بنات اللي تبي تحمل تجي وتشوف وش صار لي وان شاء الله بتحملون

السلام عليكم ورحمة الله وبركاته

والله يابنات ترددت كثير اني اكتب لكم موضوعي هذا بس قلت حرام خل البنات يعرفون ان الحمل بيد الله سبحانه مو بيد الاطباء والحريم اللي يمسدون((يمرخون))

وهذي قصتي واتمنى تستفيدون

طبعا الكل او معظمكم يعرف اني لي 5 سنين وانا متزوجه وما حملت الا مرة بعد زواجي بكم شهر ثم اجهضت في شهرين وبعدها صارت الهرمونات متلخبطة لدرجة ان الدورة ماتجي الا كل 4 شهور!!

وكنت اتعالج بالكلوميد وغيره ومافي فائده لدرجة ان الدكاترة قالوا مالك الا الحقن المجهري لان المبايض عندك ماعاد تستجيب للمنشطات!!

توكلت على الله وتركت كل شئ من ادوية وغيرها رميتها بالزباله((الله يكرمكم))هذا الكلام في شهر جماد الثاني..

وفتحت المنتدى على موضوع حلي مشاكلك بقراءة سورة البقرة

وجزى الله كاتبته كل خير

وتشجعت مع البنات وختمتها يمكن 15 مرة في 15 يوم بس!!وفي رمضان صرت اشغلها بالمسجل اسمعها بس عشان الشغل برمضان ماينتهي:44:

وصرت اكثر من الاستغفار وخصصت صندوق عندي للصدقات كل مالقيت ريال والا نص ريال طايح حطيته فيه

ولا افتحه الا بعد مده وارسلها للمستحقين

واكثرت من الدعاء((ربي لاتذرني فردا وانت خير الوارثين))

ورحت عمرة وشربت من زمزم وتذكرت ان ماء زمزم فيه شفاء

واخذت كاسة المويه ووقفت امام باب الكعبة في الدور الثاني بس اهم شئ اني واجهت الباب وصرت اشرب شوي شوي وادعي يااااااااااااااااارب ترزقني الذرية عاجلا غير اجل وكنت ادعي لنفسي بالشفاء واحط يدي على بطني واقرأ وانفث واشرب وادعي وهكذا

وصليت ركعتين ودعيت في السجود بحرقة المحرومة الفقيرة لله

وبعدها في شوال رحت لشيخ وقرأ علي وعطاني ماء مقري عليه استعملته اسبوعين بس

وفي اخر ذو القعده يابنات نويت الحج قلت بروح احج وادعي لنفسي

وانا رايحة اتطعم للحج حللت ولقيت نفسي حامل والحمدلله رب العالمين اللي رزقني بلا حول مني ولا قوة

كل مافي الموضوع يابنات اني رجعت لله بالدعاء الصادق من القلب وهجرت الغناء والافلام والمحرمات واحتسبت هذا عند الله

مع ان الاطباء قالوا خلاص مافي امل

الا ان الله رحمته فوق كل شئ

نصيحيتي يابنات ارجعوا لله وبطلوا الاعتقاد بالمخلوقين لان الله اللي بيده كل شئ اذا اراد شيئا ان يقول له كن فيكون

بس اتمنى انكم تدعوا لي ان ربي يطمني على حملي ويثبته لي

وانا بادعيلكم بالذرية الصالحة ان شاء الله

والسلام عليكم