بنات الشرقية تجربتي مع مشغل شارمن

كيفكم يا دلوعات الشرقية

اتمنى يكون الجميع بخير وصحة وعافيه ....
المهم يا بنات كان عندي مناسبة يوم الخميس الماضي .. وفكرت وين أروح أي مشغل وترددت بين شعاع ومودا مودا بعد مدح وحدة من العضوات للمشغل وشارمن

رحت الأربعاء بحجز مريت على شعاع قالت لي (فل) ما في إمكانية إلا للشعر ولازم تجين بدري على الساعة 11

طلعت منها ورحت أدور على شارمن دخلت عندها وقالت لي العكس المكياج فيه مجال والشعر لا بعدين قالت عادي بس تعالي بدري وقالت ادفعي عربون رفضت وطلعت لأني كنت مترددة وهذه أول مرة لي اجرب المشغل والمناسبة مهمة لي

رحت البيت وفرفرت بالنت وسويت بحث شارمن وفتوح الفهد وشفت معظم الآراء تأيد تجربة المشغل وقررت أجربه


جاء بكرة ورحت على الساعة 2 دخلت ودفعت ما كان فيه زحمة بالمرة على طول دخلوني استشوار وبعدين ويفي وبعدين أساس الميك أب وبعده تكملة التسريحة وآخر شيءالميك أب ثم التشييك النهائي على التسريحة

طبعاً أنا سويت شعري ويفي مفتوح ورأيي في المشغل

1- احترام الزبونة وهذه الصفة نفتقدها في معظم مشاغل المنطقة الشرقية 9من 10
2- السرعة وعدم التأخير 8من 10 ونقصتها ليه لأن فتوح الفهد اللي تحط مكياج جات متأخرة شوي وبدت في وحدة بعدين راحت تستشور شعرها والزباين تنتظرها وهذه نقطة سلبية تحسب عليها مع انها ما تأخرت بس اخرت العروسة اللي هي آخر وحدة
3- الشكل النهائي للتسريحة (تسريحتي وتسريحة البنات الموجودات ) 10 من 10
4- المكياج من وجهه نظري مكياجها أوفر يعني ثقيل وأنا عطيتها رسمة مكياج ألوانه هادية جداً وقلت لها أبي مكياج كذا يعتمد على اللمعة البسيطة بس هي خففت من مكياجي عن مكياج البنات الموجودات لكن الألوان اللي حطتها واضحة مثل الفوشي والأسود ولا أخفيكم مكياج طلع جنان مرة حلو وكل اللي شافوني عجبهم اللوك بس ما كان المكياج اللي في بالي واللي ما شفته بمشاغل الشرقية .. عموما هي فنانة وتسألك وش تبين بس عيبها ألوانها مره قوية وأنا كان ودي بالألوان الفاتحة اللماعة بلمعة بسيطة ماركة وما شفت هالشيء عندها مكياجي أعطيه 8 من 10
لكن مكياج البنات اللي في المشغل أعطيه 6 من 10 لكثرة الألوان ووضوحها



اللوك النهائي لي 8 من 10
المشغل حلو ولا ياخذون ناس زحمة انصح بتجربته خصوصا للتسريحات روعة ما عليها كلام أما المكياج الله يعينكم لازم تعطونها التعليمات ووش تحبون ووش تكرهون

هذه تجربتي عرضتها للفائدة اتنمى تسامحوني على ما تجدوه من خلل .. والسلام عليكم ورحمة الله وبركاته