بنات خرجوا من اسرهم غير مؤهلين للزواج..!! في بالهم رحلة وناسة..!!

الأسرة والمجتمع

للاسف هذا واقع نعيشه وهويقع على عاتق الابوين

وفي المقام الاول على الام ثم بعد ذلك على البنت نفسها..




اول شي تجهله كثير من البنات او تفهمه خطأ المقصد الحقيقي للزواج

والاهداف السامية التي من اجلها شرعه الاسلام..


مفهوم الجيل الجديد للزواج انه فلة طلعات وتسوق وسفرات


وآخر ماركة وآخر موضة وهروب من بيت الاسرة الاستقلالية...!!

واول ما تحمل كانها صفعت واذا ولدت زادت الصفعات..!!


ماهي متعودة على المسؤولية ما تعرف كيف تشيل مولودها او كيف تنظفه..!!

وكيف تطعمه ولا تدري بكاؤه طبيعي والا من مرض وكيف.. وكيف.. !!





وبعضهم تصل الجامعة وهي ما تعرف تطبخ..!! وتتعلم في زوجها المسكين..

يجي من العمل في غاية التعب وهي في سابع نومة..!! وين الغدا يا بنت الناس ؟


بكل برود تقله روح اشتري من المطعم ما فيني حيل..!!

ليش لانها ما عندها ادراك للمسؤولية وما احد نبهها في يوم وليلة تزوجت وخلاص..!!







ولذلك لا نستغرب قصص الطلاق لبيوت زوجية اعمارها قصيرة..

لجهل البنت بالمسؤولية وبطبيعة الرجل واحتياجاته...


الى درجة تعامل زوجها كانه وحة من صديقاتها...!!


من اقصر قصص الزواج الي سمعتها وحدة في ليلة دخلتها..

قالها زوجها بحسن نية او تدلل لا هنتي كاسة مويا عطشان..


شوفوا ايش ردت عندك رجولك روح جيب لنفسك ما ني خدامة عندك..!!


رجعت لبيت اهلها في صباحية زواجها كأقصر زواج...!!


تدرون ليش تصرفت كذا قالت علشان اوريه العين الحمرا من اول يوم..!!

هذه ثقافتها عن الزواج...!!






والحديث يطول فالمفروض على الام العاقلة توجه بنتها من الصغر


وتعلمها وتعدها احسن اعداد الزواج رابطة شرعية ومسؤولية وامانة ورعاية


ما هو رحلة برية او لعبة بلاستشن او تجارب صداقة او سفرة سياحة...!!




برأيكم جهل كثير من البنات بحقيقة الزواج مسؤولية من ؟

وكيف علاجها ؟

وهل تؤيدين ان تكون الدورات التثقيفية عن الزواج الزامية قبل الارتباط ؟





ننتظر تفاعلكم الفاعل المثمر.......
17
2K

يلزم عليك تسجيل الدخول أولًا لكتابة تعليق.

تسجيل دخول

شهلاء العيون
شهلاء العيون
كلام سليم .. لكن في بنات كويسات واهلهم مربينهم ... ذوق وطبخ واخلاق يعتمد على تربية الأهل والبيئة الي هي عايشه فيها
دلووووعه و ذووووق
على الام تعلمها كيف تحترم زوجها وتتعامل معاه فقط هذا اللي تحاسب عليه المرأه
ونظافتها الشخصيه والترتيب
اما غيرها لا تتعمقين فيها يعني مو من المعقول الام بتجيب اطفال وتعلم بناتها كيف يشيلوهم وينظفوهم واش سبب بكاه جوعان تعبان طفشان بالذات البنات اللي في آخر العنقود مثلي بحياتي مامسكت اطفال قبل مااتزوج ولما ولدت ببكري والله مااعرف اساسا امسكه حتى رضاعه طبيعي مارضعته عموما الحياه الزوجيه حياه جديده بمعنى الكلمه وتعيش فيها البنت تجارب من السبع المستحيلات انها تعيشها عند اهلها وفي وجهة نظري حتى ماتتعلمها الا مع زوجها ...
عشان تستمر الحياه فيه اساسيات بالحياه الزوجيه اذا الشاب والفتاه كانوا عارفينها يستطيعوا حل جميع المشكلات اللتي تواجههم ومن بينها سالفة الطبخ
ام ورد الورد
ام ورد الورد
كلام جميل بس لاننسى أن بعد الشباب مفهومهم للزواج غلط وان مفهومهم أنها للفراش والخدمة وماحد من اهله فهمه أن لها حقوق وان لها كرامة ومشاعر
الغلط وأسباب الطلاق المنتشرة من وجهة نظري تقع على الطرفين النص بالنص
والشرح بهالموضوع يطول لهالسبب لازم يكون في دورات تثقيفية مبنية على أسس اسلامية وماخوذة من تعامل الرسول عليه أفضل الصلاة والسلام الزوج والزوجة لبعض أو حتى أنها تعلم كمنهج في المرحلة الثانوية أو الجامعية لازم يكون في تأسيس للطرفين
وتلغى كثير مفاهيم خاطئه منها أن الولد مهما عمل غير محاسب والبنت على أتفه غلط تتحمل ذنب أكبر من حجمة وغيرها من المفاهيم الغلط
هذي وجهة نظري
فهده ال عنزي
فهده ال عنزي
شوفي حبيبتي كلامك فيه مصداقيه

لاكن مو كل شي ع هالبنت الفقيره حتى الرجال من يمسك قرش قال بتزوج وهو لاقد مسوليه ولا زواج ولا راعيه اطفال

والاهل صحيح لهم دور في تثقيف كلا الجنسين وتربيتهن وتوجيهم لاكن كل واحد له شخصيه مستقله

وانا اشوف هالفتره في هبه جديده البنات صارو يتعلمون يسون طبخات وحلاا وسلطات ومشروبات

والطبخ مافي وحده طلت من بطن امها تعرف والدليل في امهات لين الحين بعضهم ماتضبط الاكل الشعبي او تقولك ماقد جربت اسويه دايم امي او م زوجي او حماتي او اختي الكبيره تسوي

انا مع بعض الدورات التاهيليه للجنسين تثقيف توعيه صحه

حتى لو تقام هالدوره بالمدرسه بدل مواد ونشاط ماله داعي
سكن الفؤاد
سكن الفؤاد
كلام سليم .. لكن في بنات كويسات واهلهم مربينهم ... ذوق وطبخ واخلاق يعتمد على تربية الأهل والبيئة الي هي عايشه فيها
كلام سليم .. لكن في بنات كويسات واهلهم مربينهم ... ذوق وطبخ واخلاق يعتمد على تربية الأهل والبيئة...
اكيد اختي في بنات مثال للزوجة الصالحة الناجحة
وانما كلامنا على البنت الي ما تدرك معنى وحقيقته
وخصينا البنت دون الشاب لانه منتدى نسائي..
ولا شك ان البيئة لها دور لكن تحاول البنت تقف نفسها في هذا الجانب..