هلا والله ام حمد اخبارك عساك دوووووووووووووم طيبه
مرحبا ام خلفوه ان شالله ادعي لنا ياختي
ام حمد مرحبا والله بطلتك عسا ماننحرم من سوالفك
بااااااااستا يالله ياحلوه اتحفينا بمقاديره (علشان ماحد ياخذها علينا عجز) خخخخ
لا من جد احس انها حلوه وابي اجربها

ام حمد ما تقصرين فديتج بس امس كنت بانبط من الحره اليوم صرت اهدى شوي يا طويلة العمر ياتني مريضه ومعاها امها البنت دلوعه شوي بس شوي شوي قعدتها وعطيتها الابره طبعا سويت لها قصص وغمضت عينها والحمد لله ما حست بشي يوم يات الام وقعدت وبدت: فديت بنيتي ايه على بنيتي وحالتها حاله وترتني والبنت بعد حصل لها حد يدلعها قامت لا انا ولا من قعد اسالها يعورج شي تقول لا عيل شفيج؟ تقول مابي اقعد .. المشكله يا بنات ان الي سويته لها قسما بالله شي بسيط حشوة صغييره وعاديه ومافيها الم والبنج شغال والله يشهد نقطه دم ما طلعت بس عاد الام بدت تدلع والبنيه تتدلع وتعال فجج طول الوقت اتنهوص مره تسوي روحها شرقانه ونحط لها الشفاط ماتبيه يعني الصراحه في اهل وجودهم ما يساعد الا الواحد يبيله يهديهم ويهدي الياهل .. بدل ما اخلص معاها في نص ساعه خلصت في ساعه يمكن اشتغلت ربع ساعه وساعه الا ربع احايلها .. وفي الحلقه الاخيره اطلع انا المجرمه يعني مادري شمستفيده انا من هالشغله من مصلحتها ان بنتها تقعد وينحشي ضرسها ومب غلطتي انه مسوس .. والا انا معاشي باخذه باخذه اخر الشهر .. ...مادري السالفه تحر والا انا مكبرتها. شرايكم؟.. المهم ان الموضوع عدى بسلام وسويت لها ضرسين ونويت نيه ان الام باطلعها بره ان ياتني مره ثانيه ..

والعكس صار معاي اليوم صاير دوامي اكشن ياني ولد ويصيح وينوح ما يبي يقعد على الكرسي اشوف ضروسه يرضى اي شي ثاني لا ..وياه ابوه .. فجأة عصب الابو وضربه ضرب والله يا بنات بوكسات على راسه ييت اسحب الصبي من تحت يده وتييني ضربة من الابو بالغلط طبعا طيرني يمكن مترين
واعتفسنا يات دكتورة ثانيه وممرضه يالله يالله قدرنا نيود الابو لا يطق ولده .. انا الي ياتني الصيحه زين الي مسكت عمري ما صحت جدام الصبي والله خفت عليه اذا طلع وياه شبيسوي فيه ... الله يستر والمسامحه اذا طولت عليكم

الغاليه في بلجيكا ما تخلون الام مع الطفل معروف بيدلع
بس انتي احتسبي الاجر خبرك هالقطر مدلعين ويتوقعون كل حد يدلعهم
اما الولد مسكين على هالابو العصبي طق واسنان الله يعينه
شوفي نصيحه لله لو حطيتي عندك استكرات ونفافيخ لله اول ما يدخل ياهل قولي له لو شاطر باعطيه وطلبي من الاهل عقبها يطلعون علشان كسب الثقه خبرك كل حد يسب مستشفاكم

طبعا هذا كله لله ادخال فرحه في قلب مومن
انا لي تجربه مع المرحومه كانت تعاني جاتها تسوي لها تحليل نسبة الاكسجين وهي يهدها كلها ظربات ابر حاولت في ثلاث اماكن ما قدرت من الضعف قلت لها ممكن وحده غيرك تقدر

تعرفون وشو ردها اذا من عاجبك نكتب في الملف رافضه وما نسويه
تصوروا هذي بنت بلادي انا مع امي تحتضر بهالاسلوب الغير حضاري
رديت عليها لا نبغي التحليل لان حالة الوالده ما تستحمل نقل ولا فيه الامكانيات في مكان اخر
تصوروا هي نفسها الي اكتبت شهادة الوفاه
اخواتي كل ما تذكر موقفها اقول متى سنجد جنود يعملون في هذا الوطن لله
كل ما اتذكر موقفها اقول ربي لا تجعل في قلوبنا غلا للذين امنوا خوفا ان تبقى في نفسي ذرة غل او حقد الله يسامحك يا فاطمه ويغفرلك فكم من الضعاف مثل امي وقفتي لهم وحاسبتهم
وخيرتيهم وهم لا يملكون الاختيار
والله يا اخواتي انها مسكينه
اختي لون المطر الجنه بين يديك من خلال عملك انت موظفه وياخذين راتبك ولكنك تستطيعين به دخول الفردوس الاعلى
مكانك مخاطبة فئات منوعه من البشر كل واحد له فكر معين من الحكمه ان تحاولين فهم نفسياتهم لتدخلي بهم الجنه واخلصي النيه وفقك الله

اخواتي موضوع عجبني

------------>>>>>>> على العباءة ( أتحـــــــــداك تلمسني ) !!!!!

إلى هذه الدرجة وصلت بالفتيات أن تقوم إحداهن

بكتابة تلك العبارة

" أتحدك تلمسني "

على عباءتها

هذا ما تفردت به جريدة اليوم يوم السبت الماضي

وقد كانت تلك العباءة في أحد الدول المجاورة الخليجيه

والله يستر شكلها بتدخل الأسواق عندنا




وبعدين ...............

وش آخرتها ..................

نجيب الشر لنا ............ وإلا ايش ..................

لهذه الدرجة .................

وش بقى ..............



يقول الله تعالى : ( وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا )

ومعنى إلا ما ظهر إي : ما ظهر بدون قصد

وأيضا : ( وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاء بُعُولَتِهِنَّ
أَوْ أَبْنَائِهِنَّ أَوْ أَبْنَاء بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي
أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُوْلِي الْإِرْبَةِ
مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاء ) . النور

فلم يقل الله تعالى في الشارع وأمام الناس وفي الأسواق

نسأل الله السلامه

لون المطر والله شغلج يونس....كله أكشن!!!!
الله يعينج عاد مابغيتي إلا تعالجين يهال
وعليه على عيالي....من كثر ماوديهم دكاترة الأسنان(من يوم هم 4 و3 سنوات) يقعدون على الكرسي بدون صوت ولا يتكلمون إلا لين خلصوا
بس يقولون.. مانحب أبرة النملة!!! يعني البنج