بنات البحرين..............حياكم هني

السلام عليكم شلونكم وشخباركم

خواتي بغيت من كل وحدة فيكم(اذا ما عليكم امر) تقول لنا عند اي دكتورة تتعالج ؟

كم يكلف العلاج؟
مميزات ومساوئ هالدكتورة؟

اذا رحتي لمراخه من هي من وين وكم سعرها؟؟

عشان نستفيد ونعرف وين نروح اذا اتوهقنا.

ببدي معاكم...
في بداية علاجي رحت لدكتورة كيران في مستشفى البحرين التخصصي فتح الفايل ب 20دينار
اما الزيارات والالترساوند مو كل مرة تاخذ من عندنا يعني مرات بسيطة الا تاخذ من عندنا فلوس احيانا تاخذ 10 واحيانا 15 دينار.
راجعت عندها 3 شهور ومن اول مرة عطتني المنشط حملت بس الله ماكتب ان حملي يتمم :(
بعد الاجهاض وقفت جم شهر مارحت وبعدين اتصلت باخذ موعد من عندها الا يقولون سافرت لندن وما بترجع فاضطريت اني اخذ موعد عند دكتورة فرح بس ما ارتحت لها.من اول زيارة اشعة صبغة هذا غير الانتظار اكثر من ساعتين وهذا ماخذين موعد بعد.
الفترة الحالية اراجع عند منى الشرقي دكتورة لابأس بها وما تخلينا نروح ونجي وايد فتح الفايل 15 الالترساوند 15 اما الزيارات العادية 10.
اما بالنسبة للمراخه فرحت لوحدة من جنوسان حرمه زينه اسمها ام عبد الله كانت سعر مرختها 1.5 بس صار الحين دينارين.((على قولتها كل شي يغلى بس اني ارخص؟؟؟)

ان شاء الله اكون افدتكم وانتون بعد تفاعلوا معاي وافيدونا.