بنات .. انا عضوة جديدة ومكتئبة :(((

السلام عليكم ......
احس بيطق فيني عرق >>>> ادري اني خاشة عرض .. بس والله من اللي فيني :(
انا عندي ســلطة مشـــاكل يمكن مو مشــاكل فعلية . بس انا حوااااسة اغرق بشبر موية.. علشان مااطول عليكم بأحط الأشياء اللي مضايقتني بنقاط وبلييييز اللي تقدر تنصحني بشي لا تبخل علي بالنصيحة وانا داعية مقدما لأي احد يساعدني بتفريج كربتي ان ربي يفرج عليه كربه من كرب يوم القيامة يااارب

الحكاية باختصار اني موظفة ودوامي الى 5 وزوجي نفس الشي بس دوامه الى 6 .. حلو الكلام؟؟

اللي بعده..
انا متزوجة من سنة :icon28: بس للأسف رفلللللللة مقععععدة :icon33: يعني معرفتي بشغل البيت زي معرفة جدتي بالكمبيوتر .. يابنات وش اسوي طول عمري تركيزي بالدراسة وبالشغل وفجأة لقيت نفسي زوجة ومسؤولة عن بيت وزوج وغسيل وكوي وللأسف طببببببخ :angry: ، والله العظيم حاولت جهدي اني اتعلم واتسنع بس دااابم احس نفسي مقصرة .. يعني اي وحدة تحط نفسها مكاني، اسمع بشي اسمه خبرة ولا شطارة ولا دبرة كان بالمطبخ ولا بالبيت يعني الشي اللي ما ياخذ غير 10 دقايق ياخذ معي وبلا فخر نص ساعة .. اوكيه ما انكر ان بعد سنة تجارب فاشلة وضعي تحسن نووووعا ما.. بس لسه احس المشوااار قدااامي طوييييل ..

اما زوجي عاد .. وما ادراكم ما زوجي .. الله يخليه لي ولا يحرمني منه ويعقله ويهديه وان شالله بدعاكم معاي بيجي له يوم يكتشف انه متزوج كائن حي مو مكينه ..
يعني مدري شقول احبه ويحبني واحسه احياااانا يرحمني بس اغلب الوقت تيجي له حالة فقدان الذاكرة المؤقتة و ينسى اني توني جاية البيت قبله بساعة .. يعني وش طابخة لنا اليوم .. ولا ملابسي لو الله يعافيك تكوينها ولا معليش حبيبتي بس ياليت تمسحين الغبار ولا تغيرين الزبايل ... باختصار الله لا يضره متقمص شخصية مكرسكووووب مغير يشوف غير النواقص بالبيت ومو عارف اني و اقسم بالله اتقطع من جوه لأني وددددي اكثر منه اني اخلي بيتي يضرب فيه المثل بكل شي ..

مع انه يابنات والله العظيم بدون مبالغة ماحد يدخل بيتي غير يمدح نظافتي و ترتيبي يعني انا اصلا حتى في بيت اهلي احب الزين والترتيب والنظافة ولكن هناك فرق . عند اهلي في 3 شغالات والحين انا براسي .. فكنت احاول اجتهد بس برضه مو بالشئ اللي يرضيني ولا يرضيه .. وغير عن كذا زوجي ماشالله نظيييييييف ومرتب لدرجة تجيب التخلف .. اقسم بالله بموت يعني ينتبه حتى لأدق التفاصيييييل وهذا بحد ذاته مو مشكلة .. بل و كااارثة بيئية مع وحدة بظروفي :(

عموووما .. انا اكتشفت ان غلطة حياتي اني تفلسفت اول الزواج وقلت مااابي شغاله ابي اعيش حياتي واجرب كل شي .. والله لا يعيدها من تجربة قرفتني و طلعت عيني وماعاد عرفت اركز على نفسي ولا على زوجي ولا التنظيف ولا طبخاتي "الفاااشلة" وقررت اني اصلح الغلطة واجيب شغااالة .. وياللفرحة اخيرا بتيجي الشغالة :icon28: والحين المشكلة الجديدة ..

تبي تيجي الأخت الشغالة الفلبينية المسلمة كمان اسبوعين .. بإذن الله .. بس السؤال اللي يبططططح نفسه .. ذي وش يبي يعلمها؟؟؟؟ :D اذا انا ابي مين يعلمني و شغالات اهلي انا لي ملاحظات عليهم واخاف يعلموها قوة العين بدال الشغل..غير كذا بتصير تقعد كم ساعة بلحالها في البيت فمدري شلون اسوي لها جدول يعني انا بيتي زغنطووط هل كل يوم تنظف كل الغرف ولا تنظف كل يوم غرفة؟؟ عندي حمامين فكم مرة تغسلهم في اليوم وبعدين ابي اجيب لها من الزي الموحد 7 يونيفورمات كل يوم تلبس واحد بس هل تغير قبل ماتغسل الحمام ولا قبل .. بعدين لو بغيتها مثلا تنظف الجدران و دواليب المطبخ و هالشغلات .. كل كم تنعمل .. الزوالي حقت الأرض لو بغيتها تغسلهم بشامبو السجاد كل كممممم ؟؟ ياربيييي .. مو قلت لكم اغرق بشبر موية :icon33:

يمكن انا محبكتها حبتين .. بس والله خايفة اخاف اني بعد طول انتظار وعناء اجيب وحدة وماعرف اتعامل معها .. يعني بدل مااكحلها اعميها .. ماودي اصير شريرة معها لا تحقد علي وخصوصا اني حامل الحين ياربي يقومني بالسلامة و يرزقني الذرية الصالحة (قولو آمين) .. واخاف تروح تفتري بالبيبي .. وفي نفس الوقت مابي اصير لينة معها تقوم هيا تستقوي علي .. خصوصا اني ماااعرف اتأمر على احد..

بنات اي نصيحة الله يرضى عليكم سوااء كيف أجدول شغالتي ولا كيف انظم مطبخي ولا شلون اصير اطبخ بسرعة ولا ولا ... اي وحدة قريت موضوعي وحست انها تقدر تفيدني بشي الله يجزاكم خير لا تبخلو علي بالنصيحة ..