السلام عليكم يا حلوات..

من امس وكنت ناوية ادخل عشان اكتب عن طرق تنظيم نومة البيبي.. اكيد مو نتايجها 100% بس ان شاءالله بتساعدكم..

اول شي تعرفون اسباب بكاء البيبيات....>> جوع, عطش, محتاج تغيير حفاظ, حر او برد, والمغص اللي هو بلوة البلاوي (( ما جبت شي جديد)).. فلما يبدأ الطفل يصيح وقبل ما تبدأين في رضاعته خصوصا في الليل تأكدي من حفاظته واذا محتاج تبديل بدليها وابدأي ارضعيه.. لأنه يمكن ينام وهو ما تبدل فراح يقعد بعد فترة بسيطة وبيتقطع نومكم انتون الاثنين.

الشي الثاني.. اصنعي له روتين حياته.. كل يوم في وقت محدد انتين تختارينه افتحي القماط وخليه يتحرك شوي وجيبي له زيت الاطفال ومسجي جسمه براحة ( اهم شي البطن عشان تحركين الغازات وتخلينها تطلع) وبعدين سبحيه وشوفي النومة اللي راح ينامها.. ام حورية: انتين ان شاءالله بيكون دوامش كله صبح, فخلي تسبوحة الصغنونة العصر لما ترجعين من الدوام وعقب ما تتغدين عشان تصير عندش فرصة تريحين من الشغل وتتقوين حق الليل..

تابع لنفس النقطة: صنع روتين الطفل.. عوديه كل ليلة تاخذينه في وقت محدد لغرفة النوم.. خلي الاضاءة تكون خفيفة (( عشان تساعدينه على تمييز الليل والنهار)) وحاولي تنيمنه حتى لو كان يصيح واجد او شكله مفرفش ما يبى ينام.. اصبري عليه ومع الايام بتشوفين الفرق..

النقطة الثالث: لما الطفل يكون ممغوص..
ارضعيه عشان يشبع.. حاولي تكونين هادئة وياه حتى لو انتين تعبانة واجد.. لا تتوترين ولا تصيحين وياه, كلميه واقرأي عليه آيات قرآنية.. ابطحيه على بطنه وفوق ركبتش وربتي شوي على ظهره ((انتبهوا لرقبته ولتنفسه اهم شي يقدر يتنفس))..
للحين يصيح؟؟
افتحي قماطه وشيليه في ايدش واتمشي به.. منها تحرقين هالشحم ومنها الحركة تحرك الغازات..
للحين يصيح؟؟
الله يخلي سالينال 0.5 مل وكملي رضاعته وشوفي..
اذا نام بسرعة نامي..
للحين يصيح؟؟
يمكن للحين جوعان ويمكن من زود التعب حليبش ما كفاه اتأكدي منه.. حطي صبعش عند بوزه.. اذا جوعان ما ليكم الا الصناعي.. مو جوعان؟؟ الحل؟
الحين يجي دور المصماصة او اللهاية.. وقريت عنها من موقع طبي بالانجليزي انها تساعد الاطفال على انهم يهدأون عند المغص.. وعملية المص جزء من تطور الطفل العقلي والجسدي.. فما في مشكلة لو عطيتينها اياه...

للحين يصيح؟ شكلها خاربة خاربة.. الليلة ما فيها نوم..
ما في الا تاخذينه وتسبحينه عشان يرتاح وينام.. مع اني ما افضل انكم تسوونها لأن الحين الجو حار والمكيفات على طول نشغلهم.. لو مرضوا بتصير البلشة بلشتين..

في الاخير من الاشياء المهم تعرفونها.. ان الطفل اذا كان ممغوص افضل له ان القماط يكون مو ضاغط عليه او ان تتركونه مفتوح شوي عشان تساعدون الطفل انه يتحرك ويطلع الغازات.. والخيط اللي يستخدم في التقميط غير صحي ((ما استخدمته نهائياً))..

حالياً هذا اللي جا على بالي واذا ذكرت شي زيادة بضيفه بعدين..

ام حورية:
تسلمين خيو على الدعوات والله يسمع منش.. وانتين بعد ان شاءالله يوظفونش في مدرسة قريبة منش.. الا ما قلتين ليي بتصيرين مدرسة شنو؟؟
وبالنسبة لكليتنا فالشي اللي صادني متوقعتنه منهم.. لأنه النظام اللي عندنا عسكري.. ما يخرجونا الا واحنا جنود مو ممرضات, بس الشي الزين فيه تتعلمين انش تفصلين بين حياتش وشغلش فالمفروض نكون افضل من ناحية العمل..
واحرجتيني صراحة بكلامش وان شاءالله اكون عند حسن ظنش (( حسيت روحي كبيرة خخخخخخخخخخ))..

ام علاوي:
والله اللي اعرفه ان الدورة عقب الاربعين مو قبل.. بروحي مسائل الاستحاضة واجد تفر راسي ماادري ليش.. وكله احتاط واغتسل شكله فيني وسواس.. بس انتبهي اذا فيش الدورة ما عليش صلاة ولا لش صيام واذا استحاضة لازم تسوين كل شي.. فاسألي مقلدش احسن من ان نفتي عليش..
واذا على كلية العلوم الصحية فهذي نقطة في بحر.. تخيلي يوم امتحاني في الجوب تريينغ المدرسة اللي امتحنتي اول ما شافتني قالت لي اني مااحب اقدم متحان لوحدة حامل.. وكل شوي تقول لي تقدرين تقدمين وهي تمتحني.. واني اطول فترة امتحان قدمتها لي بس عشان تعجزني وترسبني.. لكن الحمدلله اللي خيب املها وكل شي سويته احسن مما يكون ونجحت..

يالله كالمعتاد هذرتي طويلة وما تخلص.. وان شاءالله تستفيدون لو بشي بسيط..

ورد البحرين
مشكوووووووره حبوبه عالنصائح
وبعطيج العافيه خيه

لا خيه في ناس تجيهم الدوره قبل ما يخلصون
النفاس بأيام واني وحده منهم وميزت فعلا انها
دوره لانها شلااااااااال دم بلبله مو طبيعيه
واني كان النفاس ما يجيني الا قليل كلش
وامي بعد يصيدها جذي شكلها وراثه خخخخخخخ

والله ولدي استخدم وياه كل الطرق الي قلتينها
بس ما امسجه بزيت اخاف يمرض اذا ازيته وانيمه
بس ما شاء الله عليه اني اتعب وهو ما يتعب
ماينام واذا ينام بالدقيقه يقعد
الله يعينا

شخبارش انتين مع النونو الصغنون
ينام لو ما ينام؟ متعبنش؟لو الله هادينه

باقي الكروشات والامهات وينكم ياحلوين

شخباركم بنات شخبار بيبياتكم
ام علاوي شكلها الي فيش الدوره واذا بغيتين تتاكدين وانتين بكرامه شمي الالويز اذا اليه ريحه فمعناتها الدوره واذا ينزل الدم تحسين فيه انه قاعد ينزل عكس النفاس ما تحسين ان الدم قاعد ينزل دم الدوره حار تحسين بحرارته واني مثل ما قلت اليش سالت شيخ رائد الستري وقال اذا الدوره منتظمه كل 28 يوم واتحققت وياش شروط دم الدوره تعتبر دوره لكن عقب ما جتني الا بعد عشرة اشهر من الولاده واستانست

ورد البحرين
مشكورة على النصايح الحلوة فعلا الطفل يحتاج إلى الروتين عشان ينتظم نومه وبالنسبة للمساج أني كنت عقب ما اسبحها امسح جسمها بلوشن هالمرة بستخدم زيت وبدلك جسمها براحة وبعدين بسبحها الله يرزقني بطفلة هادئة يارب وأما بالنسبة لخيط القماط بيت عمي يقمطون الجاهل عدل بالخيط يقولون أحسن ويستحمقون عليي إذا شافوا بنتي مو مقمطة بالخيط أني بصراحة عوبة ولا أعرف إلى الخيط أعرف أقمط بالقماط بدون خيط حتى حماتي الصغيرة في الثانوي تعرف اتقمط أحسن مني والله تحيرنا ويا الخيط ناس يقولون التقميط بالخيط يعدل الرجايل وناس يقولون خطير يتلوت على الرقبة أحيانا والله حيرة

علامة تعجب
شخبارك وشخبار زهووور؟ حصلتين ليها ثياب وإلا للحين؟

أم علاااوي
شخبارك وشخبار الكتكوت؟؟ تأكدتين أن اللي فيش دورة وإلا للحين؟؟؟هو فعلا مثل ما قالت علامة تعجب الدورة ؟؟الدورة كرم الله وجهك ليها ريحة وتجي بحرارة وتكسر الظهر بعد

باقي البنات وينكم؟؟
أحس معظم اللي يولدون خلاص ما يدشون الظاهر كلهم انتقلوا إلى قسم صحة وتربية الأطفال صبرك يا قلبي خلاص تكبرت علينا أحب التطريز أكيد ولدت ولا خبرتنا ياسمين وينك؟؟؟؟؟

علامة تعجب
أي خيه طلعت الي فيني الدوره :(
ما مدانا نخلص النفاس الا جت الدوره تركض
يالله الحمدلله اشوى بعد لا تتأخر بعدين ما تدرين
تنصادين وتحملي مره ثانيه وانتين خبر خير عبالج
ان الدوره ما جت للحين :) وبعدين يالهوي تنعاد المعاناه

اني ألحين أطمأنيت انها الدوره الحمدلله
ومثل ما قلتون توفرة الشروط ولاحظت فعلا حرارتها
لانها اذا تنزل حتى مكان الجرح يحرقني شوي مو مثل قبل

المهم شخبارج انتين حبوبه وشخبار بنوتتج؟؟

أم حوريه
اني أقهر عليي ان أهل الزوج يتدخلون بأشياء ماتعنيهم
ومشكله اذا تتضارب الاراء ويبغون يفرضون رايهم على الوحده
اني الحمدلله اهل زوجي كلش مو من هالنوع يعني يعطونج
رايهم بس بالاخير الشئ راجع لج
اني ولدي ما قمطه الا اول الايام بالخيط يمكن بس اول 10 ايام
اذا مو اقل وبعدها بس قمت الفه وهو من غير شئ يتضايق ولا
ينام الا اذا طلع يده
وبعدين اكو الانجليز ما يربطون اولادهم واولادهم بالعافيه احسن
من اولادنا واحسن منا وانتين تشوفينها بالسوبرماركت او اي مكان
مدلدله الياهل مسكين وهو يتمويل من جهه لجهه ولافيه الا العافيه

اي خيه الي فيني الدوره قمت احط بالي لكلامكم طلع صح
اني قبل ما احط بالي خخخخخ حتى كنت اقول لأمي احس
اذا ينزل دم يحرقني مكان الخياط الا الظاهر من حرارته

شخبارج وماقلتين لنا بتصيرين مدرسة شنو؟؟
وان شاء الله اذا وظفوش قريب تقولين لينا في أي مدرسه
علشان يمكن تدرسين عيالنا وتتحملين فيهم خخخخخخخ
بعدين ما بيصير عندج وقت لنا كلش ولا بنشوفش هني
ويمكن بعد من الناس الي تتكبر تقولين اني مدرسه ويش
الي يخليني اتابع هالعاطلين ههههههههههاي
حاشاج ما اظنج جذي والله يستر :)