بنات انصحوني ..مابي هالحالة تستمر معي..

بسم الله الرحمن الرحيم
السلام عليكم ورحمة الله وبركاته

يالله يابنات مدري وش فيني ..لي شهر وانا هواجيسي مدري وش تبي..
انا ياطويلات العمر متزوجة لي عشرة شهور وزوجي حبوب وطيب مرررررره والحمدلله احبه ويحبني ومتفاهمين نوعا ما على رغم عصبيتي وتفاهة تفكيري احيانا..
انا وزوجي تقريبا من نفس الديرة واهالينا الحمدلله اوضاعهم الماديه كويسه مره مره ..احنا من نفس الطبقه الاجتماعية ..وعوايلنا (عمانه وخواله وعماني وخوالي)راعين ماركات وعيالهم باحسن المدارس الخاصة وسفر بكل اجازة لاي مكان وكل مكان ..هذي نبذه قبل موضوعي استحملوني

المشكله انا وزوجي اوضاعنا المادية عاديه الحمدلله يعني الراتب يادوب يكفي احيانا يجي اخر اسبوع مافيه شي مصفرين ..هو مايقصر يعطيني مصروف حلو مره مقارنه براتبه ويسدد جوالي يعني كريم ومايبخل باي شي وبنفس الوقت احسه مبذر ومايحسب حساب لبكره ..عايشين بالبركة..
انا هالشي مسبب لي ازمه من شهر وانا بس افكر اقول شلون لو حملت وجبت عيال ان شاء الله وشلون بنصرف عليهم وشلون بندخلهم مدارس وشلون بنقدر نجاري اهالينا ..لاني ماقدر اصير اقل مستوى منهم حتى اخوانه وخواته كلهم اوضاعهم زينه مره الا زوجي ..
بتقولون انتي بتشتغلين وينزل لك راتب اقولكم طيب..حتى لو نزل لي راتب شلون بنقدر نبني بيت شلون بنقدر نعيش زي مستوانا الاجتماعي اللي متعودين عليه..
بتقولون لي انتي ليه وافقتي عليه من البدايه وانتي تعرفين راتبه..انا وافقت عليه لانه هو الله يصلحه من النوع اللي يتكلم كانه يملك الملايين يعني هو كان يشتغل بالاسهم وبطل من لما تزوجنا لانه مافي راس مال ..دخل في مشروع والمشروع فاشل لحد الحين ..وزوجي للاسف ماله طموح ابدا مايهمه يحسن وضعه..عكسي بالمره انا من لما تخرجت توظفت وكل سنه اقدم ماستر وان شاء الله بقدم دكتوراه واخذ دورات في معظم الاشياء اللي احسها تفيدني وممكن تحسن مستواي الفكري والمادي..وهو نت وقروب وشباب وبس ..حتى الحين انا بامكاني اقدم عالبعثات نروح نكمل دراستنا وهو مايبي ابد الدراسه يكرهها ويقول مالك امل..عكس كل كلامه اللي بالخطبه..
يعني اعطيكم اياها على بلاطه احسه لعب علي بالكلام قبل الزواج كان يمنيني بامور وكلها عكس العكس ..
ومع كذا انا حاسه نفسي غلطانه ميه بالميه انو تفكيري يصير تافه للدرجة ذي،، واقول يابنت هذا زوجك المفروض تساندينه المفروض تنبسطين انو كريم وانو حبوب ويعاملك كويس ومايرفض لك طلب بغض النظر عن الوضع المادي الحمدلله تاكلون زين وتشربون زين وتشرون زين يارب لك الحمد ..
بس ماش عجزت يابنات عجزت
تخيلو انا قسم بالله ماعمري كنت تافهه ابد ابد وكنت اقول مايهم بنتشارك بكل شي اهم شي نحب بعض ونسند بعض ونتفاهم بس والله مقلوب حالي من شهر ..خايفه من المستقبل معه ..خاصه انو هو الله يهديه يبالغ في كل شي يعني دايم حكيه لاخوانه الكبار انه بسوي بسوي وهو ولا شي يسويه فتشوفونهم يستحقرون حكيه ويتطنزون عليه وانا اكره هالشي ... ماحب اشوفه بالمنظر هذا،،
بنات كلامي محيوس مو مرتب بس انا تعبانه من تفكيري المريض هذا وابي احد يصحيني ويخليني افهم الحياة صح..
انا مابي اعيش حياتي عشان المظاهر انا نيتي من الزواج اننا نكون اسره واربي اطفالي على قيم ودين مابي الفلوس تكون من اهتماماتي ،،
الله يسعدكم بنات فهموني عيشوني حياتي صح..ابي هالافكار الغبيه تروح من بالي ..
هل انا مو متوكله على الله يبنات؟ ولا وش فيني بالضبط انا..
وانا الدين اول اهتماماتي وانا وزوجي فينا الحمدلله استقامه الله يديم علينا النعم يعني ماحنا راعين اغاني او خرابيط بالعكس الحمدلله ..
الله يعافيكم يابنات الله يتنقد لاتجرح فيني ولا في زوجي
يعني انا ابي هالموضوع فيه نقد هادف لاستعده وضعي الافضل ولتنظيم حياتي ..

توكلت على الله وفوضت امري له ..