السلام عليكم شخباركم أمهات ؟؟وشخباركم ويا الحمل ؟ وحشتوني من يصير ليي يوم أو يومين ماأدش ماشاء تفوتني مشاركات واجد
خاطري أكتب إلى كل وحده بروحه بس أني خايبة ما أحب الكتابة واجد.
أختي الغالية أم علاوووي أحب أشكرش على دعاءش الحلو ليي والله يسمع منش وصدقيني أحس أني صرت كله أخاف وسواسية اللي شفته موشويه .

المهم حبيباتي وكما عودتكم مواضيعي كله خشنة شوي بس ما عليه تحملوني اليوم بتكلم وياكم عن (الطلق )إذا بدا عليكم شنو بتسوون وإلى من بتقولون؟؟
أني بقول لكم بالضبط شنو سويت أني بصراحة ولدت في نفس الموعد اللي عطوني إياه بالضبط 16/4/2010 والكل أستغرب وقال بل ولدتين في نفس الموعد الكل حسدني وقررت هالمرة ما أقول إلى بيت عمي وبيت أبوبي متى بولد أخاف أولد في نفس الموعد ويعطوني عين

المهم طول الليل مانمت والصبح دشيت الحمام وجان أشوف في الأندروير الله يسلمكم دم قلت أكيد هاذي اللي يقولون عنها السدادة مالت كيس الطفل قلت أكيد اليوم بولد ولازم اجهز روحي قبل لا يزيد الطلق في البداية نظفت المنطقة الحساسة كرم الله وجهكم وبعدين تسبحت ومشطت شعري وبدا الطلق حاولت أكل شي ما قدرت كانت لايعه جبدي واصيح بروحي ولا قلت إلى بيت عمي واتصلت إلى أختي وقالت ليي حاولي تاكلين تمر عشان يزيد الطلق واشربي ماء ورد مخلوط بزعفران شربت وأني أصيح وأطلق حسيت روحي أكسر الخاطر وبدا الطلق الساعة ثمان الصبح وكل ما جا ليه الطلق يزيد ولا قلت لأمي لأنها مريضة بالسكر فما حبيت أرفع عليها السكر وكنت أصيح بصوت عالي وقلت حق زوجي وكان في الشغل وقال ليي أنا الحين ما أقدر أجي ولا تهريين ما بتولدين اليوم على كيفه يسوي روحه دكتور ولما زاد الطلق الساعة ثلاث ونص الظهر أتصلت ليه وقلت ليه تعال ودني المستشفى قال ماأقدر أنا في الصخير قولي إلى خواتي بيوصلونش بس أني مارضيت ماأحب حمواتي يشوفوني وأني في هالحالة وبيركبون كلهم فوق هم وعمتي وبزيد الألم ماأحب الفوضى وأني أتألم اتصلت حق أختي وجت ليي وودتني مستشفى جدحفص الساعة 4 العصر وكنت مفتوحة 2 سم وولدت الساعة تسع في الليل وخلصوا من الخياط الساعه 10 ونص وكانت بنتي بيضة وحمره ووجهها مدور وشعرها غليظ وأسود والكل شهق لما شافها وقالوا تشبهني لكن من وين ليها البياض والحمرة وأنتين حنطاوية وابوها اسمر ناس تحسد أشكره
طبعا ما حبيت أدخل في تفاصيل الطلق والولادة عشان لا يخافون اللي أول مرة بيولدون وحبيت أقول لكم أن الزعفران مفيد يحمي الطلق ونصيحة بعد لا تخبرون العالم أنكم بتولدون ترى الولادة تتعسر صدقوني وأما بالنسبة لبيت عمي للحين زعلانين لأني ما قلت ليهم لما كنت أطلق ولما نزلت مع أختي ما كان في أحد في البيت كلهم برا ونصيحة بعد اللي أمها فيها السكري لا تقول ليها إذا بتولد حرام ترفعون عليها السكري لا تنسون أن الله وأهل البيت وياكم وآخر نصيحة حملوا وياكم في ورقة سورة الأنشقاق صدقوني عندي ثقة أنها سهلت عليي الولادة
خبرتكم بقصتي و***** الله تقومون بالسلامة وتخبرونا قصص ولادتكم
مع السلامة وفي حفظ الله

أم حوريه

مشكورة حبوبه على النصائح

والله يسهل عليش ولادتش هالمره بعد خيووو
بس عندي سؤال بخصوص ماء الورد والزعفرااان اسمع الكل يتكلم عنه
شلون يعني حبوبه نسوي ماء الورد والزعفران نخففه بماي شوي والا شلون؟؟
قصدي بس نحط ماي ورد و الزعفران مع بعض ونشربه واي كثر نشرب؟؟

هلا أختي ملاك أني جبت غرشة ماي صحة الصغيرة وحطيت فيها ماي ورد ثلاثة أرباعها تقريبا وزعفران من غير قياس سويته شوي قوي ولا تشربينه إلا إذا جاش الطلق واللي هو الألم اللي يشبه ألم الدورة بس أشد ويكون متواصل يعني تقريبا يجي في البداية كل ساعة وبعدين يقل الوقت للين مايوصل إلى كل خمس دقايق وحاولي حبيبتي وأنتين في بداية الطلق وشوي فيش شدة تمشين أني وأني أطلق كنت أمشي في غرفة النوم لأنه غرفتنا فيها طول صدقيني المشي جدا مفيد لتسهيل الولادة والله يسهل عليش حبيبتي

حبيبتي صبرك ياقلبي ليش هالخوف هونيها وتهون صح ان الولادة صعبة بس المراءة تقدر تتحملها ولا تنسين أن الله سبحانة وتعالى وياش وذنوبش كلها بتنمحي وبتنولدين من جديد وبتصيرين أم ومافي أحلى من الأمومة لو أن المرة ما تقدر تولد جان أمهاتنا ما جابوا أولاد ماشاء الله واجد بتولدين بالسلامة وعقب جم سنة بتجيبين الثاني بعد الله يقومش بالسلامة

هلا حبوبات.. حبيت اشاركم بسوالفكم ولو اني متأخرة..

اممم بالنسبة لجهاز مراقبة البيبي اني اخذته من لولو هايرماركت بس الصراحة ما احسه ذاك الزود.. بـ 7 دينار كان.. وكان خاطري صدق في الي ابو صوت وصورة احسه يطمنش 100% وتشوفين البيبي يعني يمكن يصيح لانه مجرد تعصير وبيرجع ينام او حلمان.. بس مثل ما قلتوا غالي..

بالنسبة للدم بعد الولادة اني ما صادني نزيف .. يعني كانت فوطتين من الفوط الصحية مال المستشفى كافية.. وتالي استخدمت ماركة كوتكس ماكسي.. بس وحدة كنت احط (يعني اختي صبرك يا قلبي عادي تستخدمين اولويز الوردي وكلش كلش حطي ثنتين).. بس اني استمر عندي نزول الدم 50 يوم.. مرات يزيد ومرات كلش يقل .. تمللت منه الصراحة..

وانتبهوا للاستحاضة ترى مو كل مرة كبرى.. اذا الدم يغمس القطنة ويخترقها كبرى وقبل كل فريضة غسل.. واذا بس يغمسها (مثل دم الدورة.. وهاي الي غالبا بيكون) استحاضة صغرى وتغتسلون بس قبل صلاة الصبح.. واذا ما يغمسها استحاضة صغرى يعني مجرد وضوء .. وبين الفرضين تتأكدون اذا نزل شي تتوضون قبل الفرض..

بالنسبة لثياب البيبي مو لهالدرجة عاد ان لازم كيس غسيل بروحهم او كبت بروحهم.. هو عادي يعني احسن لو لهم كيس غسيل بروحهم.. بس يعني ما بيصير شي لو اختلطوا بثيابكم.. واسهل بالغسيل..

اني اذا ثياب حمودي شوية يعني مو قد غسلة كاملة، احط شوي من ثيابنا وغسلهم كلهم بصابونه .. واني قلت بستخدم له صابون بروحه لمدة 3 اشهر.. الحين اذا خلص ما برد اشتري.. بشوف اذا ما خالف من التايد بستخدمه عادي..

واني استخدم الكمفورت بعد والحمدلله ما تضرر منه..

أحب التطريز: لا يصيدش احباط ولا شي خيتو.. حاولي ما تكثرين اكل والتزمي بالجدول وان شالله خير.. ناس زيادة بسيطة بوزنهم ويصيدهم سكر الحمل.. وناس زيادة واجد وما يصيدهم.. مو شرط..

ملاك: شخبارش حبوبة.. ها قربت الولادة ها.. انتي حطيتي الموضوع وتوش بتولدين خخخخ.. اني قريت ان النوم على جهة اليسار احسن حق الدورة الدموية مالت البيبي..

بالنسبة للمشد لااااااااا تاخذين مال رامز لان الي اخذته ازرق مطاطي صوب اغراض الرياضة وكان مو واجد قوي ويتمدد فما يفيد فما استمريت عليه ولا شي.. احس مال مذر كير زين .. بس من تجربتي احس ما يروح البطن الا الرياضة لان العضلة هي المترهلة وفعلا بعض الدكاترة ما ينصحون يقولون يقلب الرحم مادري شنو فلا تضغطون واجد بكل الاحوال

واحسن شي سويتينه انج اخذتين بيجامات عادية بس تصلح للرضاعة .. لانج اذا ما تلبسين دشاديش ما تستفيدين منهم.. اني اخذت وحدة بس للمستشفى

بالنسبة بتعقيم المرضعة شوفي: المرضعة الزجاج نفسها عقميها بماي مغلي ونظفيها او نقعيها في المعقم.. بس الحلمة والجزء الي مثبته فيه والغطاء البلاستيك تقدرين تكتفين بالمقم.. ونظفيهم عدل لان يصيدهم بقايا الحليب.. ومو لازم ماء مغلي.. خليه شوووي حار..

وترى تحتاجين مرضعة بلاستيك صغيرونة للدوا او الماي.. مو لهالدرجة ابلاستيك سيء.. وانتي عندج المعقم.. فلا تخافين..
يا رجائي: اني عن نفسي النفاس ما صاحبته آلام الدورة .. بس بعد 20 يوم تقريبا كان في شوية آلام..


صبرك يا قلبي: خيتو لا تخافين ولا تحاتين ولا شي .. ومثل ما قالت احب التطريز تخيلي الجاهل على صدرش بعد ما طلعوه وتالي تسمعين صياحه ,. احلى لحطة.. تدرين اني اقول لامي عجبتني الولادة ههههه.. واحلى لحظة عندي لما حطوه عالسرير ماله بعد ما طلعوه واني قعدت اطالعه.. ما اقدر اوصف هاللحطة.. واني الحمدلله ولادتي كان سهلة .. فحطي الاحتمالات الزينة ..

حفاضات ممكن تحملين احتياط للمستشفى بس ترى هم يلبسونه ويعطونح كم وحدة.. وحفاضاتهم زينين ترى.. بس ترى اغراض الاستحمام اني ما عطوني ولا شي.. اني حملت وياي.. بس ما استخدمتهم.. لان يوم ثاني بيرخصونج ان شالله اذا طبيعي فانتظري ببيت ابوج سبحيه عدل ونظفي شعره عن وصخ الولادة..

عاد مو تحملين كارتون حفاضات الصدر بكبره خخخخخ.. اصلا اني ما طلع لي حليب الا ثالث يوم اول شي كله لبأ
حملي 6 احتياط.. هاي لو طلع من اول يوم حليب.. بس تراه ضروووووري حق عقب اذا ان شالله الله رزقج حليب واجد..

حبوباااااااات اغراض الاستحمام انصحكم بالشنطة الصغيرونة ماركة بيجون الي فيها صغار.. لان الكبار يطولون واجد خخخ اني تمللت منهم وبعدين ثقال مو عمليين للطلعات

واممم وترى مو الكل ينزل منه ماء الرحم وقت الطلق.. اني هم الظاهر شقوا الكيس >>> ما حسيت لهم ولا ادري بشي خخخخ.. ومو شرط سدادة الرحم مادري شنو تنزل لاني كلش ما نزل معاي ولا شي,,

هلا وغلا
شخباركم كروشااااااااات
ملاك
ورد البحرين
هديل البحرين
ام علااااوي
صبرك ياقلبي
نووووره
الله يقومكم بالسلامه يارب ياكريم
بالنسبه لي كل ماقربت الولاده تصيدني حالة اكتئاب خصوصا لما تذكرت سالفة الاستحاظه
اوووووووووووووووف ملل من قلب
بس عن اني احط فوطتين هذي نو ووووي
احس وحده كفايه وتضايقني بس المظطر شيسوي
عن نفسي يوم ولدت بولدي استخدمت فوط أولويز الليلي للتدفق الغزير
وكان واااااااايد زين لايسرب ولاشي
وهذي صورته

أما بخصوص الرضعات فأحسن شي جربته ماركة شيكو chicco وهذي صورته

وأحسن صابون لغسل ملابس الأطفال هذي صورته

لاتجازفون وتستخدمون الصابون العادي لأنه يسبب حساسيه للبيبي
وطبعا منتجات العنايه بالبيبي الغنيه عن التعريف
مجموعه جونسون اند جونسون

ولما اذكر اي شي بحطه
واللي تذكر شي تحطه لنا وياليت بالصور
اشوفكم على خير