بنات حواء اخواتي في غربتي ساعدوني

السلام عليكم
خواتي بنات حواء مالي غيركم بعد الله احد يواسيني ويساعدني
من البارح مانمت احس الخوف للحين ماسك فيني مايبي يتركني
من شفت دم نزل مني وانا بالشهر السادس ماعاد قدرت امسك نفسي صرت ابكي وادعي يخلي لي اللي ببطني وزوجي يهدي فيني ومافية فايدة المهم طرنا على الاسعاف بمستشفى حكومي مافيه غيره للاسف لا وماعندهم احد غيري الساعة 2 الفجر سالتني الممرضة وش المشكلة قلت نزبف باي شهر قلت السادس والله لايوريكم
راحت تركض وجابت الكرسي المتحرك قالت تطلعين فوق وخفت اكثر واكثر وين بتوديني ومنعت زوجي يطلع معاي وانا مو عارفة وين بتوديني مشت فيني في ممرات المستشفى وانا مو حاسه بشي كنت خايفة حيل ولازم اواجه هالموقف لحالي لا ام لا اخت الارب ا لعالمين لاوزيادة على كذا بغربة حتى المستشفى اول مرة ادخلة المهم
طلعنا فوق وانا صرت اقرا باللافتات قسم النساء والولادة قسم الجراحة والعمليات الصغرى وانا قلبي يدق زيادة والافكار السوداء تزيد ياربي اي باب بتدخلني فيه
كملنا مشي الا الطامة الكبرى دخلتني غرفة الولادة والعمليات القيصرية وانا اكذب نفسي اقول لا يمكن قريت غلط مادريت الا جوني الممرضات لابسات لبس العمليات ومسكوني واخذوني وقفوني عند باب غرفة وعطوني كيس وطلبوا انزل ملابسي الداخلية ونعالي وطول الوقت اسالهم وش فية وش تبون تسون لي ومحد يرد علي نزلي ماما نزلي ماما هنديات ولا يعرفون عربي عجزت معهم افهم شي كرهت عمري
موقف لا احسد عليه دخلت الغرفة على وشك الانهيار وحطت جهاز علشان تسمع نبض الجنين لاهي سمعت شئ ولا سمعت شئ واصاروا يتكلون بالهندي على راسي وانا مو فاهمة شي واسالها بيبي كويس وهي لاتعليق يالله صبرني وكاني اكلم جدار المهم صارت تغير مكان الجهاز على بطني لين صرت اسمع نبض ولدي بنفسي وطمنت شوي وتجمعوا الممرضات عندي وطلبت الممرضة تكشف من تحت ورفضت قلت انتي دكتورة علشان تكشفين قالت انا اشوف اذا نزيف كثير تجي دكتوره واذا شوي ماتجي ومسكت نفسي لا اغلط عليها المشكله افيه بالقسم كله غيري قلت ابي دكتوره وبعد طول انتظار جا الدكتور بارد جداً وانا اغلي دكتور الجنين كويس قال حنشوف يالله الهمني الصبر وراح طلب جهاز الترا ساوند مدري منين جابوه وصار يتامل يتامل قال كويس مابغى يقولها ياالله وش كثر تعبت اعصابي وانا استنى هالكلمة
سالني عايزه تتنومي بالمستشفى علشان نتابعك قلت لا ابي اروح لبيتي قال روحي بس لو حسيت بالم بالظهر او مغص تجين على طول تنويم وعطاني حبيتين فيفادول
الحلو بالموضوع بعد هالرعب عطوني اغراضي وقالوا روحي وين اروح زوجي تحت بس وين الطريق قلت الله يخليكم نزلوني تحت للاسعاف نادوامسئولة النظافة وقالوا لها توديني واول مافتحت باب غرفة الولادة الازوجي عند الباب طلع فوق ينتظرني
رغم انه ممنوع لماشفته كانه نازل علي من السماء مشاعري متضاربة خايفة ومرتبكة مادري وشلون عساكم ماتشوفون اللي شفته وللحين على اعصابي خايفة انام وانزف وانا نايمة ولاادري وش اسوي الله يخليكم اي وحدة عندها خلفية عن الموضوع وسبب النزيف واذا فيه اكل معين يفيد بحالتي لاتبخل علي ماودي اسال امي ينشغل بالها وانا بعيده عنها ولابيدها شي المسكينه
للعلم ماسويت اي مجهود يذكر