكم الجنه