بنات ساعدوني وش اجهز للنفاس كل وحده تقول كيف بتجهز

انا اشتري كل شي للبيبي من عند موذر كير اطقمه حلوه كثير وناعمه عالصغار ومريحه لهم
وانا بجهز لي جلابيات وشالات للراس مناسبه مع الجلابيات وملابس داخليه واهم شي السراويل الطويله لان ولادتي بعز البرد بالنسبه لسرة الطفل مااعتقد انه زين تحطي عليها كريم لانه يطريها انا احط عليها مسحه طبيه وبس عشان تنشف بسرعه وتطيح واذا طولت اروح للطبيب يكتب لي موية اكسجين تعقم المنطقه وبودره تنشفها وتطيح بسرعه وادوية المغص استغني عنها واعطيهم بس يانسون ولي انا كريم للحلمه عادة استخدم افالون لأنه عادي لو ماغسلتيه زين من الحلمه مايضر الصغير غير الفازلين والبودرات والشامبو للبيبي انا افضل بيجون ريحته حلوه وناعمه
وفيه اشياء كثير مااذكرها الحين
بس بالنسبه للعطار ماانصحك تاخذين منه علاجات خذيها من حرمه تكون ثقه وتعرف في علاجات الحريم

انضم لك انا جهزت للببي مثل ماقلتي وجهزت لي باقي الاشياء اللي ناخذها من العطار ياليت البنات يساعدونا

العطار........انا اخذت كل شي حب كامل ونظفته بالبيت
المره.الكمون.الارطا.حبه سوداء.حلبه.وهكذا انتي ورغبتك عندك استعداد تاكلينها كلها او لا
وبالنسبه لي والبيبي من مذركير كله قطني على الرغم من الشتاء على الابواب

مرحبا كيفكم
ترا انا ماعندي خبره بهالشغلات بس

حبيت افيدكم باللي عندي توني سويته وعرفته اليوم بخصوص العطار لان اول نفاس لي بس ام زوجي كتبت لي كل الادويه المفيده حقت النفاس
وانتي اشتريها من العطار ونضفيها بالبيبت غسليها ونشفيها
واستخدميها
قرص القمر
ولوك الصدور
خزامه
شيح
يانسون
شمر
كراويه
نانخه
حلبه
محلب
كمون
رشاد شرقي
غراء
مر
عسل
قرض
دباغ
ارطا
قشر رمان
كلهم اخذيهم من العطار
فيه اشياء تاكليها وفي اشياء تحطينها بطشت وتقعدين فيها
الدباغ وقشر الرمان والقرض تغلينه وتبردينه وتقعدين فيه
والارطا تغلينه مع ملح فارسي وتتغسلين فيه

بس هذي المعلومات اللي عندي

والعطار عطاني بخور يقول حق النفاس بس شكله غرررررريب
وادعو لي الله يسهل لي ولادتي

شوفي حبيبتي بقولك تجربتي وهي بسيطه جدا من حيث العطاره
كل شي جبته من عند العطار حب وغسلته في البيت ونشفته ووزعته بعلب (أنصحك بعطاره بن منقاش )شغل مرتب
برنامجي :
الصباح
أحط في ترمس (زمزميه )مويه حاره وحط معها حلبه +كمون=حب ملعقه صغيره حلبه وقليل كمون
أصب من المويه بعد ماتنقع في كأس فيه حليب وعسل وأكل معه حنيني مع حبه سوده
والترمس هذا اخليه جمبي كل ما حسيت أني جايعه أشرب حليب مع عسل وأكل أي شى بر
الظهر
أكل مرقوق أو مطازيز أو مرق خضار مع ماش+ ارش عليه فلفل أسود
العشاء
شوربه أو مراصيع بالعسل او بالحليب
(أنا ما أكل حبه سوده)
الابتعاد عن أي شي حامض أو لزج (ملوخيه - باميه)
طبعا لاتنسين التمر

بالنسبه للعنايه الشخصيه
خوذي علبه موية صحه فاضيه وشفتي الغطاء الي فوق سوي فيه فتحه حطي سكينه على النار لين تحتر وبعدين حطيها على الغطاء عشان تسويين فتحه وبعدين غسليها وحطيها بالحمام والصبح اذا قمتي حطي في العلبه ملح خشن + ارطى(غير مطحون) وعبيها مويه ساخنه وتركيها بعدين كل مره تدخلين الحمام بعد ماتغسلين المنطقه شطفيها بمويه العلبه ولاتغسلين بعدها بس مسحي بالمناديل وأذا المويه بارده زيديها مويه حاره لانك بتولدين في الشتاء(لان غلي الارطه شغله ولا أبي أغلي كميه وأخليه أحسه بيعفن)
أتمنى أنكم تستفيدون