راجية رحمة الله @ragy_rhm_allh
عضوة جديدة
بنات .. صابونة من حراز فادتني قوي
السلام عليكم
ازيكم يا بنوتات يا قمرات
انا اول مرة اكتب موضوع عشان افيد بيه حد و انا عموما مشاركاتي قليلة بس قلت لازم اقولكم زي ما باخد منكم
انا جربت صابونة من عند حراز حلوة قوي هي بطمي البحر الميت و انتوا طبعا عارفين اد ايه مفيد و كمان ممكن تستعملوها زي ماسك يتساب علي البشرة شويه لو فيها حبوب كتير و كبيرة. بصراحة انا بعاني من بشرة مختلطة من حوالي 10 سنين مشفتش فيهم بشرتي صافية يووم واحد و جربت حاجات كتير منفعتش , و بعدين وانا عند حراز سألت علي صابونة كويسة اللي بيبيع هناك رشحلي الصابونة دي و قلت اجربها هخسر ايه يعني .. الصابونة اسمها " لا في " " la vie" بالفرنسية . هي صابونة انتاج مصري من الشركة المصرية للادوية هي طبيعية مش طبية و فيها طمي و معادن البحر الميت . الصابونة دي خلت بشرتي مشدودة و ناعمة و بتنظف البشرة حلو قوي و متخليش فيها دهون . اللي بشرتها عادية هتنشفها شوية بس هي عموما منشفتش بشرتي علشان دهنية . الصابونة دي خلت ميطلعليش في وشي حبوب والا قليل قوي لما اكل شكولاتة مثلا او اشرب بيبسي و انتوا عارفين الاتنين بيعملوا ايه . بس بشرتي اتحسنت معاها كتير و مبقتش دهنية قوي زي الاول . انا بستعملها مرتين في اليوم مرة الصبح و مرة لما ارجع من الشغل و يفضل طبعا انكم تستخدموها قبل النوم كمان بس انا كسولة شوية . الصابونة سعرها 4.5 جنية مصري مش غالية وممكن تطلبوها من مندوبين حراز اللي في المنتدي و اكيد كمان بتتباع في اماكن تانية في مصر بس انا مدورتش في حته تانية . وفي كمان شامبو حلو للقشرة عنده حراز بس ده بقي من انتاجه و بالاعشاب .. بصراحة انا اول ما استعملته مجبش نتيجة و بعدين فكرت اضيفله خل تفاح فبقيت كل ما اجي اغسل شعري اضيف شوية خل حوالي معلقة ضغيرة علي الشامبو و اخففهم بميه و اسيبهم علي شعري من 3 الي 5 دقايق مش اكتر . و استفدت كتير من الطريقة دي .
يا رب اكون افدتكم و اسفة اني طولت كده بس حبيت اقول كل حاجة و اللي تحب تسأل تبعتلي . و امانة يا بنات اللي تقرا موضوعي تدعيلي ربنا يشفي امي و يفك كربي عشان و ينولني اللي في بالي ,,, انا في مشاكل كتير و واقعة تحت ظلم ربنا اعلم بيه .
يا لا سلام
17
5K
يلزم عليك تسجيل الدخول أولًا لكتابة تعليق.
راجية رحمة الله
•
بجد مبسوطة منكم كلكم 48 واحدة دخلت الموضوع و محدش حتي قال شكرا من ورا قلبه عموما انا اللي شكرا طيب حتي كنتوا ادعولي وبلاش شكرا .ز ده كان اول موضوع ليا و مفيش اي تشجيع
nour-mam
•
شكرا ليكى على المعلومات الحلوه دى وخاصة شامبو القشره حاشتريه ان شاء الله واجرب طريقتك يارب بقى القشره تمشى من شعرى لانها زهقتنى اوى
ربنا يشفى لك امك ويفرج همك وكربك وينولك اللى فى بالك
ويرفع الظلم عنك آمين
ربنا يشفى لك امك ويفرج همك وكربك وينولك اللى فى بالك
ويرفع الظلم عنك آمين
الصفحة الأخيرة