بنات انا صاحبة موضوع زوجي تربيته تربية نسوان

السلام عليكم ورحمة الله وبركاته
انا يا اخوات سبق ونزلت موضوع ان زوجي تربيته تربية نسوان وان اي خلاف بيننا يروح يعلم اهلي واهله
والاغلب تفاعل معي وحسيتو بمعاناتي وعطيتوني نصايح .. والله يجزاكم خير
المشكله يا اخواتي ان زوجي مازال على حاله عند ابسط خلاف يدق على امه او خالته او امي ويعلمهم واحيانا يدق عليهم كلهم .. اخر خلاف بيننا دق على امي و هو اللي غلطان بعد مو انا وقالها كلام مرره مو حلو هاوشها وحتى كلامه معها كان استفزازي يبي يقهرها تخيلو بالله رجال يقهر ام زوجته ويحرق اعصابها .. وامي كانت تحاول تسايسه وهي مرره انقهرت من كلامه
ولو تعرفون يا بنات سبب المشكله
هو السبب مو انا هو اللي غلط علي ومد يده علي وتكلم كلام بايخ ويجرح وانا ما قلت له إلا كلمه وحده وعصب مررره وراح دق على امي وقالها بنت تقول كذا بعدين دق على امه وعلمها وفي الليل دق على خالته وعلمها
يعني هو سبب المشكله مو انا ..انا اللي المفروض اروح اشتكي مو هو
وانا مليييييت من طبعه ملييييت صرت احس بقرف من هالطبع
صار لنا شهر وزياده ما نكلم بعض غلط علي كثيييير بكلامه وتصرفاته وضربه لي من غير سبب
يا بنات شوه صورتي عند اهله رغم انهم طيبين ولا يدورون للمشاكل لكن زوجي اذا استمر كذا بيكرهم فيني
شفت اشياء الفتره الاخيره حسيت ان اهله بدأو يتعاطفون معه ضدي من كثر ما يتشكى مني من سبب ومن غير سبب ومن اتفه سبب يروح يتشكى
حتى اهلي الله يسامحهم بالذات ابوي تقريبا يغلطوني ألاحظ ابوي متعاطف معي ويحن علي وبنفس الوقت يغلطني رغم اني اقوله يا ابوي هو بعد يغلط علي ويضربني ويتكلم علي عند اهله( طبعا انا ما اعلم ابوي بأي خلاف بيننا بس زوجي يدق عليه ويعلمه بنت سوت وسوت ..بعدين ابوي يجي يسألني ايش صار بينكم)
ومقهوره من ضربه لي المتكرر وقبل كم يوم كان يبي يرفع ضغطي ورديت عليه رد عادي عشان ما ابي نتهاوش قام سوا نفسه انه عصب وانه بيقوم يضربني بالسلك.. ولان انا كنت احشي في نفسي من كم يوم ولمن شفته مسك السلك ورفعه علي بيضربني فيه قمتومسكت السلك بكل قوتي وقلت له جرب تضربني وشوف ايش يصير جرب بس تمد يدك ودفيته بقوه وهو استغرب مني اني دافعت عن نفسي بهالطريقه
لان مره من المرات تهاوشنا وضربني ومن غبائي ما دافعت عن نفسي ولا حتى دفيته خليته يضرب وانا ساكته وكل ما اتذكر هالموقف انقهر من نفسي ليه كنت ساكته وهو يضرب..
الحين انا شهر مالي خلق اتكلم مع زوجي ولا اجلس بالمكان اللي هو فيه خصوصا اني ما اخذت حقي منه ع الضرب وع الكلام وع الاشياء اللي سواها لي الفتره الاخيره
قلت اسكت احسن لي كرهت طبعه وكرهت كلامه علي عند اهله وهم بعد بدأو يصدقونه في بعض الاشياء
اهلي بصراحه ما بيرضون علي واكثر من مره نصحوه واكثر من مره يسوون مواقف تبين لزوجي واهله ان انا وراي سند بس اهلي غالبا يقولون اصبري واسكتي مشاكلك تافهه لان اهلي بصراحه مو حقين مشاكل ابد
مقهوره ع الكلام اللي انقال عني حتى الكلام اللي قلته له وكان كلام غلط المفروض ما اقوله بس كان في لحظة غضب ليه يعلم اهله اني قلته خلاص انا قلته لحظة غضب ليه يمسكها علي وهو يقولي ابشع منها وهو اصلا اللي يستفزني لي اغلط .. ومقهوره منه كل ماعصب يشوه صورتي عند اهلي واهله بكل جرأه يقولهم ماعاد ابيها بطلقها وامي زعلت لمن قالها بطلق بنتك ما ابيها .. بس امي ما تبي مشاكل وبنفس الوقت شايله همي
وانا الحين ما اكلمه إلا وقت الضروره واحاول ما اجلس معه بالمكان اللي هو فيه ..وهو بصراحه ما شفته حاول يرضيني مطنشني ..بس منقهر من سكوتي ومن تطنيشي له .. حتى يحاول يرفع ضغطي ويرمي علي كلام عشان نتهاوش بس جد جد مالي خلق اتهاوش وغير كذا متأكده انه بيمسكها علي واي كلمه بقولها بيروح يعلم ..بس انا فعلا افكر استمر بسكوتي وتطنيشه له ابيه يتأدب فعلا ما ابي هالتصرفات يسويها
انتم ايش رايكم يا بنات باللي سواه وايش رايكم بتطنيشي له