بنات زواجي بعد شهرين و حاسه بحزن و ضيق

السلام عليكم

بنات انا حاسه اني بحلم من سرعة الاحداث الي امر فيها انا ماصالي اسبوعين من انخطبت و الملجه نهاية شهر 2 و العرس 16/4 .. ما اعرف كيف اوصف شعوري حاسه اهلي اغدروا فييني يمكن تضحكون واتقولون صدق مستخفه منو تحصل زوج فهالزمن وتتذمر و منو الي تتكلم عن اهلها جذيه .. بقولكم قصة الخطوبه

فجأه بدون مقدمات تقدموا ناس من اهلنا ما اعرفهم يبون يخطبوني وتخيلوا كانوا يبون الرد فيومين يعني كل يوم خالتي تتصل على امي هاااه شو رد بنتج هااه شو قالت بنتج حست ان الضغط علي من كل صوب اول ماسمعت بالخطبه كنت حاسه بضيق و كأنه هم الدنيا كله على راسي بس لما استخرت رااااح الهم وحست براحه ولا كأنه ورايه شي بس مع ذلك كنت ابغى وقت لين ما اقرر زين بس طبعا بعد طلعة روح اخرت الرد 6 ايام وبعدين قلتلهم توكلوا على الله وعلى كلام ابوي ان الزواج يبغاله حدود السنه لين يتم علشان كذا ارتحت قلت عالاقل بتهنى فبيت ابوي قبل لا اتزوج واروح بعيد .. بعد اسبوع فاجأني الوالد قال الناس مستعجلين و يبغون العرس بداية 5 انا انصدمت كيف حددوا بدون مايشاوروني واعترضت لكن لاحياة لمن تنادي و فليل قالولي انهم احجزوا بتاريخ 16/4 و انصدمت لثاني مره وبكيت يعني مافي وقت اهتم بنفسي ولا اتزهب براحتي وكيف بفارق اهلي بهالسرعه حاولت فأبوي علشان يأخر الزواج شهرين زيادة عالاقل مارضى قال انا عطيت الناس كلمه ومابرد عن كلمتي ..الحين انا حاسه بغضب و ضيق وحزن مب قادره اجابل ابوي بس اسلم ولا اقدر اقعد معاه للعلم انا اكبر بناته قريبه منه حاسه انهم غدروا فيني حتى ماحسيت بفرحة العرس ولا قادره اروح السوق اتزهب انا مب متعوده حد يدزني على شي .. والي حارقني ان فتره الملكه شهر بتكون ولا ادري اذا بيكلمني خطيبي والا لا خاصه ان نحن بدو انا خايفه ماا تعرف عليه قبل العرس بعدين كيف بجابله وانا مااعرف غير شكله .. بنات شوروا علي وطمنوني كيف ابعد هالحزن والضيق عني حاسه اني صايره سلبيه مره انصحوني و طمنوني .. نست اقولكم هو ماعنده بيت فبسكن مع اهله وهذا الي مخوفني زوود لان مااعرفهم

الي مرت بتجربتي وتزوجت بوقت قياسي تطمني وتقولي تجربتها

ويزاكم الله خير