الشغالة مو متزوجتكم عشان تعدل بينكم !!
غير كذا انتي دقيقة مرررره اجل تدققين على الساعة؟ ولازم تنظف ورا عيالك قبل ماتروح !!
انتي ملزمتها بيوم ايه ويوم لا , خلاص اليوم اللي مو لك ماتنظف عندك , شوية رحمة يا اختي
انتي عندك ورم الله يشفيك ويعافيك وتحسين بالتعب , طيب حسي بهالمسكينة اللي تكرف في بيتين وازعاج عيال هنا وازعاج هناك , وبالأخير تلقاك تدققين عليها على الساعه والدقيقة !!

والشغل الثقيل طبيعي تتأفف منه وماتبي تسويه , لأنها تكرف في بيتين وتعيد نفس الشغل كل يوم , ونفس الصجه كل يوم ونفس العيال المخربين كل يوم
انتي جيبي لك شغالة ايجار 4 ساعات مرة بالاسبوع عشان الشغل الثقيل
وشغالتك المشتركة اكرميها ومابتشوفين منها الا كل خير , اكرميها كل شهر , شهر بطاقة تكلم فيها اهلها , شهر لبس جديد , شهر عطيها 100 ريـال زيادة على راتبها

تراها اولاًَ واخيراً انسانة تطفش وتتعب وتنغث , وشغل الشغالات مافيه اتعب منه , لأن الموظف يدوام 8 او 10 ساعات ونادر يداوم 12 ساعة ولا داومها ياخذ مبلغ زيادة على الراتب
غير ان الموظف يبداً بشغله ويكمله مايعيده كل شوي زي الشغالة , وله تقاعد وله ايام اجازات , وله شهر سنوياً اجازة براتب
بس الشغالة لاا عساها ماغلطت غلطة صغيرة الا خصموا عليها , وعسى ماقصرت شوي بشغلها الا سووا لها النون ومايعلمون كأنها آلة مو بشر !!

الرحمة يا اختي الرحمة
وتذكري قول الرسول عليه افضل الصلاة والسلام ( اخوانكم خولكم جعلهم الله تحت أيديكم فمن كان أخوه تحت يده فليطعمه مما يأكل وليلبسه مما يلبس ولا تكلفوهم ما يغلبهم فإن كلفتموهم فأعينوهم )

والترتيب السريع ورا عيالك الصبح ماعليه رتبي , حتى اللي عندهم شغالات لهم لحالهم يرتبون ورا عيالهم , تصحى الشغالة وكل شي مرتب زي مانامت وتركته مرتب
وعيالك علميهم يرتبون وراهم , مافيها شي لو تساعدتوا , انتي وانتي امهم تشتكين وتقولين عيالي كثار فكيف هي ؟

حرااااام خدامه لبيتين وتشرهين عليها بعد
دامك تقولين عيالك اكثر وبيتك اكثر شغل معناه الضعيفه تعبانه وبتنزل ترتاح
ارحموها شوي تراها بشر مهب آله

والله كان من البدايه ريحتي راسك وقلتي ابغى شغاله الحالي خاصه فيه انا اقول طنشي وسايريها لاتسحب عليك مره وحده وماتجي وانت تعبانه ومحتاجه الله يشفيك .