شوفو الموضوع ناقلته لكم....:22:
:p
المهم ياطويلين العمر موضوعي اليوم بتكلم فيه عن مشكله وظاهره لاحظت انها متفشّيه بكثثثره عند الحريم .. ماتلقى تلفزيون فيه شريط شات اسفله الا وتلقى هالمشكله .. ولا تدخل منتدى وفيه قسم نسائي الا وتلقى هالمشكله (حتى عندنا بالمنتدى ) ولا تلقى برنامج نسائي الا وفيه هالمشكله والاكيد الاكيد ان مجالسهم وسوالفهم كلها او غالبيتها من هالنوع يعني صايره هالمشكله تشكّل لنا يامعشر الرجال قلق ودبلة كبد لدرجة اننا يوم ندخل هالاماكن السابقه ونشوف هالمشكله اللي بتكلم عنها نكره عيشتنا وتضيق بنا الدنيا ونحس بالهم والضيقه (هو احنا ناقصين )
المشكله يامعشر الحريم أن الواحد إذا فتح على التلفزيون مثلاً وحط على قناة بداية -على سبيل المثال- وجلس يتابع شريط الشات لمدة خمس دقايق بس يمكن ينجلط بيلقى وحده اسمها زمام وتلقاها مرسله لوحده اسمها رشرش المهم وتلقون زمام تقول لرشرش (تكفين شوفي لي حل زوجي خرج من البيت ولا قال لي مع السلامه واحسه متضايق مني مررررره وش اسوي ) عاد تجيكم رشرش اللي تلعب دور المُنقذه في السالفه كلها وترسل لها على الشات وتقول (ياعمري يا زمام .. قومي صلي ركعتين وادعي الله يبعد زوجك عن بنات الحرام اكيييييد ان عينه على وحده احلى منك وصار ما يطيقك) ويجلسون نص ساعه يقلقون اهلك وانت ماغير متابع سوالفهم وشكاويهم السامجه وفي الاخير تلقى ان ماعندهم سالفه ورشرش من صباح الله وهي مسويه الفاهمه وهي من جمبها لو فيها خير ما طلقها رجالها (حمد)
يوم يودّعون بعض تفرح انت ايها الرجل وتقول الحمد لله افتكينا من الغثا والهم بعد اشوي تجيك وحده اسمها (بكرج قهوه) وتكتب مسج للشات وتقول: (يابنات لحقوني تكفووون وجهي صاير له شهر مليااان حب شباب تكفون شوفوا لي حل واللي تساعدني راح ادعي لها) <-- وش عندها اللي دعوتها مستجابه
عاد بعدها تعالوا شوفوا اللي بيفتونها تجيك وحده اسمها (تبسي مصدّي) وتقول لها (ياحيااااتي يابكرج .. الظاهر انها جايتك عين مثل زوجة اخوي (وهي كذابه تلقى ماعندها اخوان ) بس انصحك ياحياتي تقطعين الطماطم شرايح وتحطينها على وجهك وتعصرين حبتين ليمون إلى ثلاث حبّات بس شرط يكون الليمون ابو زهير)
سبحان الله .. هالحين طماطم وليمون !! مابقي الا تقول لها حطي بصل ويصير وجهها صحن زلطه والله ياجماعة الخير ترى وضعكم مزري ويكسر الخاطر يرحم امكم شوفوا لكم حل حاولوا تبتعدون عن هالتشكوي اللي مامنه فايده
عاد يروح هالرجال المسكين بعد ماينصدم بهالمسجات وينخمد وخاطره مكسور وبدا يشيل هموم الناس وهو ماهوب ناقص وبعد مايصحى يدخل على النت ويدخل منتداه المفضّل ويلقى موضوع في قسم حواء كان اسم الموضوع يجذب الاهتمام .. اسم الموضوع (الحقووووني انا بوسط حريقه) يدخل الرجال وعيونه مبققه عسى خير وش هاللي بوسط حريقه وفاضيه ولا عندها شي وتدخل منتدى وتكتب موضوع !! وكان الرجال ماسك الجوال بيده عشان يعرف عنوان البنت وبيتصل على الدفاع المدني (واضح انه يحب الخير مثلك ) ويوم يدخل الموضوع يلقى اسم العضوه (ناعمة البنان) وهي لو تشوفون يدها تلقونها كلها اثاليل ويوم قرأ هالمسكين الموضوع لقى مكتوب (تكفون يابنات انا متورطه زوجي يطلبني ارقص وانا استحييي وكل يوم يقول لي ارقصي وما ادري وش اسوي )
عاد يجونها ظلال ميسره طاهر وتجيك المشرفه اللي اسمها (صغيره ودلوعه) وهي تلقى عمرها 36 سنه وللحين ما تزوجت وتقول لها (ياقلبي انا حاسه بمعاناتك والله بس حاولي تاكلين زبيب على الريق لانه يساعد على الجرأه وحاولي دايم تشغلين اغاني وزوجك برا البيت عشان تتعودين على الرقص في البيت) اقول يازينك وانتي ساكته اجل مشرفه هااه؟ وش اللي زبيب وما زبيب والله لو انها بتسوي كبسة بخاري بعض الناس ماودك ينصحك بنوب
عاد كله كوم ورد العضوه اللي اسمها (الرشيقه) وهي لو تشوفونها ناقصها سماعات وتصير تلفزيون 40 بوصه طبعاً تلفزيون ابو ظهر لأنها تبطي تصير تلفزيون بلازما عاد تقول لها هالرشيقه 40 بوصه (وعععع وش فيه زوجك ذا شكله متخلف ومتأثر من هالقنوات والرقص اللي صاير فيها .. انصحك يا ناعمة البنان خذي عفشك ولا تجلسين عنده ساعه وحده لين يعطيك رضوه 10 الاف ريال ويجيب لامك دبله وخاتم ويجيب لابوك بشت والا لا ترجعين واطلبي الطلاق .. رجال اخر زمن !!) <-- شوفوا الخبله بالله عليكم يعني ممكن بهالكم كلمه تخرب بيت هالمسكينه ام الاثاليل طيب قولي خير والا انطمي لازم تقولين مثل هالكلام وتخربين بيوت الناس وانتي يا ام الاثاليل عندك مشكله خلاص كلمي اختك او امك او تفاهمي مع زوجك ترى مافي داعي تمتحنين خلق الله وتفتحين موضوع وتتشكوين على شي ما يسوى !!
ياحريمنا خافوا الله اجل مواضيعكم كلها صايره (بيتي فيه حشرات وشلون اذبحها) والثانيه تقول (حلمت ان ابوي تزوج على امي اقول لامي هالحلم والا لا) والثالثه تقول (تكفون ابي رقم مشغل نسائي معروف في طبرجل!!) والرابعه تقول (بغيت اسم صبغه حلوه ومجربه وياليت يكون اللون ذهبي على موف وبالفوتوشوب بتكون درجة اللون R452645)
الصراحه شي يبكّي ويفقع المراره ويكرهك في الانترنت والتلفزيون واي شي اسمه حرمه حاولوا تحلون مشاكلكم بينكم بالسر والخفا وابتعدوا عن التشكوي على اشياء تافهه .. اجل حلم وزوجي يبيني ارقص وعندي صرصور بالحمام وشلون اذبحه ؟!!! وش هالناس اللي فاهمه المراسله غلط
حززينه @hzzynh
عضوة
يلزم عليك تسجيل الدخول أولًا لكتابة تعليق.
ام لولو1
•
ههههههههههه الله المستعان
ديزاين
•
هههههههههههههههههههههههههه
حلوه رشرش ماعندها سالفه
بس الصراحه انا لما اتابع الشات ادعي لكل وحده طلبت الدعاء
حلوه رشرش ماعندها سالفه
بس الصراحه انا لما اتابع الشات ادعي لكل وحده طلبت الدعاء
هههههههههههههههههههههه
جالسه اضحك زي المجنونه شوفي هو صح هذا الواقع
بس في ناس مايقدورا يفضفضوا او مايقدروا يحلوا مشاكلهم
فيلجأوا للمنتدى وشات عالم حواء وبدايه وطقتها
جالسه اضحك زي المجنونه شوفي هو صح هذا الواقع
بس في ناس مايقدورا يفضفضوا او مايقدروا يحلوا مشاكلهم
فيلجأوا للمنتدى وشات عالم حواء وبدايه وطقتها
الصفحة الأخيرة