السلام عليكم

الاندلس ممتاز اسعاره غاليه بس تنهضم

الرياض مول حلو واسعاره احلى مجمع مغلق فيه محل اسمه فاشن مول بالدور الثانى فيه اشياء حلوه للاطفال بس النسائى مايعجبنى بس يمكن يعجبك الاكسسوارت المحلات فى الوسط يعنى مو محلات طاولات راح تعجبك الله يعينك على الف

السدحان اشياءه حلوه واحيانا القا فيها استكرات حقت مذركير ماشالوها بس تقريبا اكثره تنسيق وانا كثير اخذه منه وبعد تلقين فيه حق المقاسات الصعبه والنسائى ماعتقد انه يصلح للعيد بس بناطيله جدا حلوه

نجى لسوق حجاب لايغركم تراه ممتاز اذا بغيتى رخيص تلقين واذا بغيتى غالى تلقين بس اذا رحتى روحى لسوق الامانه فيه وانا من رواده وكل لبس اخذه منه احلى من الثانى خصوصا محل الدكتوره مايجيب الا الجديد وزورى سانيه فيه تجيب اشياء احياننا حلوه مره وفيها كل شي يعنى مركز كبير حتى الحين مصوين خصم على العطور شفت الدقه وشلون

وترى احنا فى الخدمه انتى تامرى
وشكرا

وزيدك من الشعر بيت عندك سوق النخبه فيه كل شي اطفال نسائي احذيه كلش كلش
وبنسبه للموقع ماعرفه والله على ماعتقد نهاية طريق الملك فهد لين توصلين الكباري اللي تودي للسويدي والشفاء على اليمين ...........انشاء الله تلاقين وحده تعطيك الوصف المظبوط

وبنسبه للاطفال مالك الا ستي بلازا

يال يلت يا أخت الخفوق تكتبين لي موقع كل سوق إذا ما عليك أمر وتسلمين ما قصرتي
هلا بك يا الورده_1 والله كفيتي ووفيتي

السلام عليكم

عيونى شوفلى الرياض مول بالروضه على شارع انكاسيعنى اول ماتدخلين من طريق خريص على شارع انكاس يجيك على اليمين

اما سوق حجاب فهو بالنسيم على شارع الاربعين اول اشاره روحى يسار يجيك على اليمين

السدحان له فروع بس انا اكثر شي اروح للى بالربوه الى الدور الاول ملابس الى فوق كله العاب

وعلى فكره فيه مركز الشبلى مره حلو وهو على شارع الاربعين بعد الاشاره الاولى تمشين يجيك على اليمين

وفيه له فرع ثانى على طريق الامير عبد الله

وتحياتى