بنات شوفوا وش صار معي في وجوه

مساء الخير صبايا



بدخل في الموضوع على طول و بقول لكم وش صار معي أمس في وجوه


أنا رحت امس للعثيم مول على طريق خريص و دخلت وجوه كنت أبغى أرواج من لانكوم



أخذت من لانكوم روج و قلوسين و طلعت فريت في السوق شوي بعدين جلست



طلعت الأرواج و ناظرت تاريخ صلاحيتها و طبعا لانكوم يكتبون تاريخ الانتاج و الانتهاء بخط كبير و واضح



القلوسات كانت تواريخهم جديدة أما الروج كان منتج من سنتين و نص وباقي له 6 شهور بس و يخلص


فقلت حرام بس 6 شهور خليني أرجعه و آخذ روج ثاني يكون تاريخه جديد


رجعت المحل و رحت عند ستاند الماركة وجاء البايع المسؤول عن ماركة جيفنشي


بصراحة انسان جدا راقي في تعامله و قلت له السالفة قال لي خلاص راح أبدله لك


دور لي على نفس درجة الروج و كانت 104 و ما لقى بس كان فيه روج رقمه 106 و نفس اللون بالضبط


قلت له خلاص اعطيني 106 لان تاريخه جديد


و رحت عند الكاشير عشان أبدله


قال لي المحاسب استخدمتي الروج ؟ قلت له لا أساسا توني شاريته من شوي بس ببدله عشان تاريخه


قام فتح الروج و شافه قال لي : لا مدام أنتي مستخدمته أساسا الجديد يجي مصقول و هذا واضح فيه الاستخدام


قلت له : و الله ما أستخدمته و لا رجعته الا عشان تاريخه وان كان مستخدم فمنكم مو مني


قال لي : أنا برجعه عشان حلفك و الشركة ما تعترف بالحلف بس برجعه لك وهو مستخدم و قعد يتفلسف علي


المهم انه ما صدقني أبدا


قلت له : أنت أعطيتني الآن فكرة عن المحل


قال لي : كمان فوق ماني مرجعه لك


يعني الاخ يبغاني احب رأسه لأنه رجعه لي






و أنا والله يا بنات يشهد علي ربي أني ما لمست الروج أبداااااااا ولا همتني قيمته


و لاني حالفة بربي كذب عشان 125 ريال


بس اللي قهرني انه ما صدقني و اللي قهرني أكثر انهم يبيعون الروج للناس على انه جديد و هو واضح انه مستخدم


على العموم أنا أخذت درس اني ما أشتري أي روج الا لما أفتحه و أشوف اذا كان جديد و الا لا


بس اذا كان قلوس كيف بنعرف انه مستخدم ؟


حسبي الله عليهم شوفوا لحد وين وصل الجشع و الاستغلال و الكذب على الناس



أتمنى انكم تنتبهون يا بنات اذا جيتوا تشترون من عندهم أو من غيرهم