السلام عليكم..

شحوالكم بنات وحشتوني؟؟
مشكورين على سؤالكم عني.. اني الحمدلله زوينة بس المنتدى كان يومين مخاصمني مو راضي يفتح.. وبعدين انشغلت ويا هالمرض والتعب :44:

ام علاوي:
ما تشوفين شر خيو.. والله يساعدش حمل ودراسة واجد صعب
يالله كلها ايام ان شاءالله وبتخلص الجامعة وبتفتكين.. وترى دوام الجامعة واجد احسن من الكلية.. على فكرة اني درست ادارة اعمال بس فصل واحد بس ما حبيته ورجعت حقوق وقربت اكمل الدبلوما بس لأنه مو عاجبني واني من البداية كان خاطري في التمريض قدمت للكلية.. والحمدلله هذاني بتخرج قريب.. ترى بس سنتين قعدت في الجامعة..
وزين زين حافظي على معدلش.. بتشوفين ان شاءالله بعد الولادة بيزيد عزمش على الدراسة لأنش تتركين ولدش فلازم تسوين زين عشان ترفعين راسه.. اني ارتفع معدلي واجد عن قبل لا احمل..

نورة:
شخبارش خيو؟؟ انتين بعد فيش ولد :) عقبال نحمل ببنات في سنة البنات :42::icon28:

ملآاكـــ:
اهلين خيو.. شخبارش؟؟
اذا من الحين تعبتين مااقدر اقول غير الله يساعدش.. ترى كل الاشهر في صوب والتاسع في صوب.. لأنه في التاسع بسرعة يزيد وزن البيبي وبتشوفين شلون اخر الوقت حتى لين تنبطحين لازم احد يساعدش عشان تتقلبين يمين ويسار:( بس ما عليه اكيد النونو يستاهل..
للأسف كنت احاول اتذكر وش كنت بقولش لكن ما ذكرت.. عفر كله من الحمل..
شكله فيش بنوتة:42:

Jafalove:
اذا كان اللي ينزل عليش اكيد ماي ومو افرازات روحي المستشفى ضروري ضروري ماتدرين يمكن ماي البيبي لا سمح الله ما تبين تخسرين تعبتش.. الله يبعد عنش الشر.. اتوقع انه اللي عندش افرازات لأنها تزيد في الاشهر الاخيرة.. بس المتابعة ما تضر.. طمنينا عليش خيو..

هديل البحرين:
اني دايما اقول الحمل والولادة يهون مقابل التربية.. ومن اول التجمع لو تشوفين ردودي دايما اقول للبنات جذيه..
واذا تبين الصدق من اول ما تحملين خلاص تودعين الراحة بداية الوحم وبعدين الثقل والولادة والتربية.. الحمدلله الاولاد نعمة الله يحفظهم لينا وما يحرمنا منهم ويساعدنا على تربيتهم :)
وتوش في البداية بتشوفين العجب كل ما يكبرون :09: .. اني كنت اموت في شي اسمه جهال لكن من جبت ولدي عرفت يعني شنو الام وعذرت امي.. اموت في الجهال للحين لكن مااقدر اتخيل اني اجيب اولاد واجد :42:

يالله بنات تحملوا في روحكم اخليكم الحين... باجر وراي موعد في المستشفى.. تخيلو هذا ثاني موعد متابعة حمل بروحه :42: واجد هاملة روحي..

شخباركم بنات وشخبار الحمل وياكم ***** الله كل شي تمام؟
أني مستانسة لأني وسط خواتي البحرينيات على الأقل نفهم لبعض مو مثل السعوديات ما أفهم لهجتهم كلمات غريبة علينا
شكلكم حلويين وطيبين وهاذي ثالث مشاركة ليي و***** الله تتقبلوني أني موحابه أكدركم وأمللكم بكلامي بس يمكن تساعدوني وتطلعوني من الحزن والهم اللي أني في أني الله يسلمكم من تزوجت من أول شهر حملت وكان حملي طبيعي وولدت في مثل الموعد اللي عطوني إياه بالضبط وجبت بنوته قمر بياض بحمره ووجه مدور وبعد مرور شهر بدت الطفلة يصير لونها أصفر وما ترضع من صدري وتشرب صناعي وترجع بشكل مو طبيعي ومن مستشفى إلى مستشفى إلى أن جا يوم واكتشف أن الطفلة مصابة بمرض خطير مزمن سلمت أمري إلى الله ورقدونا في السلمانية وبدوا يعطونها العلاج ما تحملته كان عمرها ستة أشهر وتوفت ملاكي المشكلة أن موتتها كانت صعبة وشكلها غير فقدت الشهية وصار ليها شهر ماشربت حليب كانت عايشه على السيلان وبطنها أنتفخ وكأنها في الشهر التاسع وليلة اللي بتموت أني حسيت ليها لأنه طول الليل كانت تون من الألم تسعة أشهر حملتها في بطني وألم الولادة وتربية ستة أشهر ومعاناتي في السلمانية شلون أنساا صار ليها من توفت إلى الحين خمسة أشهر وأني الحين حامل
أني يوميا أصيح عليها خايفة من كثر الصياح يتأثر جنيني وصايرة كله اوسوس ماأدري الجنين اللي في بطني سليم لو لا مع أن مرض بنتي مووراثي
وأبغي بعد أستشيركم في شغلة زوجي مصر إذا جبت بنت أسميها مثل أسم المرحومة شرايكم مع أني حاولت وياه أني إذا جبت بنت بغير الإسم بس هو مصرأتوكل على الله وأسمي مثل الإسم وما أسوي ليي مشاكل ويا زوجي أو أحاول وياه مرة ثانية
وفي النهاية أحب أشكر كل من قرا موضوعي وكل اللي بيردون عليي وأتمنى أن رب العالمين أنه يقومكم بالسلامة ويرزقكم أطفال سليمين وآسفة على الإطالة

أم حوريه حبيبتي
يا هلا وغلا فيج بين أخواتج بهالتجمع ونورتينا الله ينور دنياج
واحنا نتشرف فيج بينا اخت عزيزه وغاليه وترى احنا بعد ما نفهم
زين الى السعوديات لان عندهم تعقيدات وايده مو مثلنا

و الله يعوضج ان شاء الله وهنيئاً لج بنت تنتظرج على باب الجنه
وهذه الطفله راح تكون رحمه لج يوم القيامه وما راح تدخل الجنه بدونج
اذا تتابعين برنامج الشيخ ما اذكر اسمه بس يخلونه على قناة الزهراء و المهدي
ويتكلم عن الموت و بكم حلقه تكلم عن طيور الجنه و الاطفال الي يموتون وهم
توى واعيين عالدنيا وتكلم بحلقتين عن رحمتهم الى والديهم في الاخره و شلون
يدخلونهم الجنه صج انها حسره بالدنيا ولوعه لكن فكري بالاخره راح يكونون لج
مدخل الى جنات النعيم ان شاء الله
واكيد انتي مؤمنه وصبوره ومحتسبه وراضيه بقضاء الله وقدره
والحمدلله ان الله رزقج بالحمل الي ان شاء الله راح يعوضج عن الي فات
و مو كل حمله او ولاده بتكون مثل الي قبلها وهذا احنا عايشين بالدنيا ونشوف
والحمدلله ان مرضها ما كان وراثي فأنتي لاتتعبين نفسج بالتفكير وتأثرين على
نفسيتج ونفسيتج تاثر على حملج وعالبيبي واذكري الله ودائما اقري قرأن ومسحي على بطنج
ونفخي بصدرج والي فيه خير وصلاح لج رب العالمين يختاره الموت احيانا ارحم
وارحم بكثير من تعيش الطفله طول عمرها متعذبه وتتعذبون معاها
لا تحاتين وابعدي الشيطان عن تفكيرج وخلج ايجابيه وفكري بالي جاي وما يمنع
انج تسمين على اسمها وصدقيني اذا كبرت راح تنسيج كل هالالم والحسره الي عايشتها
وبتحسين انها بينكم موجوده وما راح تنسي لانكم خلدتون اسمها

والله يمسح على قلبج خيه و يرزقج الحمل السليم والولاده السهله والطفل المعافاه يارب
ويقر عيونج بأطفال يملون عليج البيت ويطفشونج من شقاوتهم :)

شكرا حبيبتي أم علااااااااااااوي على ترحيبش الحلو وعلى كلامش اللي كأنه بلسم طيبتين خاطري الله يطيب خاطرش ومشكورة بعد لأنش عطيتين شوي من وقتش وكتبتين لي هالرد الحلو الله يصبر قلبي ويثبت حملي ويشغلني بالطفل اللي جاي في الطريق حبيت أقول لكم أني توني في الشهر الثالث واتمنى من كل قلبي أني وزوجي أن المولود يكون بنت طبعا اللي يجي من الله حياه الله بس خاطري في بنت البنات حلوين وعندي ثياب جديدة وااااااااااااايد مال بنتي المرحومة ما مداها تلبسهم
الله يقوم كل الحوامل بالسلامة ويرزقهم الذرية الصالحة السليمة ولا تنسون كل وحدة إذا قامت بالسلامة تقول لنا عن قصة ولادتها
الحمدلله رب العالمين على نعمة الإسلام وعلى محبة النبي محمد وآله الطاهرين

شدعوه خيه وقتي كل لج اذا تبين :)
الله يرزقج على نياتج يارب ويرزقج بنوته حلوه مثل القمر واحلى
وتكون شقيه من شقاوتها تخليج تفترين على أصبع مثل ما يقولونه
خخخخخخخ
وتحملي في روحج خصوصا وانتي بالاشهر الاولى والله يعينج على
النساه والثقل انا بالسابع وللحين شكلي أتنسى خخخخ من كثر الدوخه
والترجيع شلون انتي بالثالث الله يعينج يارب ويرزقج على نياتج يالحلوه