اول شي ما اعطوني ابر مسكنة بعد العملية الا مرة وحدة في الافاقة و بعد ما طلعت فوق صاروا يعطوني حبوب لا تسمن و لا تغني من جوع
ابر المضاد جاتني الممرضة في الليل و انا نايمة قاست الحراة و الضغط و نست الابرة عالسرير شافتها امي في الصباح و نادتها على اساس تجيب غيرها تقول خلاص اهم شي تسجل في الملف انها اخذتها!!

بنتي احتاجت الحضانة و الحضانة في الدور الثالث و انا في الدور الثاني طبعا عارفين سياسة الابواب المقفلة اخذ لي ساعة زمن عشان اوصل للحضانة نقعد نوقف عند كل باب لين يمر احد من العمال او العاملات عشان يفتح عاد انت و حظك متى يمر احد يفتح خصوصا بالليل طبعا امشي على رجولي كراسي اطلب تقولي مافي الا لو تعطي عاملة النظافة فلوس سبحان الله تطلع الكراسي المتحركة من تحت الارض

الدكتورة الي سوت العملية ما شفت وجهها جاتني دكتورة ثانية ماشا الله كل شي تمام سألتها خياطة و لا كبس قالت خياطة بس الخيوط تذوب بعد شهر قلنا الحمد لله و كتبت خروج

جا زوجي يطلعني و سوا اوراق الخروج
وين الادوية مافي ادوية ما يحتاج الدكتورة ما كتبت قلت له يرجع تأكد و رجع تأكد لا كتبت ادوية و لا موعد مراجعة

طبعا ما صدقت لاني مجربة قبلها العملية و عارفة انو لازم ادوية و مرينا صيدلية و اخذنا مضاد و مسكن و مرهم للجرح

بعد اسبوعين و الخيوط زي ماهي و بديت اتضايق منها احس جسمي مو متحملها رحت مستوصف قالت الخيوط لازم تنفك و الحمد لله لحقتي نفسك و جيتي قبل لا يبني عليها الجلد و فكيت الخيوط

غير طبعا الغرف المشتركة و الازعاج

هذي تجربتي قبل ثلاث سنوات و ارجع اقول الاغلب يمدح فيه و من ضمنهم اختي و حريم اخواني يمدحوا فيه و يقولوا جدا ممتاز و لا يفكروا يولدوا بمكان ثاني

اما انا حظي فيه كان مش و لا بد

و الله يكتب الي فيه الخير للجميع