بنات انا بهم ما يعلم به الا الله وهو مرض الوالده الله يشفيها

الملتقى العام

السلام عليكم ورحمة الله وبركاته
اخواتي الطيبات انا عندي الوالده الله يشفيها مريضه بمرض خطير
وهوالكبد الفيروسي اخطر نوع وهو معروف مرض قاتل يسبب تليف بالكبد
اللي بالنهايه يحتاج الى عمليه زراعة الكبد او .........
للاسف دكتور قالي عندها الانزيمات عاليه وهي في حالاتها المتوسطه وحنا اكتشفنا مرضها تقريبا من سنتين وهي تتعالج بالرياض طبعا تتّذاكرالطيران على حساب الدوله والشقه المفروشه وسيارات الاجره وغيرها على حسابنا
المشكله حنا عيله مكونه تقريبا من سبع افراد عايشين على الضمان الاجتماعي
والحمد الله ربي فرجها علينا بحافز رغم الخصومات بس ساعدني بمصاريف علاج الوالده
انا الوحيده اللي اخذ حافز وباقي اخواني واخواتي بالجامعه صدق ياخذون مكافأه ولله الحمد
بس يالله يالله يكفي مصاريف الجامعه من كتب ومصاريف سياره وغيرها
المشكله لها موعد بالرياض الشهر الجاي والمشكله مامعنا مصاريف للشقه المفروشه
وبعد المواصلات وغيرها حاولت ادور وظيفه بالقطاع الخاص مالقيت كل اللي موجود وظايف مختلطه
كنت ابي اشتغل لظروفي الصعبه بس اخواني رفضوا
هم يخافون علي من كلام الناس ونظرة المجتمع والله تعبت وانا ادور وظيفه تساعدني
وتساعد الوالده الله يحفظها وبصعوبه القى احد فاضي يوديني ويجيبني عشان اقدر ادور لي على وظيفه
كل يوم يتقطع قلبي وانا اشوف دموعها وهي تبكي من شدة المها ووجعها
وغير هذا عندها السكري كل يوم مرتين اعطيها ابرة الانسولين الله يشفيها ويعافيها
والله اني خايفه يصير فيها شي
ابي اسال لو ارووح للجمعيات الخيريه تتوقعون يساعدوني ؟
وتتوقعون لو اطرح مشكلتي لصحيفة سبق القى حل؟
تكفون يابنات لاتنسوني من دعواتكم
ان الله يفرج همي ويشفي الوالده من مرضها وانه يشفيني من مرضي
الله يسعدكم يعلم الله اني اعتبركم اعز اخواتي حبيت افضفض اللي بقلبي لكم
لاني والله سهرانه وبس افكر افكرافكر آآآهـ بس تعبت والله من كثر ماافكر
وكلها افكار بتذبحني مدري والله وش اسوي
انتظر ردودكم الطيبه
47
2K

يلزم عليك تسجيل الدخول أولًا لكتابة تعليق.

تسجيل دخول

جرحك كسرني
جرحك كسرني
الله يشفيها ويعينك يارب
تحت الشمس
تحت الشمس
ايش نوع الفيروس سي ولا بي ؟
الله يشفيها شفاء لا يغادر سقما هذا المرض متعب لدرجة فظيعة سخونة ليل نهار والم بالصدر وتضخم بالكبد وامساك وصداع
ضروري تاخذ الحبوب الي توقف نشاط الفيروس
وفي تطعيم ياخذونه افراد الاسرة
اتمنى اكون افدتك
اسال الله الشفاء العاجل لمرضى الكبد ولكل مرضى المسلمين
اعرضوا فكرة زراعة كبد على الدكتور
وترى الكبد هو العضو الوحيد الي ينمو بجسم الانسان
يعني احد افراد اسرتك تتوافق انسجته مع انسجة الغالية ياخذون جزء بسيط من كبد المتبرع ويزرعونه للغالية والمتبرع راح ينمو كبده ويرجع نفس الحجم وهي تعيش بكبد المتبرع
والله حاسة فيك
متجر وهج
متجر وهج
اسال الله لها الشفاء العاجل

ياااارب
Princess amal
Princess amal
الله يشفيها ويعافيها ويخليها لكم ويجعل ما فيها من الم ومصاب تكفير ذنوب

وانا ما ادري وش اقولك عن وضعك غيير الله يكون بعونك ويوقف
معك ناس فيها خير يساعدونكم
اغصان الشمال
اغصان الشمال
نوعه فيروس سي وهي حالتها متوسطه ماوصلت للحاله الخطيره
وهي تاخذ ادويه يوميا اما تطعيم للاسف ماجابوا طاري التطعيم ولااحد تطعم منا الله يعين
وفعلا هذي اعراضها مع الم شديد بمنطقة البطن والصدر هي كل يوم تشتكي من التعب
الله يجزاكم خير اخواتي