بنات جدتي توفت أمس ادعو لها بالرحمة والمغفرة ؟؟؟؟

اسمحوا لي يا بنات منتداي اذا بطلب منكم هالطلب انكم تدعون لجدتي بالرحمة والمغفرة
عانت في حياتها بعد وفاة جدي الله يرحمها وكانت بعمر صغير 25 سنة بس وربت عيالها وعيال عيالها وذاقت المر في هاي الدنيا اللي ما ترحم لين كسر عظامها الزمن وصارت طريحة الفراش بالمستشفى تعاني الألم وحيدة بصمت ما يتحرك فيها شي غير رمش عينها والدموع اللي تنزل من عيونها بدون ملامح الحزن على الويه لأنه كل شي فيها مات ما عدا قليل من الروح وراحت أمس الله يرحمج يا يدتي يا حبيبتي أنا قصرت وياج وايد وانتي ما قصرتي انشغلت عنج وايد بهاي الدنيا سامحني يا ربي وسامحيني يا يدتي
آخر يوم شفتج فيه حسيت انج ما تشوفيني ولا تسمعيني أناديك وأناديك وأنا ماسكه ايدك البارده ويوم بغيت أشيل ايدي وأروح مسكتي ايدي وعيونج تدمع كأنج تقولين لي لا تسيرين يا بنتي يا حفيدتي أنا وحيده قعدي معاي بعد بس أنا تسامحت منج وقلت سامحيني يا يدتي بروح عيالي ينتظروني
شو نسوي هاي سنة الحياة أنا بعد بربي عيالي وبيي اليوم اللي بينتهي دوري وبودع فيه عيالي وأحفادي لو عطاني الله عمر وتدور الحياة والحياة فانية فانية وما يبقى غير وجه رب السموات والارض
وبعد أقولكم اسمحوا لي بغيت أفضفض اللي في قلبي لكم