سلام عليكم بنات شخباركم وشخبار بيبياتكم
اني الحمد لله وبنوتيي بعد زينه
ام حورية شخبارش خيه عساش بخير والله يختي الى الحين ما حصلت اثياب والله شكلي الى ليلة العيد واني اتقضى خيو بسألش مواليد كم انتين؟
ورد شخبارش وشخبار العيال الله يخليهم ليش ان شاء الله خيه ما زعلت لازم كل واحد يتقبل من الثاني عادي خيه وشكرا على دعوتش الحلوه الله يجازيش بالجنه ان شاء الله
ام علاوي لا شكر على واجب كلنا خوات بالنسبه الى اذن علاوي حاسبي اليها لاتصير اذن غير عن الثانيه وحاولي تقلبنه كل ساعة على اتجاه علشان لا يتعود على جهة وحدة

صباح الخير..

البارحة شلت الجهال وطلعنا نتعشى برى.. صدق كان بيجيني اكتئاب من قعدة البيت وان الكل مشغول بخطوبات او زواجات ومحد يزورني.. ورجعنا وقلت الحين علوي اكيد بينام من حركة السيارة لكن الزمن قال صبري الليلة ما في نوم خخخخخخخخخ.. وطل الليل وهو يصيح وكان سالينال مخلص من عندي وزوجي اشترى من الصيدلية نوعية ثانية يا زعم راعي الصيدلية مدحها وقال احسن من سالينال لكن الله وكيلكم ما اثرت فيه كلش.. ومسكين يتثاوب يبى ينام وما في فايدة.. ما نمت الا اربع الصبح وقعدت الساعة سبع على صوت زوجي يقول لي منيمتنه على ذراعش لو فطستينه وانتين نايمة!! خخخخخخخخخخخ من التعب ما حسيت

ام علاوي:
لا تخافين ولا شي خيو.. بس حطي بالش للجاهل.. هالفترة تقدرين تعدلين راسه واذاينه من دون ما يتأذى لأنه عظمه طري.. بس عادلي نومته ولا تخلينه على كيفه واتأكدي ان شكل راسه عدل ومتساوي اليمين مثل اليسار.. واذنه براحة حاولي تعدلينها ومع الايام بتتعدل.. ولدي العود اول ما جبته كانو شوي اذاينه طافرين وقمت البسه قحافي وشغلات على اذونه والحين الحمدلله كشخة.. والجديد اول ما ولدته كانت وحدة من اذاينه شوي على قولتش متكرمشة وكل ما ارضعه احاول اعدلها براحة والحين كلش تمام.. خليه الحين يتضايق ولا باجر يكبر ويلومش..

ام حورية:
والله زين طلعتين نفسي من عشاق التكشخ.. وتوني ادري ان المدرسة ثلاث اشهر ما يعطونها معاش.. لكن عادي اللي يشتغل من صوب الحكومة لازم جذي.. اني الحين من متى مخلصة تدريب؟؟ للحين ما استلمت باقي فلوس التدريب واذا اشتغلنا بيعطونا الراتب متأخر((بس في نفس الشهر)) غير علاوة الشفتات ما ينزلونها ستة اشهر بعدين تنزل بأثر رجعي..
وعلى قولتش ما تسوى تفصلين لش ثياب وكلها ايام وتولدين,, الله يقومش بالسلامة وتكشخين ويا الصغنونة..

علامة تعجب:
الحمدلله اني وياهم زينين.. واهم شي انش ما زعلتين علينا فالحين اني مرتاحة..
وتحركي على روحش وخلصي ثياب العيد لأن الجهال صعب التشري وياهم في الزحمة.. مشكورة على الدعوة ولش المثل..

ورد البحرين
الله يعينك على السهر ويعين كل الأمهات ويعطيك الصحة والعافيه

علامة تعجب
ياهلا وسهلا فيك أني أحب اروح سيتي سنتر لأنه محلات الأطفال كلها يم بعض أحيانا فيها ثياب حلوة وأحيانا كل المحلات خمام وثيابهم ملحة وباهته بس شكل ذوقك صعب
خاطري أعرف ليش تسألين أني من مواليد أي سنة؟ عموما حبابة أني عجوز من مواليد 82

ام حورية طلعت اكبر منش اني من مواليد 7/11/1981 بس حبيت استفسر اتوقعتش كبري لان اني اخدت الدبلوم وانخطبت وقعدت عن الدراسة وتميت في فترة الخطوبه سنتين ونص ومباشره حملت وانتين قلتين انش صار اليش اربع سنوات تنتظرين الوظيفه فقدت احسب اتوقعتش قدي بس طلعت اعجز منش بالنسبة الى ذوقي مو صعب بلعكس واني اتسوق في السعودية اقول عفر صار ذوقي صعب اني احب الاشياء الناعمه واحب البس بتي يوم العيد فستان وماحصلت في السعودية الشي الى ابغاه وعن سيتي سنتر ما احب اروح لان يضيع ويفر الدماغ واخاف بتي اتضيع مني

ام علاوي وينش ياعسل ماتبينين مختفيه اليوم من اي منطقه في سترة متزوجه ؟

ورد البحرين شخبارش وشخبار العيال والله ياختي انتظر ابو زهراء يتحرك علشان اتشرى هالايام اتشرى الى بتي حق الروضة وتقريبا خلصت باقي بس ملابس الرياضة وافتك وبعدين بدور الى ملابس العيد الله يبلغنا وياكم شهر رمضان ويبلغنا عيد الفطر ان شاء الله

مبارك عليكم الشهر جميعا وعساكم من عواده

هلا أختي علامة تعجب
خلاص عجزنا شهر 9 بدش 28 ويش باقي عن الثلاثين كل صغير يكبر الحمدلله .بالنسبة للفساتين روحي Lili put اللي في كونتري مول في شارع البديع صراحة ثياهم حلوة وألوانهم زاهية أختي كله تشتري من عندهم أشوفها تمدح فيهم وتقول نوعية قماشهم ما تتغير وكأنه عندهم فرع ثاني في مجمع العلوي اللي في سند والحين عندهم تخفيضات 50% صراحة فرصة

إي ما قلت لكم بنات اليوم رحت موعدي في المركز عند الدكتورة وقامت تسمع دقات القلب إلا تقول ليي فيش صبي قلت ليها بس في الألترا ساوند قالوا ليي بنية قالت الله العالم الصراحة شككتني وحيرتني خصوصا أني كنت مسوية الألترا ساوند عند فهيمة المطوع من وقت كلش كنت في نهاية الثالث تقريبا ولما سويت ألترا ساوند في مركز النعيم قالت ليي أغلب الظن بنية والله حيرة ماأدري أرد أسوي ألترا ساوند عشان أتأكد وإلا أخليه على الله