بنات الكويت و كل اللي زاروا الكويت ... تعاااالوا

السلام عليكم حبيباتي كيفكم ؟

يعلم الله شكثر أحب الكويت من صغري والله و أنا أمنيتي أزروها و الحمدلله الأربعاء ان شاءالله رايحين الكويت في رحلة قصيرة لمدة يومين تقريبا ...

ودي تساعدوووووني و أعرف ما راح تقصروووون ... مثل عادتكم ...

مثل ما قلت لكم السفرة مررررة قصيرة و أنا مرررة خايفة ما ألحق أروح مكان أو اتأسف اني ما مداني اروح مكان معين ... ياليت تساعدوني ...

رحت موقع العرب المسافرون و استفدت كثير من المعلومات و سويت اشتراك عشان أحط اسئلتي لكن بعده الاشتراك غير مفعل ... قلت مالي غير خواتي بنات حواااااااء ..

علشان أختصر لكم الطريق ... راح اقولكم شوية معلومات راح تساعدكم في ردكم علي

طبعا احنا عيلة , أنا و زوجي و ولدي 6 سنين و ولدي الصغير 9 شهور

راح نكون في الكويت ان شاءالله على العصر يوم الاربعاء لكن أكد راح نرتاح شوي في الفندق لأن الرحلة حتكون برية و حنكون تعبانين ... يعني راح نبتدي نطلع من الفندق بعد المغرب تقريبا ..
و الرجعة ان شاءالله راح نحرك من الكويت على المغرب يوم الجمعة ... يعني الرحلة يومين بالضبط ..

و راح نسكن في فندق النخيل palms في البدع

سؤالي الأول
أنا أعرف مجمعات الكويت و من اللي قريته ان الأحلى هو سوق شرق - الكوت - الافينوز - مارينا و بعضهم على البحر
بس أكيد ما راح يكون فيه وقت اروحهم اربعتهم ... ياليت تحددون لي أحلى اثنين فيهم مع عناوينهم بالضبط و الاقرب لمنطقة الفندق ما ودنا نضيع وقت في الدوارة ... و على فكرة أنا ودي أتسوق بعد ما يصير ما أتسوق .. بس مو ضروري يعني ودي يكون المجمع حلووو و فيه قعدات حلوووة و رايقة على البحر مثلا و مطاعم تستاهل و ألعاب حلوووة لولدي ...

سؤالي الثاني
المركز العلمي متى اروح له أي حزة ؟؟ و متى تنصحوني أروح له خلال هاليومين اللي بروحهم و كم يستغرق وقت ؟؟ و كم اسعار التذاكر ؟؟

سؤالي الثالث
ولدي خاطره يحضر مسرحية ... ايش المسرحيات الموجودة حاليا ؟؟ و عناوينها ؟؟ و اي حزة يعرضونها يعني فيه مثلا عرضين العصر و الليل ولا بس الليل ؟؟ و اسعار التذاكر و ياليت رقم التلفون ؟؟ ""أدري مصختها"!!!

سؤالي الرابع
صالون ديسانج وين يصير ؟؟؟ ياليت العنوان بالضبط الله يعافيكم

سؤالي الخامس
أبراج الكويت ... حلمي من الطفولة اروحهم ... تنصحوني أروح ؟؟ و هل فيها مطاعم فوق تسوى ؟؟

سؤالي السادس
ايش أحسن مدينة العاب ؟؟ و اقربها للمنطقة الحية اللي فيها كل شي ؟؟ الترفيهية ولا الشعب ولا حولي ولا ايش ؟؟

وآخر شي مستحية منكم بس مالي غيركم ... انتوا الحين عرفتوا وين أبغى اروح ياليت تسوون لي جدول بالأماكن و الأوقات اللي ينراح فيها ... لأني خايفة هاليومين يطيروا بدون فايدة خاصة معانا أطفال و حركتنا بتكون بطيئة و أنا بصراحة ودي أستانس لأني مو مصدقة اني باروح الكويت أخيراااااا ... يا حبي لكم

على فكرة أنا عيد ميلادي يوم 25 فبراير والله العظيم !! و أمي تقول من يوم أنا عمري 8 شهور أحب أسمع السلام الوطني حق الكويت لما ينتهي ارسال تلفزيون الكويت .... هاه ؟؟ أستاهل المساعدة ؟؟

أنتظر ردود بنات الكويت و كل وحدة عندها فكرة ياليت تساعدني و لها مني دعوة من القلب و ألف شكر مقدما ...