بنات القصيم انتبهن لاتشترون وحدة سكنيةآآآه يالقهر

بسم الله الرحمن الرحيم

حنا قبل سنة اشترينا وحدة سكنية اللي هي عبارة عن غرفتين وصالة ومطبخ و3حمامات ومجلس ويكون لها حوش قد السيارة ومدخل خاص وتكون اربع وحدات مع بعض ثنتين فوق وثنتين تحت كل وحده بمدخل خاص ان شاء الله عرفتوهن

المهم أخذناها بشهر 4 العام أخذنا اللي فوق وكانت جديدة حنا أول من سكن فيها طبعا بعد ماسكناها اكتشفنا الغش والتلاعب حسبي الله ونعم الوكيل
أغلب أفياش المكيفات والسخانات غيرناها لأنه حاط أرخص وأحقر شي المكيف فجأة يطفى ويطلع السبب بالفيش

مررة بغينا نحترق والسبب فيش السخانة من رداه ذاب وبدأ يطلع دخان وكنت بنام بالليل قلت خليني أشيك على السخانات أقفلها لأني أخاف منها ويوم دخلت الحمام ولقيت الدخان وعلى طول سحبت السلك الحمدلله من قبل ومن بعد
حاط لمبات داخلية بديكور السقف من نولعهن الا نشم ريحة مثل ريحة الأسلاك المحترقة صرت ماأشغلها ونبهت على عيالي مايشغلوها

السباكة آآآآآآآآآه من السباكة تخيلوا صنابير الماء ودش الحمامات من أردى شي لدرجة الماء بالحسر يصب اضطرينا نغير كل الحنفيات لجديدة أصلية

المغاسل أحقر شي وقبل كم يوم مغسلتنا ماتصب يوم بحثت عن السبب لقيت اللي أو الهوز اللي يكون تحت يكون منه اثنين واحد للحار وواحد للبارد اللي لونهن فضي يوصلن الماء للصنابير لأنه ردئ تآكل من داخل وأصدأ وصار الماء ينحبس مايطلع

الشبابيك اللي بالدرج بالشتاء يخرن ماء اذا جاء مطر

الكارثة هنا
في الشتاء اللي فات كنت عند أهلي وزوجي يقول انه كان طالع من غرفتنا وأول ماحط رجله بالسيب يقول فجأءة السيراميك ارتفع وانتفخ يقول ارتعبت أنتظر شي يطلع لي من تحت الأرض وتكسر كله واضطرينا نسرمك اللي تكسر وتعب زوجي على مالقى نفس نوعية السيراميك

واللي خلان اكتب هالموضوع اني وأنا رايحة للحمام تو صار لي مثل ماصار لزوجي بسم الله بغيت أموت من الرعب وكنت لحالي تخيلن وطيت على السيراميك الا الارض تحتي ترتفع أنا من الرعب تجمدت ماادري زلزال ماأدري انا جان شي خلان أفقد توازني وقعدت ساعة أسمي يوم هديت الا السيراميك مرتفع عن الارض وتحته فراغ :ohmy:

حسبي الله عليه اللي باعنا البيت أخذ حقه كامل وحنا لعب علينا أغلبهن من برا شكل ومن جوا يعلم الله

انتبهن لاتشترون الا من واحد ثقة ونبهوا على أي أحد بيشتري من هالأشكال واللي داخلة من الايباد ياليت تنسخ الموضوع وتنشره عشان ينردعون هالغشاشين وتقعد خراباتهم الله لايسامح أمثال من باعنا البيت الله لايربحه .

انشروا الموضوع يابنات قبل لايخسر أحد غيرنا