بنات الرياض شوفو شصار لي في صالون e'sense

بنات لأنكم تهموني ماأبيكم تغلطون غلطتي ..توقعت ان الكوافيرات الإنجليز أفضل أخذت موعد عند نتالي اللي في مركز المملكه( E’sense ) اللي في الدور النسائى . إهتمت بالمعلومات الشخصيه- الاسم- نوع السكن- تاريخ الميلاد –ارقام التيليفونات حتى الإيميل .وطبعاً رقم الموبايل أخذوه مني وقت الحجز .
أنا شعري كان وأقول كان حسبي الله عليهم بني غامق حبيت أفتح شعري وأسوي هاي لايت
واخترت اللون بني وسط والهايلايت بني فاتح جداً ....اتفقنا إني مابي أحمر أو أشقر اللي اسمها نتالي
حطت على شعري كريم أبيض وريحته مثل المشقر يعني كانت تسحب اللون مو تلون احتيال وسرقه
صار شعري أحمر مابي أطول عليكم ..الخصل اللي طلبت انها تكون بنيه صار لونها برتقالي قالت لي إن اللون عاجبها وطالع حلو !!!!!!! قلت أنا طلبت بني فاتح وهذا أورنج .....قالت لأ هذا كراميل !!!! وحطت على شعري صبغه غامقه وتركتني 20 دقيقه.............المفاجأه شعري صار أسود ومافيه أي خصل ......
انتهى الموضوع و دفعوني 945 ريال - 190 ريال كانت لقص أطراف الشعر والباقي صبغه وهاي لايت الحراميه اللي ماعندهم ضمير ثمن الصبغه الغامقه حسبوها علي .
طبعاً أنا أعترضت وطلبت أي أحد مسؤل بس الوقحه اللي في الرسبشن (مصريه اعتقد اسمها فطمه ) كانت تردح وتقولي بنت مين إنتي .....تخيلو الموقف دفعت ولانزلت مستواي اللي إسمها نتالي تقولي تعالي بكره الصبح أفتح الخصل..
طبعاً أكيد تبي تنهب ماكفاها اللي خذته .......

بنات في شي بعد ... لما أعترضت على اللون نتالي تركتني وراحت ماأدري وين بس جت مره ثانيه وانحنت على الطاوله تكلم المصريه وكانت لابسه بنطلون خصره نازل شفت تاتو كبير جداً وبالوان كثيره وكانت الرسمه تحت بعد وبصراحه هذا خوفني اكثر ....
ثاني يوم رحت لفاشن الحمد لله فتحو شعري وسولي هايلايت وتريتمنت للشعر و أخذت أمبولات للشعر المصبوغ وشامبو وكوندشنر كل هذا ب520 ريال و المهم شعري لونه حلو بس مو اللي في بالي بس كثر خيرهم جايتهم وشعري نكته ..

المهم يابنات لاتعطون معلومات عنكم أبداً شدخل لون شعري باسم عايلتي وأرقامي وإيميلي وتاريخ ميلادي
وهي تصبغ لي سألتني إذا كنت متزوجه ......ان شاء الله مايكون الموضوع فيه تصوير..كل هذا بسبب التاتو
وطريقة المصريه في الردح مو بسبب الخطأ اللي صار .

مع السلامه بنات ..... باي