&& ورد البحرين&& :

السلام عليكم بنوتات.. شحوالكم خواتي..؟؟ ان شاءالله زينين؟؟ وشخبار النونوات او البيبيات؟؟ صار لي فترة طويلة ما دخلت النت ولا قريت سوالفكم.. لكن بعد الواحد وش يسوي في الظروف.. اني هالمرة ما طولت القعدة في بيت ابوي وما صار لي 13 يوم الا ورجعت شقتي.. لأنه احس قعدتي هناك زحمة ويا ولدي الكبير.. زايد غياره بصورة غير طبيعية والشي الثاني كان ذابحني على ركبة الدرج.. كل شوي اركب وراه عشان انزله اخاف يطيح ويشلخ راسه.. وزين ما شاءالله عليش يا جافالوف بسرعة اشتريتين اغراض العيد.. صدق افتكيتين من الزحمة.. اني هالمرة ولدي الجديد صغنون فماادري وش باخذ له, وبعد اني انتظر وزني ينزل شوي عشان اعرف وش اشتري لي.. ام حورية: اهلين خيو.. والله يعينش على الثقل لكن توه الناس عليش.. جاينش الخير قدام... الله يسهل عليش ويقومش بالسلامة.. ام علاوي: اهلين خيو شحوالش..؟؟ وشحوال علاوي؟؟ اذا على قلة النوم فكلنا حال وحدة.. تخيليني اني اثنين عندي انيم واحد يقعد الثاني.. البارحة قعدت اصيح اقول وش اسوي في روحي.. ما عليه مردهم بيكبرون وبيعقلون.. عاد عقب ما نشيب :) واذا امش ما تقصر فعطيها شوي الجاهل ونامي ارتاحي على الاقل انتين بكر ما وراش واجد مسؤوليات والدراسة لا تأجلينها ترى واجد اسهل تكملين دراسة والجاهل صغير كلما كبر كلما زادت حاجته لش لأنه يبدي يفهم ان انتين امه وعلاقتكم تكون غير.. اني هديت ولدي وعمره خمسة ايام عشان اكمل دراستي.. والحمدلله ايام وعدت على خير.. صبرك يا قلبي: اهلين ام علاوي نمبر ون.. مسكين علوي عجل طعمتونه فقير ربه.. ما عليه يكبر وينسى.. والسخونه لازم بيسخن بس اهم شي البنادول كل اربع ساعات.. وما يشوف شر النتفة.. ياسمين: اهلين خيو.. الله يسهل عليش ويقومش بالسلامة.. مسكينة ولادتش في شهر رمضان.. يعني بتضطرين تفطرين غير انه الناس محد يزورش في رمضان لأنه فطور وعبادة.. لكن ان شاءالله امورش تتسهل وتتباركين في الشهر الفضيل.. ام معاذ ونور: اهلا فيج ويانا.. ومبروك الحمل.. والله يثبته ويرزقش الذرية الصالحة.. بالنسبة للتلقيح الصناعي.. فكل ناس تمدح دكتور وتذم دكتور.. اللي تحمل عند دكتور اكيد بتمدحه واللي ما تحمل عنده بتذمه.. اهم شي تسألين عن الدكتور كذا شخص وتشوفين من ترتاحين له.. والله يرزق كل المحرومين..

السلام عليكم بنوتات.. شحوالكم خواتي..؟؟ ان شاءالله زينين؟؟ وشخبار النونوات او البيبيات؟؟ صار...

أم حورية :

بنات أم معاذ ونور قصدها أن المراخه حامل من جدي ما تقدر تمرخها عموما أختي أم معاذ ونور إحنا بيتنا في شارع البديع يعني ما أعرف إلا المراخات اللي في شارع البديع وبالنسبة للتلقيح الصناعي ما عندي فكرة إن شاء الله البنات يفيدونك والله يرزقك بالذرية الصالحة ولا يحرمك منها في القريب العاجل

بنات أم معاذ ونور قصدها أن المراخه حامل من جدي ما تقدر تمرخها عموما أختي أم معاذ ونور إحنا بيتنا...