أصلا ما أحد يسال الناس وهو محتاج

اللي محتاج فيه عفة و يستحي والا ماعمري شفت المحتاج يقول امي محتاج حاله تتكلم عنه

اللي يشحذون هم وسيعين الوجة و اللي عندهم خير ومع ذلك يبون زود مايدورن أن اللي يسال الناس و هو مهوب محتاج يجي يوم القيامة و ما في وجه لحم ( بما معنى الحديث )


الله يكفين شر أهل النفوس الدنيئة ...

هالسالفة ذكرتني بوحدة الله يذكرها بالخير


كانوا جيرانا و زوجها له منصب كبير في الجيش مادري الشرطة و معاشه عالي و كانت دايما تتصل في امي و تقولها ما عندي فلوس حتى اشتري بامبرز لعيالي و ما ادري وشو و ما ادري

السالفة تكررت اكثر من مرة و امي كل مرة تعطيها اللي فيه النصيب لين يوم من الايام جالسين الحريم كلهم في جمعة حريم و يسولفون و بدت عاد هالحرمة تتفشخر الا فصلت فستان عند المصمم الفلاني ب عشرة و فصلت عباتين عند المحل الفلاني ب خمسة و يالسة و تتفشخر ... امي مسكينه بققت عيونها و يلست اطالع ذي الحرمة

و سبحان الله اليوم اللي بعدة تتصل في امي و تقولها والله محتاجة المبلغ الفلاني ابي اشتري شي ضروروي اليوم هنيه عاد امي طيبة و ما تحب تجرح احد قالتلها اسفة حبيبتي احنا شارين سيارة جديدة اليوم و ما عندي .... و من يومها الحرمة هذي ولا اتصلت في امي و حتى صارت لما تشوف امي في مكان ما تسلم عليها

لا حول و لا قوة الا بالله ..

انا بداية قلت يمكن الحرمة عندها ظروف ولا شي بسسس لو هي صج محتايه ما بتطلب

لانه الفقارى عننننننننندهم عزة نفس .. ومافي فقير يمد يده لغيره ابدا ..

نحنا صار لنا مرة موقف كنا طالعين و يا اخوي ويتنا حرمة ما شاء الله عليها يبان انها بنت ناس

قالت انهم يايين عندنا علشان ولدها مريض و خلصو فلوسها و انه عندها التذاكر و كل شي

بس تبي قيمة تاكسي علشان توصل للمطار و قالت بعطيكم رقمي اذا تبون ان وصلت ديرتي

بطرش لكم المبلغ ..

وحليلها عسى ربي يشافي ولدها و راحت في حال سبيلها عاد يوم قريت موضوعك ذكرتها ..^_^

معليش اختي لا احد يعلم دواخل احد ..

اذكر من سنين طويله كان لنا جاره ميسوره الحال وزوجها من الاغنياء لديهم خادمه وسياره مرسيدس .. الخ تعرض زوجها لضائقه ماليه شديده واصبحت في حاجه للمساعده من الجميع .. برغم حالتها الماديه شديده الصعوبه لم تتخل عن الخادمه والسائق وغيره وقالت سأبحث عن عمل كمدرسه في مدرسه اهليه لو بالف ريال سأدفع منهم 500 للخادمه ..

سال والدي احد الشيوخ الثقات بخصوص مشروعيه اعطائهم من الزكاه برغم الرفاهيه التي يعيشون بها .. فأفتاه بانهم وطالما اعتادوا وضع معين ربما يصعب عليهم النزول عنه ففي هذه الحاله الزكاه تجوز عليهم حتى لو كان هنالك مظاهر رفاهيه في حياتهم ..

المهم نقلت هذه الجاره من العماره التي كنا نسكن بها وانقطعت اخبارها لسنوات وبعد فتره طويله جدا فوجئت بها امي تأتي لزيارتها لتقول لها ايام الازمه اعطيتوني المبلغ الفلاني والحمد لله الآن احوالنا تحسنت تفضلي هذا هو المبلغ .. ردت لها مادفعناه لها في ذلك الوقت برغم انها كانت تستطيع عدم رده بكل تأكيد ..

الخلاصه اختي لااحد يعلم ربما المرأه محتاجه فعلا لا تغرك المظاهر ربما حتى هي بحاجه للمبلغ الذي اخذته منكم لتدفع راتب السائق او حتى تشتري فستان لائق بأحد الاعراس التي ستحضرها .. لااحد يعلم هي اضطرت للتسول فلابد ان الامر خارج عن سيطرتها اما انه حاجه شديده او حتى مرض يجبرها على التسول برغم عدم حاجتها ..

على كل حال لا تشغلي بالك فنيتكم هي الاهم وكان غرضكم الصدقه وباذن الله ثوابها وصل وهي حسابها عند ربها ..

اعووووذ بالله
معقووووووله في ناس كذا
شكلها مريضه
الحمدلله الذي عفانا مما ابتلاها