بنات أنا اللي بنجلط

السلام عليكم بنات شخباركم
بنات انا توني راجعة من بريك الغدى ،، رجعت مقهوره من كلام البنات زميلاتي اللي كنت اتغدى معاهم ،ما اقدر اوصف لكم القهر اللي فيني :(

فيه وحده قالت أنا لو بنتي مثل (بنوتة بابا) بموت ، انا طنشت وجلست آكل وابتسمت ،، ردت عليها وحده مو من قسمنا قالت لا انا لو بنتي شهودة طلعت مثل ( بنوتة بابا) بنجلط وحده قالت ليش؟ ردت عليها وقالت انا ابغي بنتي تصير قويه مابيها جذيه هااااادية وكل شي تسويه ببرود ،، انا في نفسي اقول انتي من وين تعرفيني عشان تحكمين علي هالشي؟!!!

لكن هم بعد سكت ولا علقت وكملت أكلي ،، لين ماحسيت ان نفسي انسدت وتركت الأكل ، فاللي تكلمت بالاول قالت يالله (بنوته بابا) نروح الحمام نغسل ايدينا ،، قلت يالله مشينا،، رجعت قالت الثانيه خلوها تكمل أكلها ليش تقومونها ليش زعلتوها ، فرديت عليها انا شبعت الحمدلله ولو ابي اكل بعد بقعد آكل ما بنتظر احد يقولي قعدي كل الجالسين ربعي ومافي حد غريب استحي منه...

علقت وحده ويييه طلع لسانها
وثانيه قالت لا طلع عندها لسان مو ساكته
وثالثه ايه يقولون السكوتي لوتي

وعلى فكره يقولون هالكلام كله بصيغة ضحك ومسخرة ،، يعني لاحد يقولي ليش ماعصبتي عليهم لان لو عصبت بيقلبونها علي واني ما اتقبل المزح ،، وبيقولون اصلا احنا نمزح وانتي قلبتيها جد

انا احب المزح والوناسه لكن ما حب التعليقات علي ولا احب اعلق على احد حتى لو كان مزح،، ومشكله بنات قسمي كل وحده لسانها اشطوله ويحبون التعليقات ،، والمشكله الكبيرة ان لو وحده علقت بشي الكل يعلق معاها .. ماتلقين والا كل وحده عاقه رمسه من صوب..

انا بطبعي هاديه لكن اجتماعيه .. يعني ما احط حواجز بيني وبين الناس بس ما يعرف قيمتي الا اللي القريب مني
وبطبعي احب اسولف بعد ما آخذ عالشخص ، ولما نكون في مجموعه ما احب اتكلم بصوت عالي لا اسولف مع اللي قريب مني وكذا
وانا طبعي عاجبني واحسه احسن من اللي تتكلم وتضحك بصوت عالي
واحس الحياء ميزة فيني كثير مدحوني عليها

لكن اول مره في حياتي امر بمرحله ان اللي حولي مستنكرين فيني هالشي حتى حركاتي ورقتي مستنكرينها علي

وش اسوي معاهم افيدوني

لان تعليقاتهم تأثر علي ويمكن مع الايام تهز شخصيتي
وكثير مواقف تصير بس انا ذكرت لكم اخر موقف اللي توني راجعه منه