بنات اللي متزاعله مع زوجها وعند اهلها اوسبق حصل معها هالشي تجي تشاركنا بتجربتها

السلام عليكم ورحمة الله وبركاته بدايه::27:
ابدى المشوار بقصتي , طبعن انا متزوجه لي تقريبن 11 شهر ولي بنت صغيرونه عمرها اسبوعين , انا الحين عند اهلي لي تقريبن شهرين وزوجي لما الحين ماهو سائل عن هوا داري بيني وبينكم مادري شترسي عليه بس سبب الخلاف اني ابي سكن مستقل عن اهله وهو يقول ان امكانياته ماتسمح له طبعن قلت له انا معك على الحلوه والمره ودقيت له صدري واتفقنا انو يدور شقه ,دور شقه وحصلها وجا لابوه وامه عشان يشوفونها الابو قال وش حاجتي بها (غريبه موب ولدك تدعمه لو نفسيا) والام حرمت انها تطبها جاني ابو الشباب زعلان ومطنطن (انتي السبب جننتيني لولاك ماصار كذا مع العلم يابنات انو هو كل شوي يقول بطلع ابي اطلع ) المهم سكت ولارديت عليه ومن بكره راح داوم ورجع حطيت له اكله وانا ساااااااكته ولاكلمته ونام جاب بالليل صحيته عشان ابي اغراض من بنده لما صحا وداني وقعدد يقلبني وش فيك وش فيك تكفين قولي قلت له كلامك اللي امس ياخي اذا انت مانت مقتنع بالموضوع ليش تمشي فيه اساسا ريحني ومن البدايه لاتفتحه قال زين ولايكون لك هم خلاص هالمره انا معزم اني استاجرها.,رحت وبعت ذهبي وعلى اساس اخر الاسبوع يعطيهم العربون ويبدا يأثث وخلال هالاسبوع تحملت انواع الكلام من اهله ليش وش جاري عليها وامه تقول ماعندها غير النوم ماحدن جايرن عليها قلت يابنت اسمعي كلام زوجك وطنشي ,مر الاسبوع بما فيه من كلام يسم البدن وحركات من اهله كلهم دون استثنا حتى حسيت اني منبوذه تماما ,جا ابو الشباب اخذ مني مبلغ وبعد نص ساعه رجع وهو يقول :انا عارف ان هذا حق من حقوقك بس مااقدر اطلع واهلي ماهم راضين وامي تقول شلون تستاجر بالقيمه الفلانيه واخوانك ثلاجتهم فاضيه (للعلم اهله انواع البذخ بالاكل مايمر اسبوع الا وعزيمه للحريم بالبيت تقولون ديوانية حاتم طي )وبعدين الديانه اللي يطالبون ابوي بيقولون هذا فسقان قلت له طيب وحتى بعدين لو راحو الديانه مانت بطالع قال وحتى بعدين اذا ماهم راضين ماني طالع لو اقعد عمري كله قلت انتم نصابين كل هالوقت وابوك يقول عادي ماعندي اي مانع تطلعون وكذا امك ويوم جا الصدق انسحبتوا كلكم نصابين وبيت اهلك ماني بساكنه فيه (للعلم انا ساكنه بغرفه بس وغرفتي طوالي اللي بصالتهم كاشفها وعندهم اخوانه كبار وفيهم متزوجين والحريم اربع وعشرين ساعه متنقعين عندنا يعني صراحه سجن بس بدون دورة مياه) :44:
نستأنف قصتي مد علي التلفون وقال يله اتصلي على اللي ترضينه من اخوانك اتصلت على اخوي الكبير وقلت له القصه وقلت له ابيك تصير حكم بيننا لاتميل لي ولاله شوي دق اخوي على زوجي واسمع زوجي ينافخ وحالته حاله اقول له اقصر صوتك ولا كني احكي ماهمه تقل بيعلم اهله كلهم بالسالفه ,بعدها سكر وقال ضبي اغراضك تراه يقول بجي اخذها عندي تستريح ضبيت اغراضي بالشناط ,جا اخوي وجلسنا انا وزوجي معه جيت بسولف قسم بالله خنقتني العبره وقعدت ابكي :icon33:وقصيت قصتي عليه ,قعد زوجي ينافخ انتي اللي جننتيني لولاك ماني بطالع انتي غصبتيني (مره ثانيه رد على مواله) كلمه مني وكلمه منه وكل مارفعت صوتي قال لي( لو يدري ابوي كان يشوتني بالنعول) قلت له اهلك فيهم تصرفات (هنا بس قلت اهلك ضرب الارض بيده وقال بجيب شناطك خلك تروحين مع اخوك لاما يطيح اللي براسك ) قلت له لاتسحب شناطي قدام اهلك مابي امشي(كانت خالته كالعاده مسنتره بالحوش مع امه ) رد علي قال لا بتمشين جاب الشناط وشالهن بالسياره قلت له جيب عباتي وشنطتي عصب قمت وجبتهن وركبت السياره المهم لاما ركبت السياره قعد يدعي علي الله لايوفقك الله لايريحك وهو يرتجف واخوي تعبان مواصل وبيسافر قال لي زوجي بعد ماركبت اذا فيك واحد بالميه عقل انزلي(لما شاف حالت اخوي) جيت بنزل طلع باب السياره مايفتح.
مشينا وجيت عند اهلي وعلمتهم بالخبر , واتصل علي زوجي ها اجيك ترجعين قلت ماارجع الا تفاهم مع رجال يمسك لي حقي ,قال احد يمسك لك حقك مني!!!!!!!!!, قلت الله يحيك بس مااظمن اني برجع وهذا شرطي,بعدها بمده جاني اخوي الكبير وقال لي انه يبي يجي بس ابوه وامه خايف انهم يزعلون ؟؟؟؟ انا مادري هو انا متزوجتهم ياناس والله حرام عليهم ذبحوني بتدخلاتهم بكل شي .
مرت الايام وكنت بشهري الاخير من الحمل وهو يحاول يتصل بس ماارد عليه ويرسل رسايل كلام حلو لكن ماعطيته وجه لانو مصر ان الخطا خطاي واني انا اللي طلعت ماهو هو اللي مطلعني ويبيني ارجع اعيش بهالغرفه انواع النفسيات (قسم بالله حرام عليه ) ,اخر شي قلت بالحرف الواحد هذولا اخواني كاني اخطيت عليك قل لهم يادبوني وانا راضيه باللي يصير والا تبينا نتفاهم تفاهم معهم عشان تحل المشكله قال لي اشوف اخرتها معك ومن هاك اليوم ماعاد يسأل .له الحين قرابت الشهر مطنش ومع اني ولدت ماعبرني لاهو ولا اهله (مع العلم ان ابوه خالي ماكلف نفسه ورفع سماعة التلفون يسأل امي بنتك وشفيها,لا وازيدكم من الشعر بيت اخوي لما جا يسلم عليهقال له انا مادريت غير الصبح قالوا دقت على اخوها واخذها وبعد قال له اختك انثى فاهمه كان بترجع لزوجها ترجع كان بتقعد عند اهلها بكيفها ,قال له اخوي اختي اللي يبي يفتح موضوعها يجي لبيت اهلها ويتكلم معي به ومشى وخلاه .


بالختام اسأل الله ان يفرج لي ولكل مسلمه بفرج قريب عاجل ويهدي زوجي وينير بصيرته لأني بصراحه احس امه وابوه مجرمين بحقي وحقه من عدة نواحي استغلاله ماليا يسدد ديونهم واكلتها انا لامصروف زي الناس ولابيت وثاني شي تدخلهم بموضوعي ومنعهم له من المجيء لاهلي عشان يحل موضوعي بالاضافه الى تدخلتهم من قبل بيني وبينه ومحاولة زرع الاستئساد على الحرمه في ولدهم (فحسبي الله ونعم الوكيل وانا لله وانا اليه راجعون اللهم اجرني في مصيبتي واخلفني خير منها ).