بنات كيف انسى موضوع الحمل واطلعه من تفكيري

وعليكم السلام
كنت مثلك لكن صرت كل يوم اردد سورة الشرح و الحمدلله مع الاستغفار صرت اجتماعيه اكثر وان احد سالني اقول والله ربي ماكتب الموضوع بين يدينه و الحمدلله على كل حال كل ما جا ببالك ادعي استغفري
قال تعالى: ﴿فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُمْ مِدْرَارًا* وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا﴾

الله يسعدك اختي بس كيف قدرتي تنسين الموضوع وتتخطينه

اشغلي نفسك بشي حددي لي جدول تظلي طول اليوم منشغله فيه ادرسي شي طوري فيه من نفسك لغة ولا كورس مجال انتي حاباه او اكتبي جدول بحيث كل ساعتين ثلاث تنشغلي بشي قراءة قران اذكار طلعه طبخ لا تجلسي فاضيه ابداً وربي يرزقك ويرزقني وكل محرم ويبشرنا بالحمل السليم المعافى عاجلاً غير آجل يا كريم 🤲🏻

اشغلي تفكيرك بشي ثاني
ممكن دايت
اذا وزنك زايد اشغلي نفسك بتنسيق جسمك
بتلقين نفسك متحمسه مع خطوات المشي سجلي في اليوم ٨ الاف خطوه
حملي تطبيق خطواتي وامشي
المشي يخليك ما تفكرين كثير في همومك
ويحسّن النفسيه
..
وجربي شوفي لك وظيفه الوظيفه في مكان آمن وغير مختلط حتى لو عمل تطوعي او راتب رمزي عادي الوظيفة مره تاخذ وقتك وتفكيرك .. ماتعطيك مجال تهوجسين ...

وليش تشيلين الحمل من تفكيرك؟
أنت امرأة طبيعية وفطرتك تحكم إنك تتمنين تكونين أم وإن ماحصل لزوم تسلمين الأمر لله وترضين بحكمه وماتعتزلين المجتمع لأن عزلتك ممكن تضرك وتكون سبب لاكتئابك .
أنت تتخيلين الناس يفكرون بك لكن الكل مشغول بحياته وان كان منهم بثر ومزعج طنشيه لأن طبع ابن ادم مختلف ، ولاتصيرين ضعيفة وواجهي الناس ، لو وحدة قالت لك ماحملتي قولي إلا حملت وجبت ثلاثة وخبيتهم عنكم . ردي ردود تخرسهم والا طنشيهم وبردي قلبك..
ولله اني مبردة قلبي ولا اطق حساب لأحد..
وحدة ذاك اليوم تقول لي خلاص يختي لاعاد تحملين كل يوم تحملين يموت وخلاص ارضي .
رديت عليها قلت الله يكتب الخير وقالت وشو يعني ناويه تحملين ثانية يانورة ؟ شوي و التفتت على اختي وقلت أنا لما ما أشاور أحد بحياتي الخاصة ليش يقدم الشور ، البعض يحسب نفسه وكيل الله على خلقه وكلن ابخص بهواه ومصلحته ، ولله ان ماودي بس اخرستها وماعاد تكلمت ، ثم شوي تدعي لي ولا صرت اقول امين ..
ادعي لي بالخفاء مو لازم بصوت عالي ..
المهم عقبها صرت اذن من طين واذن من عجين واطلع وادخل واكشخ وانبسط والذرية هبة من الله (يهب من يشاء اناثا ويهب من يشاء ذكورا ..)
ارضي بحالك يابنت ولاتهتمين بحكي احد ، وانت اللي تصدري المجادس وخل اللي يضايقونك يجلسون بأطرافها ، اكشخي وانبسطي ووكلي امرك لله واطلبيه وتوك صغيرة ملحقة بتحملين بادن الله كانه مو ذالسنه فهو اللي عقبها .. ادعي ولا توقفين دعاء. كل وقت ادعي وتحري مواضع الاجابة ، وقت المطر والجمعه واخر الليل وبين الاذان والاقامة واي وقت ادعي ادعي كل وقت تقومين تنامين ادعي ، ترى الاجابة للي يدعي مو للي يتمنى ..
ادعي واستغفري صبح وليل والله ماراح يردك لأنه وعد بالاجابة