كروشات شخباركم
أحد يصيده مثلي هاي اكثر من ثلاث
مرات انسى موعد المستشفى وما اروح
وكل ما اروح اخذ موعد يديد لما يجي وقته
انسااااااه ياربي النسيان عندي صاير شئ مو طبيعي
حتى بالامتحانات عانيت منه
بس الحمدلله أبشركم طلعت النتائج وكل شئ تمااااااااام
وحتى معدلي أرتفع والحمدلله وطبعا هذا كله بفضل الله
وبفضل دعاكم اخواتي ما قصرتوا الله يحقق لكم كل امانيكم
ويسهل عليكم وعلينا ياااااااااارب

أحب التطريز
ياهلا وغلا فيج
وبلا عيااااااااره ترى محتاجين لسوالفكم ومنكم نستفيد خيه
ولا تبخلين علينا بوجودج وطلتج ترى ما بيكلفج 10 دقائق
فعن العيااااااره
وعلااااوي ان شاء الله يكون بخير حسب الي احسه انه بخير
لانه وهو داخل معذبني واحسه حركي شلون اذا طلع الله يستر
بس اهم شئ لا يطلع علي وانا صغيره لاني عذبت امي وايد
وانا الحمدلله بخير واليوم كان عندي موعد بالمستشفى ونسيت
وراحت علينا
انتي شلونج وشلون الحمل معاج
وتعالي ركدي لاتركضين لاحقه لما توضعين ركضي مثل ما تبين
الحين دخلتي أي شهر ؟؟

أم حووووور يالغاليه كثري من دعواتج الله لا يحرمنا منها
حبيبتي والله نفتقدكم كثير خصوصا ان الكروشات وضعوا
فلازم انتوا الحين دوركم علشان لما نوضع احنا بعد ما يكون
التجمع مهجور ويسكنونه الينانوه خخخخخخخخخخخخخ
لازم تشاركون وتتأقلمون مع بعض علشان ما تملون التجمع
وترى التجمع من دونكم ما يحلى يالغاليه
وبالنسبه لدعواتج كثري منها والله احنا بحاجتها وعلى نيتج
حبوبه وطيبة قلبج الله يرزقنا يالغاليه
وعلى سالفة الفراشات لاتتسرعين مثلي خذيت من النجم الجميل
فراش وشنطه ب30دينار وانصميت فيهم لان الفراش وايد احس
طويل مبالغ فيه ولا بقدر احمل ولدي فيه يعني خساره بخليه بس للبيت
والحين اذا اقارنه بالفراشات الي عندي رغم اني انسحرت عليه اول
ما شفته الحين احس روحي فاضيه يوم شريته يمكن لاني اول مره
واول مكان رحته وتحمست له خخخخ لان غريب شوي شكله
نصيحة لاتتسرعين يالغاليه وافتري على اقل من مهلج وعلى راحتج
بعده جدامج مشوار طويل

جافا لووووف
صج المشي معاناه اني صار لي يومين بس أمشي
امس رحت المجمع اتسوق واتمشى فيه مره وحده
واليوم ضليت اتمشى بالبيت لان حرررررر وما اقدر
اروح الممشى امشي الجو ما يساعد كلششششش
صج تعب المشي وتحسين روحج متفككه على قولتج خصوصا
في نهاية الظهر احس ان يتقرطع وفيه احتكاك وما اسمعه الا انا
كل اسال امي او زوجي تسمعون صوت يقولون لي لا خخخخخ
وحتى تحت أحس ألم ألم يروح ويرد من المشي
والنوم حدث بلا حرج لما تبغين تنقلبين لصوب الثاني ياااربي معاناه
وعلى التجهيزات فعلا وانا اجهز لولدي الحين احس البنات اكثر
اشيائهم رووووووعه وتعرفون البنات لان سوالفهم سوالف مو مثل
الاولاد مساكين
واهم شئ تهتمين في ولدج هالفتره علشانما يغار من اخته وترى البيبي
اليديد ما تفهم بس اهو الي محتاج حنان اكثر و حب وعطف

ورد البحرين يا هلا فيج
اشوف قمتين تسمعين الكلام تطلين علينا بفترات متقاربه
خخخخخ على طاري المستشفى اني انسى المواعيد
ويتصلون في زوجي و يعصبون عليه لان اكثر من
ثلاث مرات انسى صراحه تعب وكل مستشفى يقول
كلام شكل فليش اتعب نفسيتي معاهم بعد زين اذا انسى
وما اروح اريح لي خخخخ اهم شئ ما احس فيني شئ
متغير و الجنين يتحرك بأستمرار وهذا يكفي الحمدلله
وعلى سالفة السلمانيه مشكله ما يأخذون أي أحد ما يرضون
ما يأخذون الا الجلف والي موصله حدها والي فيهم مضاعفات
يا دافع البلا والبلوه يعني ناس وايد يروحون ويرجعونهم واخاف
يسوونها فيني اذا رحت ليهم او يأخذوني غصب وبعدين يحطون حرتهم
فيني ويعاملون معامله خرطي وخبرج انا بجر يعني احتاج اهتمام
وعلى جدحفص مدري والله من الي اسمعه عنهم انهم زينين بس يمكن
بعد اذا انضغطوا يخربطون وي المرضى مشكله احنا مو أي مرضى
علشان نتحمل احنا نكون بين الحياة والموت بس مدري ليش من كثر
انهم تعودوا على هالحالات صار عندهم الشئ طبيعي وكأن مراجعينهم
فيهم انفلونزا
يالله انا وحظي والله ييسر الامور ان شاء الله

يالله ما بقى الا كم يوم واخر المعاناه والله يعينا على الشديد القوي
ونقوم بالسلامه بأحلى هديه من رب العالمين وان شاء الله يكونون
عيال برره علينا وعلى ابوتهم و عارفين بحق ربهم ورسوله
ولايتعبونا في تربيتهم ومراهقتهم اني من الحين احاتي مراهقتهم
خخخخخخخخخ

السلام عليكم
شلونكم شخباركم كروشاااات << طبعا اني مو منكم ههههههههه

مشكووووووورين كلكم اللي تحمدوا ليي بالسلامه << والباقي انتظر هاا

قريت كل الردود بس اللي اتذكره بقوله

ام علاوي:
شخبارش خيووو
بصراحه بالنسبه ليي يعني السيم واااااااجد عورني
حتى كل حين اقولها باقي واجد؟؟ متى بتخلصين؟؟ يعور هااا ..
اخذت فيني تقريبا نص ساعه وهي تخيط وكان يألم يعني بس اول غرزتين ماحسيت فيهم
عقب حسيت بكل وحده وصادني واااااجد خياط ولحين ماطاحت ولا وحده
كل مااتنقع اقوم على امل احصل شي طايح لكن لا حياه لمن تنادي
مو راضي يطيح بس يحرقني وااااااجد ان شاء الله طبيعي

ورد البحرين:
شخبارش صقيقتي؟؟
امم بسألش عن السيم
حاولت اطالع في المنظره مايبين شي لويه؟؟؟
وفي صوب واحد ينخز ويحرق واااااجد طبيعي هذاا؟؟؟

ملاك:
شخبارش خيووو
شخبار السهر وياش ويه حمودي
بالنسبه للرضاعه الحمدالله ان علاوي يرضع زين يعني
اذا اخليه فتره مايرضع صدري يصير جنه حجر انتين بعد جدي؟؟
شخبار السيم وياش؟؟
وين طهرتين حمود وشخباره الحين؟؟

ام حوريه:
هلا يالغلا
شخبارش؟؟؟؟
ستراوي على ملجاوي عشان جدي معاند مو راضي يطلع
بالنسبه للفراشات شوفي دان لاه اسعارها زوينه
وطلبي الشي اللي تبغينه على ذوقش وخليها تفصله ليش

بنوتات علااوي صايدنه ابو صفار
ناس تقول وديه المستشفة وناس تقول المستشفى كل يوم بياخذون منه دم وحاله لا تودينه
اعطيه كله ماي ورضعيه واااجد
الرضاعه مقدور عليها بس الماي مايرضى يشربه يرد يطفره مجنني
والمرضعه مايرضى يشرب منها شسوي وياه؟؟
وابغي عياده زييينه حق التطهييير


وسلامتكم خخخخخخخ

سلاام

بالنسبه الى تجربتي في مستشفى جدحفص
فأليكم التفاصيل

قسم الحمل:
بصراحه تعاملهم فضييع لا يعلى عليه
كل الزامات جربتهم
نهار كانوا معضمهم متدربين وطيبين وااااااااجد
واول ليل هنود وبعد وش حلاوتهم طيبين عدل
كل شوي يجيون يسالونش تبغينن شي محتاجه شي؟؟
يسولفون وياش ويضحكون يعني حبوبين
واني ما اكل مال المستشفى يسالوني ليش ماتاكلين ومادري شنوو
زام اخر ليل ماتعاملت وياهم واجد لان نايمين نكون
بس الخلل في المكان اللي قعدت فيه احنا 4 وحدات في حجره ومافي الا حمام واحد صح كبييييير
ومقسوم نصين قسم السباحه وقسم البتاع الثاني وانتون بكرامه يعني
اذا وحده بتدش تسبح والثانيه تبغي حمام تتوهق
ومكان في تكييف الا واحد ايسي مركزي نفس اللي في البيوت حاطينه صوب سرير
واللي كانت في هالسرير مريضه انفلونزا وماترضى نشغل الايسي
يعني صبابين عرق ولا طول النهار تنااااام وطول الليل تشغل التلفزيون لان صوبها بعد ولا تطول عليه
عبالها في بيتهم قاعده


قسم الولاده:
الا افضحهم دلين
تهاووشت ويه منظفه ويه ممرضه
كنت في جناح اربعه
ودوني 3 الفجر يعني كان زام اول ليل مافي احد و ودني حجره فيها 5 اسره بس مافيها احد غيري بروووحي
استانست اول شي والحمام منفصل واحد سباحه والثاني شسمه
المهم جت ليي مالت اول ليل (( ماشفت الا وحده))
عطتني علاوي تقول رضعيه وعلمتني شلون يازعم وقالت اذا تبغين شي طقي الجرس بتكلم وياش من هناك
واذا خلصتين طقي حبه كنسل قلت لها اوكي
ورضعته ونام واني بعد نمت وياه الساعه 5 وشوي يمكن اوتعيت ابغي اروح الحمام
طقيت جرس ردت تقول شتبغين؟؟؟
قلت لها بروح الحمام الا تقول انزين روحي (( جني باخذ منها اذن يعني))
قلت لها ابغي كوتكس كاعندي اغراض لحين ماجبتهم جت حطته فوق طاوله الاكل ومشت حقرت
جت الصبح عالساعه 8 الا كانت جايه هنديه تاخذ الضغط قلت لها ابغي اتصل لزوجي يجيب اغراضي
تقول روحي برى اتصلي
قمت ابغي احط شي على راسي الا تقول مافي رجال روحي جدي تخيلوو مشيت جدي في الجناح؟؟
طبعا علي ثياب 2 وحده ورى و وحده قدام بس بدون شيله ولا وشي على راسي ولا حافيه بعد وراسي يدور وحاله
واتصلت في زوجي وجى وياي وجي وعقب جت اختي بتسبح الجاهل
راحت ليهم تقول لهم ابغي شامبو بسبح الجاهل الا يقولون لها روحي مكان السباحه شوفي راحت ماحصلت
وحده تقول في الستور والثانيه تقولها في الكبت اخر شي قالوا لها مافي وسبحته بس بماي
وماشفت رقعه وجه وحده منهم
لا يجون ولا يسالون ولا يدرون عنش
لو تموتين انتين و ولدش محد يدري عنش ولا كله يتحجون بنازره باقين حلالهم يمكن؟؟
المهم من القهر قلت لزوجي قولهم يرخصوني اليوم مابقعد راح لهم مارضوا قالوا باجر اوكي
عقب شوي شوي قاموا يجيبون وحده والده لييين انشحنت الحجره
5 اسره على حمام واحد
يوم ثاني قعدت على اصوات وضحك لوووين موصل
الا حضرات الممرضات بسطه وسوالف وضحكهم لوووين ولا يدرون عننا شي
جابوا الريوق قلت لها متى الرخصه قالت بتجي دكتوره ليش ودكتوره للجاهل وبعدين رخصه
وراحت وماشفت وجوهم عقب جت وحده شالت اللي في السر وعلاوي كان موصه لدرجه ملعوز ثياب وهي شافته حتى مااخذته بدلته او
قالت لي ترى موصخ هو كان يصيح يوم اخذته شفته رحت لهم اقولها الجاهل موصخ وماعرف ابدله الا تقول تعلمي
قلت لها ومن قال ليش مابتعلم عبالش كل يوم بجي بطق عليش الباب تعال بدلي ولدي؟؟
سكتت تقول روحي الغرفه بجي بعلمش قلت لها مشكوره مابغيش تعلميني شي خلش في تلفوناتش وعزمي على وفاه ام البنين
اللي بتسوينها في بيتكم على راحتش هذا اذا انقبلت منش انتين جايه تشتغلين او جايه رضع تلفونات وعزايم؟؟
يازعم ممرضات حتى ماتحترمون المرضى صراخكم والضحك لوين موصل ؟؟؟ ومشيت عنهم
وحده وياي في الحجره بدلته ليي
عقب بروح الحمام الا فيه وصخ
طلعت برى الا هناك المنظفه اقولها ابغي حمام ثاني تقول ليش؟؟
اقولها الحمام وصخ تقول نزليه قلت ويع ماطيق الحين جناح وشكبره مافي الا حمام؟؟
ودتني حمام ثاني يازعم
عقب رجعت الا تقول رحت بنظف الحمام ماتنظف اقولها انزين شسوي؟؟
تقول لا بس لان دلاك الحمامات ممنوع يدشونهم قلت لها ليش عليهم حظر يعني
حمامات حالهم حال اللي في الحجر بس لان مافي مرضى صار ممنوع؟؟
و اتصلت لزوجي اقوله الحييين الحييين ابغي اطلع من المستشفى
وجى لي وكملها وياهم هوشه زفهم زفففف كلهم خمدوا وشلت ولدي واني طالعه
قلت ليهم عبالكم معاشكم حلال الحين؟؟
اذا انتون مو قد تشتغلون ممرضات قعدوا في بيتكم ابرك ليكم ومشيت عنهم
حتى اوراق علاوي ماجهزت ولحين مارحنا ليهم

وخلصت القصه

هلا وغلا صبرك ياقلبي
هااا افتكيتين من الكرشه يا سلام بتنامين على بطنش الحين :)
وبتتقلبين على الفراش مثل ما تبين من غير ما يعوقج شئ ولا تحملين
معاج نقله من جهه لجهه خخخخخخ
الله يعينج على السيم ليش ما طلبتين منهم يبنجونج بأبره لان الرش مالهم
بنجه كلش خرطي يعني ما يأثر
توني امس رحت الى عمتي وهي والده قبلج ب3 ايام وتعاني من السيم بعد
تقول انه يألم ويحرق وللحين ما طاح شئ منه بس قالت انها يوم بغوا يخيطونها
قالت لهم بنجوني ما اقدر أتألم على ألم الولاده بعد و عطوها أبره بنج ولا حست
بالخياطه كلش
وعلى معاملة الممرضات اهم شئ أثناء الولاده أنهم يكونون متساعدين
خصوصاً أن انتي بجر والله يستر علينا بعد لاتكون معاملتهم جذي

بل شرشحتينهم يعني اتوقع اذا رحت اولد عندهم بيكونون أفضل تعامل معانا
خخخخخخخخخ الله يغربل بليسج شكلج ملسوووونه ولا تضيعين لج حق
هذا لو اني جان ما تشوفين الا بس دموعي اربع اربع خخخخخخخخ
وبعدين شلون تقول لج تعلمي تبدلين الياهل لايكون عبالها دميه؟
لو يطيح منج في الحمام لو شئ يصيده لا سمح الله بعدين
بيجونج يتراكضون يسوون روحهم خايفين عليه
جان اشتكيتين عليهم عند المسؤولين بالمستشفى علشان لما نروح
احنا يكون الوضع تمام خخخخخ لان مانعرف نهاوش
صراحه الله يعينج صج معامله قرف
ناس يجون ملائكة رحمه بمعنى الكلمه وناس يجون مأساه
عبالهم مخلينهم مدراء على مكتب
الله يستر علينا بالولاده وين نصير وشنو جانسنا
لان عمتي مدحت في تعاملهم وانتي ذميتي فيهم
يمكن على حسب مزاجهم او الي يروق لهم خخخخ
صبرك مو تقطعين القسم الحين لانج وضعتين
ترى نحتاج خبرتج لما بعد الولاده خخخخ

باقي الكروشات يالله نبي حركه ما نبيكم تنامون وايد

هلا والله
أم علاااااااااااوي ... حالش مثل حالي بالظبط تحسين بحراره تحت كأنه شي بيطلع ويرد يروح والنووووم وقعه الحين بعد ماقدر انام عالجنبين صعب واجد انام على ظهري مع انه موزين بس شسوي
الله يهون عليناااااااااااااااا كلنا
يارب