كوبونات الراقية تسجيل الدخول

مداريم

مداريم @mdarym

عضوة جديدة

بنات ساعدوني / هل اللي سويته قبل 5 سنوات غلط ؟/ استوفى الرد

الأسرة والمجتمع •



،



تكفون تكفون أبي رايكم .. تعبت


سالفتي طويله بس تكفون اسألكم بالله تقرونها كلها

اول شي بقولكم نقطه عن شخصيتي قبل ماقول قصتي..

انا حساسه مره .. ما اتحمل أضايق احد بشي .. ولا اتحمل اشوف احد من أهلي زعلان..
وابسط كلمه منهم تعور قلبي..



قصتي..

أنا عندي اختين اكبر مني. .. وعندي اخت صغييره ف الابتدائي..
(خوات شقيقات ) .. لي خوات من أبوي غيرهم

وانا متعلقققه باختي الكبيره كثير.. يمكن لانها كانت دايم جنبي وتساعدني ..
لها مواقف يمكن ماتكون كبيره بس كانت جدا مؤثره لي. يعني ما احتاجها الا الاقيها جنبي..

وهي ماتزوجت .. مع ان الخطاب يجون لها كثييرررررر ..
بس سبحان الله بعضهم غير مناسب لاخلاقه الله يستر علينا .. وبعضهم يكون مناسب بس ما يتم الموضوع.
يصير شي ويتفركش او يروحون ومايرجعون..

مع انها ماشاءالله أجملنا .. واكثرنا بر بأمي ومتعلمه ومثقفه .. ومرحه لها قبول عند اي احد تسولف معاه..

قلنا يمكن فيها عين .. راحت عند كذا شيخ وكلهم قالوا مافيك شي بس عليك بالدعاء ..
وصارت تلح وتلح بالدعاء بس الحمدلله على كل حال .. نفس الوضع يجون الخطاب ومايتم




لما صرت أنا بثالث ثانوي (اختي الثانيه) انخطبت من ولد خالي
وكان عمرها وقتها 23 وعمر اختي الكبيره 26

اختي ماترددت نهائي بموضوع خطبتها واهلي وهي وافقوا .. وهالشي اثر بأختي الكبيره كثير ..
خصوصا ان الناس صارت تتكلم في اختي الكبيره ..
(( ليه ماتزوجت... اكيد فيها عيب.. أو فيها بلى ))

لدرجة احيانا ما يكفيهم التلميح .. يجون يسألونها بوجهها
(( متئ ناويه تتزوجين يالله ترى مابقى بالعمر شي.))
وناس تقولها وش شعورك والصغيره تزوجت قبلك ؟ ..
وناس تعطيها ارقام خطابات قدام كل المعازيم ..

واللي بنص المجلس تقول يا فلانه تراني جايبه لك موية زمزم ذكريني قبل ماتروحون
عشان تاخذونها يمكن ربي يسهل امر زواجك وتفكين امك من همك

اختي ترد عليهم بكل برود تقول ربي اذا كتب بتفرحون فيني ان شاءالله ..
وهي تموت بداخلها من كلامهم
والله مرت عليها مواقف ومواقف لدرجة اقول ماشاءالله عليها لو انا اللي يجيني هالكلام
كان انهارت اعصابي من زمان

كنت اسمعها تبكي كثير بغرفتها والناس نايمه..
ولما سألتها قالت لي انها تلوم اختي الثانيه وتلوم امي انهم وافقوا على الزواج بدون ماياخذون حتى بخاطرها
وان الناس صارت تقول ان فيها بلى بسببهم وان هالشي بيأثر على نصيبها لان الناس ماتسكت

حاولت اهديها واقنعها انه نصيب .. بس بدون فايده

ب هذيك الفتره كانت نفسيتها مايعلم فيها الا الله .. طول اليوم تضحك وتمزح ومرحه واذا جا الليل تبكي بفراشها
واحيانا اشوفها تصلي وتبكي لحد ماتتعب وتكمل دموعها على مخدتها ..

لمدة 3 سنوات وهي على هالحال .. وعلاقتها باختي الثانيه ماصارت مثل قبل ..
مع انها تحاول تضغط على نفسها وماتبين وتمزح وتضحك مع اختي وتساعدها بأي شي تحتاجه ..
بس بداخلها صار فيه حاجز وبرود خلاص ..

احيانا تشكيلي او على قولتها (أفضفض لا يطق عقلي) .. بس مشاعرها ماتغيرت ب هالثلاث سنين ..
كثير تردد هالجمله
(اذا ربي كتب لي وتزوجت وجاني بنات .. مستحيل احرق قلب الكبيره وازوج الصغيره قبلها )

مهما حاولت اصفي قلبها ماقدر ..
والناس ماقصروا كل بين فتره وفتره يرجعون يجرحونها بالكلام ان فيها عيب اكيد والا كيف اللي اصغر منها تزوجت و و
والبنات اللي بعمرها من قرايبنا بعضهم عندهم وسواس العين وصاروا يتجنبون يجلسون معاها .. ويتهربون منها

بعد جلسة الفضفضه من تطلع من غرفتي اقفلها واجلس ابكي .. أصلي وادعيلها

اضحك قدامها بس كلامها يحرق قلبي عليها. مابيدي شي اسويه عشانها.. صرت ادعي كثير لها واتصدق واستغفر ان ربي يفرحني فيها



مرت الايام و توظفت اختي الكبيره. والحمدلله انشغلت عن هالافكار و هدت نفسيتها شوي

بآخر سنة لي بالجامعة .. وقتها عمري 22 .. خطبني ولد جيران عمي
( صديق مره مقررب لاخوي )
جتني اختي الكبيره لغرفتي قالت جوك خطااب .. جلست اضحك احسبها تستهبل ..

قالت (( لا جد اتكلم.. صديق اخوي يبي يخطبك وانا قلت لامي اكيد انتي ماراح توافقين بس ماصدقتني ، جيت اسألك بنفسي
لان أدري ان الزواج مو براسك الحين .. وماظن بتذبحيني مثل اختك الثانيه وتتزوجين قبلي وانتي توك صغيره قدامك فررص ))

كانت تتكلم وحسيت عينها دمعت .. قلت ايه معك حق مابي اتزوج الحين

جا اخوي للبيت عشان يكلمني ...
جت اختي بسرعه وجلست معانا
قال صديقي فلان يبيك ، قلت شلون وهو مايعرفني ولا عمره شافني
ولا حتى أهله شافوني ولا لهم علاقه ببيت عمي..
وش عرفه عني لدرجة يخطبني ؟

طنش اخوي سؤالي وحسيته مايبي يعطيني تفاصيل الا بعد ماياخذ موافقتي

قال نصيحه لا تردينه
( معلومه:: من ثاني جامعه لما تزوجت صاحبتي واهلها كانوا مره حريصين فصفصوا زوجها
قبل الزواج وسألوا عنه وكلن يمدح فيه ،
بس الله يستر عليه طلع عصبي ويضربها واذا مره روق مايجيها منه الا المغثه بالكلام والتجريح ) ..

اخوي يدري ان هالشي مأثر فيني كثير ومسبب لي خوف من الزواج ..
وبرضو تعامل أبوي مع امي بعد ماتزوج عليها مأثر علي ومخوفني من الرجال

قالي انا ادري الزواج مخوفك ، وانتي من غير شي حساسه عشان كذا اقولك خذي هالرجال انا ضامنه لك ..

واحد نعرفه احسن من واحد مانعرف عنه الا كلام الناس .. ومحد بيناسبك ويراعي حساسيتك مثله
وترى يعرف عن ....... ( مشكله صحيه عندي ) وماعنده أي مشكله

بصراحه احترمت الرجال كثير وكبر بعيني ، وانصدمت من وين عرفني وعرف هالاشياء
ماسألت اخوي اكثر لاني كنت منحرجه ومستحيه من الموضوع كللله

بس ماقدرت اقول موافقه لاخوي ، ما طلعت مني وانا اشوف اختي تراقب ردة فعلي
ماقدرت وربي ، حسيت اني بذبحها لو وافقت .. مع اني بداخلي ارتحت كثيير للرجال

بس قلت بنفسي الرجال بداله الف رجال .. اختي مابدالها احد ومابي اخسرها او اجرحها.. ربي بيعوضني
حسمت الموضوع وقلت لاخوي مابي اتزوج قبل اختي .. ومابي من عائلة صاحبك
لاني خفت ينشب لي قدامها ان الزواج قسمه ونصيب وو.. ويضيق صدرها ..
حطيت عائلة الرجال سبب ثاني ، مع انهم والنعم فيهم

اخوي ما اقتنع كثير بالعذر
وبلغت امي ب ردي .. قالت لهم البنت بتكمل دراستها ( بس اتوقع فهموها انها تصريفه )

واخوي ما تجرأت اسأله بعدها وش قال لصاحبه او كيف ردت فعله




ومن يومها انا ارد الخطاب اللي يجون .. واحلف على امي ماتقول حرف لاختي عنهم

وموضوع صديق اخوي ما انفتح ابد ..
بس فيه مره بعد موضوع الخطبه بسنتين يمكن .. ماذكر ايش الموقف اللي انا سويته ..
بس أذكر اخوي ضحك قال ( صدقيييني انتي ما يناسبك الا فلان صديقي .. لو تطيعيني والله اكلمه.. تراه مابعد تزوج ) ..
قلت لا ماراح اتزوج قبل اختي ، وجهي صار احمر وجلس يضحك علي

عدت سنه ورى سنه واختي نفسيتها تتعب اكثر واكثر وانا قلبي يحترق عليها اكثر واكثر
والناس ماتقصر

لدرجة بيوم.. (خالة أمي) قالت لأختي ..
(( اذا مافيك عيب أجل أكيد تتشرطين ، بكره تصيرين خدامه لحريم اخوانك عقب عين امك وابوك ))

كلمتها ذبحتني وانا مو صاحبة الشأن .. خفت على اختي اكثر
صرت اقول بنفسي اذا هي ماتزوجت انا بعد ماراح اتزوج .. ماراح اخليها ..
شلون اتزوج قدام عينها .. احس اني اسرق فرحهه هي تنتظرها سنين
شلون بفرح وانا بكون سبب افتح كلام الناس عليها من جديد ..

واستمريت أرد الخطاب واترجا امي ماتقول شي قدام أختي .. مع ان اختي اغلب المرات تدري وماتعلق



قبل كم شهر .. (عدت 5 سنين من بعد الخطبه) .. صار عمري ألحين 28 وعمر اختي الكبيره 35
انخطبت اختي الكبيره لواحد من قرايب (زوجة خالي)
رجال ملتزم وامام مسجد وكانت بوادر الموضوع انه بيتم ..
كنت بطير من فرحي لها ..

و بيوم وانا اسولف معاها قالت لي
(( اول ما اتزوج ماراح اخليك والله بخليك ترتزين معي عند حمولتي وبكل مكان
واصلا من اتملك ماراح اخلي خطابه الا بكلمها عشانك .. ما يمر كم شهر الا انتي في بيت رجلك ))

دارت فيني الدنيا من كلامها .. مدري ليه انخنقت ؟؟..
صرت افكر اقول بنفسي لا مابي الا فلان (صديق اخوي) ..
انصدمت من نفسي وش جاب طاريه على بالي .. شلون انا متعلقه فيه ومتى
انصدمت ليه كذا تضايقت اني ممكن ارتبط بغيره

ومن بعد كلمة اختي وانا كل ليله أبكي وأدعي ان ربي مايكتب لي نصيب الا معه
(هو ماتزوج لسى)
واختي علقت معي كذا مره اني لازم اكون احلى وحده بزواجها عشان انخطب بعدها على طول
واني مو صغيره خلاص وماراح تخلي خطابه الا تكلمها عني و و و

وامي صارت قالت لا خلاص من الحين نكلم خطابات لا ننتظر و و
حتى امي كانت شايله همي لاني ارد الخطاب مع مشكلتي الصحيه ، وتبيني بسرعه اتزوج مع اختي

وانا نفسيتي صارت تتأزم اكثر و اكثر .. ضعفت شهيتي مررره
وتنومت بالمستشفى مرتين (ضعف عام)

تعبت نفسيتي وصرت كل ماصليت أبكي وادعي ..
صرت اخاف بشكل فضييع ان احد يخطبني واهلي يضغطون علي ..

شلون بقولهم مابي لاني أبي فلان ، مابي لاني خايفه اتزوج غيره !!
مابي لاني تعلقت فيه من كلامكم عنه .. مقدر اقول وربي ...

تذكرت قبل لما اسمع اخوي يسولف مع ابوي او عمي أو احد من اخواني
ويجي طاري صاحبه اللي خطبني
، كنت اسوي نفسي لاهيه بجوالي وانا مركزه بكل حرف يقولونه عنه
بس ماجا في بالي اني تعلقت فيه .. توقعت انه فضول مو اكثر



بعد كم أسبوع اختي موضوعها تفركش ومايحتاج اقولكم كيف صارت نفسيتها .. اسوء مليون مره من قبل .. وصارت عصبيه مررررره

وانا نفسيتي تعبت..عشانها وعشان كلامها .. وشخصيتها معي تغيرت كثير من بعد ماتفركش موضوعها ..
صارت ترمي علي كلام على أي سبب واي موقف حتى لو سخيف و تتعمد تنكد علي ،

يمكن لانها تدري اني حساسه وبتقدر تغثني بسهوله

ما لمتها ومتحمله كلامها .. اطنش ردودها واضحك واسوي اني عادي مرره
صرت اخذ ردودها بكل ببرود ولا كأني انجرحت من كلامها ..
بس والله بغرفتي ما امسك دمعتي من اتذكر كلامها

بعد موضوعها خطبوني ناس وقلت لامي مابي .. قالت ل متى بتردين ، افرضي اختك ماكتب لها ربي نصيب !
صرت اختنق من اسمع اني انخطبت ، اتذكره على طول ..
كرهت طاري الزواج و الخطابات وتعبت نفسيتي..

وصرت افكر فيه كثييييير


ومره قبل شهر كنت اسولف انا واختي (مع بنت عمتي) ..
كانت تحكي قصة وحده جلست سنوات ترفض الزواج ماتزوجت عشان اختها المريضه
و بعد سنين تشافت اللي كانت مريضه وتزوجت ووتركت اختها وصارت ماتزورها الا نادرا..
والثانيه خلاص ماقدرت تتزوج لانها كبرت ، واقل جمال من اختها

قالت اختي ( خرافات ، ما اصدق فيه وحده ممكن تضحي بالزواج وان يكون لها اسره واطفال عشان اختها .. حتى لو هالاخت مريضه ..
اكيد الاولى كانت عايفه الزواج ومو السبب اختها المريضه.. واساسا مالوم المريضه اذا تزوجت ،
هي ماجبرت احد يجلس ينتظرها ، اختها قررت ماتتزوج بإرادتها تتحمل النتيجه )

انصدمت من كلامها .. !! .. انصدمت كيف هي كذا تفكر .. حسيت بمبدأها الزواج اهم من الاخوه


هالشي خلاني افكر بصديق اخوي اكثر .. والشيطان ماقصر صرت افكر معقوله ضيعت من يدي فرصه ؟
طيب لو كانت اختي محلي وانا بمحلها .. هل ممكن تنتظرني ؟ والا بتاخذ الفرصه اللي جتها

وارجع استغفر اقول انا سويت هالشي عشان الله.. وابليس يبي يتعب نفسيتي
الله اعلم بنيتي ليه اضيع اجري واجلس اوسوس .. بس احيانا غصب لما تجرحني أجلس أفكر كذا

نفسيتي والله تعبت وكل يوم يمر اخاف اكثر .. اخاف احد يخطبني واهلي يضغطون علي ..
ولا اقدر اقول حرف عنه لاخوي او أي احد .. والله اموت ولا يطلع مني حرف ..

تخيلوا بعد هالسنين أقول أبي فلان !! طيب يمكن فلان شالني من باله
اخوي بيلاقيها فرصه يتشمت فيني واني ما اخذت برايه وقتها و و و

خصوصا اخوي طلق زوجته وتزوج وحده ثانيه وغيرت شخصيته من خذته
صار يشيل علينا كثير .. وزاد العتب والمشاكل ..
( خصوصا معي انا واختي الصغيره اللي بإبتدائي )..
مايصدق يمسك علينا موقف

كان اقرب لي منهم كلهم بس سبحان مغير الاحوال ، حاولت اقرب منه بس بدون فايده ..

تغير علي كثير وحتى اذا كلمته احيانا يتعمد يحقرني ومايرد واذا مسك علي سالفه يتشمت فيها.. ما يقصر
عشان كذا هو بالذات ماقدر اقوله حرف .. ولا اقدر اقول لاحد

هالشي تعب نفسيتي زياده
تعبت اكتم بقلبي .. صرت احس بضعفي
مالي حيله
مالي الا رب العباد ابكي وادعيه



اختي لاحظت ان نفسيتي تعبانه.. واتوقع انها فاهمه ان السبب
(انا مليت من وضعها وابي اتزوج ماعلي منها وعشان كذا نفسيتي تعبانه)

يمكن عشان كذا تغيرت علي وصارت تحاول تجرحني علي أي سبب !!

مره كنت مشغله فيلم كرتون لولد خالي وشافتني ..
ضحكت قالت افلام كرتون!! صدق انتي وين والزواج وين

ومره كنت مستعجله بسأل امي عن مكان غرض بالمطبخ ..
نطقت اسم الغرض من العجله غلط
((طالعتني اختي بدون نفس قالت الله يخلف على الرجال بياخذك ،
وش هالرفاله!! انتي قدامك عشر سنين ويااالله الواحد يقتنع انك تصلحين للزواج ))

ومره اعطتني مويه مقري فيها جايبتها (خالة امي) .. مدتها لي قدام اهلي وهي تبتسم بشكل غريب ..
قالت اشربي اشربي ترى جد حالك مو طبيعي لا زواج ولا وظيفه ونفسيه تعبانه.. كانت تبتسم بغرور وتراقب ردة فعلي


تعليقاتها تتعب نفسيتي.. اقدر اعلق بالمثل واتعب نفسيتها من مواضيع معينه بحياتها ..
بس مابي ، .. مو أنا ولا شخصيتي كذا...

اقول يارب ان كان صبري عشانك ف جازني خير وعوضني بالرجال اللي ابي




المصيبه اللي دمرت نفسيتي ، سمعت من بنت جيرانا
ان امه (صديق اخوي).. تبيه يتزوج

والله يابنات ماقدر اخذ غيره .. ولاقدر اطلعه من بالي
اذا تزوج مدري وش بيصير فيني
ماعمري تعلقت برجال ، ولا حتى فنان !!
اول مره يصيرلي كذا

وامي كل شوي تعيد علي متى بتتزوجين ، ومتى بتتزوجين !!

حالتي مايعلم فيها الا ربي
يارب ارحم ضعفي .. لو انا رجال بقدر اقول أبي فلانه
بس مالي حيله يارب
والله ما سعيت اتعلق فيه ، غصب عني.. ولا بيني وبينه شي .. ماعرف عنه الا كلام اخوي وعمي



ادعولي تكفون وعطوني رايكم
بنات لا تخلوني تكفون .. مالي غيركم بعد الله

الله يرزقها الرزق الجزيل واللي تتمناه اللي بترد علي



،
102
25K

هذا الموضوع مغلق.

@شجرة الدر@
@شجرة الدر@ •
باختصار
ودون تعليق ..أترك التعليق لغيري من الأخوات

دعوت الله لك بصدق وبظهر الغيب ونحن في ثلث الليل الآخر
أن يرزقك إياه زوجا عاجلا غير آجل ويبارك له فيك ويبارك لك فيه ويرزقكم الذرية الطيبة المباركة

أختي ألحي على الله بالدعاء واطرقي بابه
وأكثري من الدعاء بأن يلهمك رشدك ويقيك شر نفسك

أسأل الله أن يوفقك ويؤجرك وأن يجزيك حسن صنيعك مع أختك
نور حياة زوجي
نور حياة زوجي •
الله يسامح أختك إذا انتي رضيتي تضحي عشانها مفروض هي ماتضحي بفرحتك عشان كلام الناس..الله يسعدك ويرزقك بيه زوج صالح ويرزقها بالزوج الصالح ويهديها
انثى العقرب
انثى العقرب •
كلمي اخوك وش تحترين؟!

اعملي بالاسباب واسعي في رزقك دامه خطبك ورديتيه عشان اختك اشروحو له الوضع يمكن بعده يبيك ولا تسوينها سالفه حيّا وكرامه وخرابيط. استعجلي وتزوجي وماعليك من اختك صبرتي كثير ماقصرتي
حمامة الخرج
حمامة الخرج •
   الله يكون بعونك يارب 

  ليش اختك ردها كذا ليش تغيرت ...يمكن تبيك تتغيرين رايك
وتوافقين ع الخطابة .
الله ييسر امركم يارب وتفرحن يارب 
مداريم
مداريم •
انثى العقرب انثى العقرب :
كلمي اخوك وش تحترين؟! اعملي بالاسباب واسعي في رزقك دامه خطبك ورديتيه عشان اختك اشروحو له الوضع يمكن بعده يبيك ولا تسوينها سالفه حيّا وكرامه وخرابيط. استعجلي وتزوجي وماعليك من اختك صبرتي كثير ماقصرتي
كلمي اخوك وش تحترين؟! اعملي بالاسباب واسعي في رزقك دامه خطبك ورديتيه عشان اختك اشروحو له...
ب يتشمت فيني
بيقول احسن ليه عاندتي وماخذتي برايي

هو متغير علي كثير بسبب زوجته الله يسامحها ..
بيلاقيها فرصه يتشمت فيني ويضايقني
وعناد فيني ماراح يكلمه .. بيحقرني ويذلني على هالسالفه
و زوجته بتلطشني بكلمتين

و حتى لو بيكلمه .. والله استحي اقول لاخوي رح اسأل الرجال اذا يبيني او لا
والله اموت ولا أسويها .. مقدر

...
يارب لا تكسرلي نفسي ولا تشمت بي أحد
يارب لا تجعل رزقي بيد احد من خلقك
يارب مالي غيرك




تغيرت علي لانها حاسه اني أبي اتزوج قبلها
صارت تحاول ترمي علي كلام اني ما اصلح للزواج ومو قد المسؤوليه و و
لانها تبيني اشيل فكرة الزواج من بالي