بنات قولو لي بصراحه هل اللي فيني دلع

بسم الله الرحمن الرحيم

بنات الواحة العلمية وخواتي في الله ....انا محتاجة رايكم بهالمشكلة اللي بعرضها ..واللي مك
مافكرت اني اطرحها عليكم الا لثقتي التامة برايكم ولحاجتي الماسة له...ابدا بمشكلتي:
انا يابنات مدرسة حاسب آلي في مدرسة خاصة وأعاني كثيرررر من ضغط الشغل وراح اقولكم الحين اعمال وانتو احكمو وبكل صراحة:
1- أقوم بتدريس مادة الحاسب الآلي لجميع المراحل من الصف الاول الابتدائي الى الصف الثالث الثانوي بمعدل 15 حصة في الاسبوع وصحيح ما في الا صف واحد من كل مرحلة لكن يكفي اني احضر الى 12 منهج في دفتر التحضير وملزمة بذلك وفي موجهة تحاسبني بدقة على تصحيح كتب البنات لكل المراحل هذا بالاضافة الى دفاتر الثانوي ومنهج اول ثانوي انا اللي احطه بأوراق عمل وغير اوراق العمل الخاصة بالمراحل الثانية واختبر الثانوي يعني عندي اسئلة وتصحيح ...وهذا كله كوم والتشتت لما اعطي حصة لول وآه من ابتدائي وصعوبة تعليمهم وبعدين اروح لحصه في متوسط ولا ثانوي....
2- أقوم بعمل جداول الخاصة بالاختبارات وبداية السنة والمناوبات يعني يمكن اكثر من 80 جدول ووالله بدون مبالغة وطبعا اعادة الشغل ممكن تسير مرتين وثلاث بأ.خطاء انا مالي ذنب فيها
3- برنامج معارف ماسكته كله لجميع المراحل تخيلو ماحد يساعدني بشي ولما طلبت مساعدة حطو وحدة تنقلني فقط وطبعا هذا مايخفف عني الشغل لأني ابغا وحده تساعدني بانها تمسك مرحلة على الاقل وطبعا معارف ما هو بس ادخال درجات...هو ادخال بيانات بطاقة العائلة كاملة والاخوة ومستواهم الدراسي والام والاب وعملهم ومستواهم والسكن والبيانات الصحية والاجتماعية والغياب وووو.....ونفس الكلام للمعلمات وزيادة للمعلمات الاجازات والاعذار الطبية وهذي البيانات كلها لو نقص شي واحد بسيط يعني خانه وحده في طالبة ماعبيتها يرجعوني التوجيه عشان ادخلها لنهم يراجعون كل شي بدقة....وطبعا في معارف حاجات غير كذا بس هذا اللي اذكره....
وطبعا الشهادات ممكن تنعاد مرتين وثلاث واربع واضطر اعيد عشان معلمة زودت بنت في الورقة بعد مادخلتها بدفتر العلماات وعلى ذا لحال دخلي واطبعي ويمكن تهون المشكله شوي مو كثير لو كانت الطابعة زينه وتقبل تاخذ كذا مجموعة اوراق مو اظل واقفة عليها وادخل ورقة ورقة ..لا تقولون لي تكلمي والله اني تكلمت لكن من غير فايدة مو راضين...واذا سار تحديث في البرنامج ماتشوفوني الا شايلة كمبيوتري ونزله من الدرج انا لوحدي لني ماحب اتامر على العاملات واوديه وارجع المدرسة والله شقا....
4- ومع الضغط هذا كله عندي حفل التخرج عرض كامل بالكمبيوتر للمدرسة كلها و عندي مناوبة يوم في الاسبوع في الفسح واذاعة وانا عادي احب الاذاعة وممكن ادخل حصص انتظار وممكن ينضاف علي أي شغل جديد بالكمبيوتر معلمه تبي ورقه موجهة تجي تبي اوراق نسوي لها مع انه انا ايش دخلني بشغل الموجهة مو هي ملزمة فيه وفي آخر الصفحة بينكتب اسمها على انها هي اللي مسويته وليه انا اللي يعطوني اياه مع انه في كذا وحدة يشتغلون عالكمبيوتر ومو مدرسات واهما مكروفون بعد بس مدري عشانهم مايدرسون احس انه هذا حمل ثقيل منزاح من عليهم....
وتخيلو عاد النفسيه بعد هذا كله اسير متنرفزة ولما ارجع البيت مابي اتكلم مع احد والله اني العام كنت ارجع البيت اصيح بس استحملت عشان ماحد يقول علي دلوعة ومني راعية شغل احس هذا الشي ينقص من ثقتي بنفسي لكن والله فاض فيني ومعد اني قادرة ..مانكر تجيني ايام ماسوي فيها شي بس نادرة والاكثر ضغط والله اني فطور مافطر وغرفة مدرسات مانزل ولا اتكلم مع احد لنه ما يمديني ... واشوف المدرسات يفطرون ويسولفون مع بعض ويحضرون مااحسدهم والله ..بس يعز علي ليه انا ماسير زيهم منقردة بغرفة لحالي ماحد معاي اشتغل لوحدي واذا جتني مدرسة تقعد وياي والله العظيم انه يجون يقولون لها ماعليه اطلعي عندنا شغل مع انه مو من حقهم يفرضون سيطرتهم علي طالما ماراح اقصر بشغلي بس اسكت واحتسب الاجر عند الله ووالله انه مايمسكني عنهم الا الآية (والكاظمين الغيظ والعافين عن الناس) ومايلقها الا ذو حظ عظيم واقول خليني اكسب حسنات وربي ان شاء الله يعوضني خير...وترى تسير لي مضايقات كثير يومية لكن ماراح ازعجكم فيها يعني ترى حتى ذوق ماعندهم ....
الحين يابنات انا قررت استقيل بس كل اللي حولي يقولون لي لا لا تستقيلين غبيه استحملي واصبري والله نفذ صبري بس مايفهمون يفكرونه سهل ..صح الحلم بالتحلم والصبر بالتصبر بس انا صبرت سنة وشوي ..ومعد اقدرانا قلت ابي خبرة سنة وخلاص تكفيني...بنات قولو لي بصراحة انا قاعدة اتدلع والله انا سرت اشك في عمري هو هذا الشغل عادي كل الناس يكرفون كذا والواحد يقدر يستحمل ها كله قولولي والله راح اقتنع برايكم وراح اخذ فيه حتى لو مو على هواي بس انصفوني....
اسفه طولت وااااااااجد عليكم لكن لأني محتاجة رايكم السديد..وعلى فكرة انا ماديا مايهمني صح حلو الواحد يستقل ماديا بس عادي انا ماوراي التزامات ..هي كانت مجرد مرحلة تطوير للذات بس الله المستعان وماقول الا كله خيره....وترى الراتب (2000 )