بنات الامارات ..في اي بنك فاتحة حساب ..كيف ترتبين مصاريفج ..كيف توفرين

بالنسبة للبنك.. انا والأهل فاتحيين حساب عند مصرف ابوظبي الاسلامي..

اخترنا هالبنك لانه اسلامي ولان خدمتهم واايد زيينة بالمقارنة مع البنوك الثانية.

وبالنسبة للمصارف الشهرية كلها طبعا على الوالد.. الله يحفظه.. هو الي يهتم بهذي الامور طبعا مع مساعدة الوالدة.. بالنسبة للبترول.. يحط الوالد مبلغ معين في البطاقة الي توفرها لج محطات البترول وغيره.. طبعا هذي الطريقة اسهل للدفع خاصة اذا كان عندكم اكثر من سيارة.. وسائق وغيره...

مشتريات الجمعية ورواتب الخدم طبعا كل اول شهر نعطيهم..

اما الدفع لباقي الاشياء الثانية مثل التسوق وغيره مرات يكون عن طريقة الكاش ومرات عن طريق الكريدت كارد..

:)

مرحبا بج اختي BnT DaR ZaYeD

نورتي الموضوع بمشاركتج الطيبة ..

بس اختي شو عن التوفير

هااااتوفرين و لأ ؟ و الا تصرفين كل اللي عندج

انا عندي حساب اجيال من بنك دبي الوطني
و فتحته لاني كنت متعايزه اسير البنك و ربيعتي ريلها مدير في البنك و يابت لي الاوراق و فتحولي الحساب بدون ما اسير و اتعب عمري...و طبعا حساب اجيال لعمر 18 الى 25 سنه و انا الحين بدش ال26 و شكله بيتم مفتوح لي و هو ماله حد ادنى طبعا و هاي افضل مميزاته

اما عن تيميع البيزات فهاي ناسيتنها...و اعمل بالمثل التالي: انفق مافي الجيب يأتيك مافي الغيب

ما شاء الله على مواضيع يا ام الجواهر ..... درر:)

بالنسبة لي فاتحة حسابين :
بنك دبي الاسلامي
بنك ابوظبي الاسلامي

بنك دبي على اساس انه اسلامي و ما يتعاملون بالربا و الله اعلم
فالبداية فتحت عندهم جاري و توفير و عقب شفت انهم يوزعون ارباحهم السنوية على حسابات التوفير فسكرت و فتحت في ابوظبي الاسلامي جاري الكترون ياخذن منج في السنة 100 درهم لانه يعتبر انج ماجرة عندهم صندوق فالـــ100درهم اجار الصندون و ما يدخل فلس على بيزاتج
و بما اني اعمل بالمقولة اللي تقول: "لا تسرف لو من البحر تغرف " فاحاول قد ما اقدر اني اكون اقتصادية كريمة:)
و بالنسبة للتوفير الشهري فنشترك في جمعيات حسب الميزانية هالمرة مثلا 1000 على 12 شهر تقريبا و الله يبارك في ارزاقنا
و البترول شهريا تقريبا 300 درهم لاني ما اطلع الا حق الاشياء الضرورية جدا جدا
و بطاقة الموبايل اشتري من بداية الشهر بــ 150 درهم و اتقيد و ساعات اضطر اني اعبي اكثر خاصة قريب العيد و رمضان نطرش مسجات لكن باقي الاوقات تكفي الـــ150 حق شهر و يمكن تزيد
و لاني اعرف عمري بسرف اذا كانت الفلوس في ايدي مسوية فالبيت حصالة خشبية (صندوق فيه فتحة حق الفلوس و قفل شرات اقفال البيبان) /// يازين الوصف
المهم احاول اني اوفر 500او اكثر في الشهر و نهاية السنة افتحها و طبعا ما اخلي المفتاح عندي عشان ما افتح كل ما سولت لي نفسي :) اخلي المفتاح عند شخص استحي اني اطلب منه كل حين مثل ربيعتي اللي مب مقربة الي او يارتنا او اي شخص
و الكماليات ما تكون شغلي الشاغل بمعنى اني كل يوم او اسبوع طايحة فالسوق اشوف شو اليديد لا اشتري حسب حاجتي للشي

سامحوني قلت قصة حياتي بس حبيت افيد و استفيد

صح لسانج اختي حناين 81 انا شراتج تماما احاول اضبط اموري علشان ما يقرب آخر الشهر وأنا مفلسة و أساعد الوالد في مصاريف البيت و مطلعه سيارة خاصة فيني و بنكي هو بنك أبوظبي الإسلامي و عندي حساب توفير بس كل ما وفرت اسحب الشهر اللي بعده و بطاقتي اسوي شرات حناين و تكفيني و الحمد الله على النعمة