بصراحة أنا بعد نصبوا علية بس زوجي فديته ماقصر أول شيء بقولكم كيف اشتريت الكريمات وعقب بقولكم وش سوى زوجي ..


أنا لمن كان عمري 20 كنت رايحة صالون أعمل تنظيف للبشرة وأسوي ميش حق شعري"تنظيف البشرة كان فيشال باكيج أربع مرات في الشهر" لأن بعد شهر راح أملج المهم في مرة من المرات جاتني صاحبة الصالون وهي سورية عرفتني على وحدة لبنانية لا يوفقهن .

وقالت لها فلانة بعد شهر راح تملج وهي تجي الصالون علشان تعمل تنظيف للبشرة كل أسبوع .

المهم المندوبة اللبنانية ماقصرت قامت تشيك لي على بشرتي وتقول لي حبيبتي بشرتك تعبانه كتير ماتؤولي انك راح تكتبي كتابك وبهالبشرة التعبانه وعاد ماصدقت خير تأثرت من كلامها للعلم أنا بشرتي ماكان فيها أي حاجة بس كانت تحتاج توحيد لون يعني وقتها كنت عشرين سنة بس مدري كيف ضحكت علية ..

المهم قعدت تراويني الكريمات وتشرحلي والنسوان يطالعون فيني وأنا عاد مفتشلة ماأقدر أطلع بدون ماآخذ منها شيء المهم عددت لي كم كريم وقالت هذا يوحد اللون والثاني يفتح اللون وثالث يمنح البشرة نضارة وحيوية والرابع يشد البشرة ويسكر المسامات والخامس كريم أساس للحفلات يسوي إضاءة على البشرة ..
وبعد في كريمات للجسم والرقبة والحين ماعندها وراح تجيبهم المرة الجاية

وأنا بحكم أني صغيرة بالسن صدقت كلامها وخذيت هالكريمات وفي انتظار كريم الجسم والرقبة يعني هي حسبت حسابهم ولمن سألتها عن السعر قالت لي 3000 درهم والله حزتها بلعت ريقي لأن كنت مفتكرة انها كلها تسوى 500 لأن علبة الكريم وايد صغيرة يعني ممكن يكون 50 ملل بس طلع المبلغ 3000 وأنا وقتها ماكان عندي غير600 درهم وقلت لها الحين ماعندي غير هالمبلغ وقلت لها يصير اني أعطيها المبلغ على 3 دفعات فقالت لي عادي حبيبتي متى ماتجين الصالون عطيهم لصاحبة الصالون وهي راح تسلمهم لي وقلت لها أوكي المهم ظليت أستعمل الكريمات بس مالقيت أي فايدة إلا في كريم التبييض وباقي الكريمات بصراحة جربتهم لأسبوع ومافي أي مفعول
وعن كريم الجسم والرقبة ما جابتهم مروا أسبوعين ولاحظت بشرتي فتح لونها بس كنت أعاني لمن أحط الكريم بالليل يحرقني وفيه ريحة فيكس وحسيت فيه مواد كيماوية ولمن خبرت زوجي وقتها كان خطيبي قالي أنه شاكك في الحرمة ..

ومرة اتصلت فيني المندوبة اللبنانية وطلبتني في شقتها وزوجي ماكان متطمن وقال لي انه راح يوصلني وبيكون وياي ولمن وصلت لشقتها وقلت لها انه خطيبي معاي قالت لي لاتعالي على العنوان الفلاني يعني غيرت موقعها في ثواني وزوجي زاد شكه فيها المهم لمن وصلنا على العنوان اللي عطتني كانت شقة توها جديدة مب مفروشة يادوووب كنبة وحدة وطاولة..

المهم لمن شافتني قالت لي واااااااااو بشرتك صارت عسل بيضاء ومشدودة والمسامات تسكرت وتشع نضارة ماشاء الله وأنا ما شفت أي تغيير غير في اللون لأني شرات ماقلت اني مااستخدمت الكريمات الثانية.

المهم لمن سألها زوجي ليش كانت طالبتني لشقتها ردت عليه: أنا كنت أبغي الدكتور يشيك لها على بشرتها ويشوف النتيجة ..

المهم الدكتور كان شكله والله الشاهد واحد ولا يخصه بالطب وكان مربتك كثير وطلب من اللبنانية تجيب مصباح وعدسة مكبرة وقعد يمدح لا ماشاء الله بشرتك صارت أحسن ..

كيف تقول صارت أحسن وأنت أول مرة تشوفني ؟؟
يقول صارت أحسن .

المهم بعد كذا قالي تعالي اجلسي على الكرسي المهم وقام يسألني والله العظيم الله شاهد اني ماأكذب في أي كلمة قلتها ..

المهم قام يسألني كم عمرك ؟
كم عمر أمك ؟
ما هو أسمك ؟
ماهو أسم أمك ؟
ماهي جنسيتها ؟
هل أمك تستخدم مستحضرات معينة ؟
هل تدخنين ؟
هل زوجك بيدخن؟

وأنا أجاوب مستغربة وش دخل أمي وزوجي والتدخين في السالفة وقام زوجي واستأذن وطلعنا يعني ماكملنا جلسة التحقيق مع سيادة الدكتور اللبناني النصاب..

وقبل لا أطلع سألت المندوبة اللبنانية شو صار عن باقي الكريمات مالت الرقبة والجسم قالت لي حبيبتي هذولا تكلفتهم 1500 ..

حزتها عصبت :angry2:وقلت لها بس انتي بالصالون قلتيلي انه يشمل الـ3000 .


فقالت لا حبيبتي انتي ماسمعتيني صح ..

بس والله حسافة أني ضيعت الورقة اللي كانت كاتبة فيهم الكريمات وسعرهم وانه يشمل مال الجسم والرقبة عصب زوجي وطلعنا.

واللبنانية معصبة انتوا نزلتوا من قدر الدكتور وما احترمتوه هايدي دكتور اختصاصي بشرة ولسة من يومين راجع من لبنان.


قام زوجي وقال لها : أقول لج عن الحركات والنصب على بنات الناس ..

قامت اللبنانية تسب وتقول انزين رجعولي باقي المبلغ 2400 .

قال لها زوجي ممكن أعرف شو أسم الشركة مالتكم ؟؟

فما ردت عليه بس قالت له انت ليش تتدخل في مواضيع تخص النسوان ..

رد عليها زوجي أي نسوان تتكلمين عنهم أنا مايخصني في النسوان أنا يخصني في زوجتي ..

وقالت له ان منتجها طبيعي 100% وهي ياما نسوان اشتروا من عندها ومستمرين وياها ..

فقال لها زوجي : هل عندج تصريح ببيع المستحضرات ؟؟

الجواب : سكوت

الهم زاد صريخها وقامت تسب يخرب بيتك رجعلي المصاري بتايعتي ..

قال لها زوجي : بعد ماآخذ الكريمات لمختبر وأفصح المواد وأشوف إذا كانت تستاهل المبلغ اللي ذكرتيه .

وقال لها زوجي والله لو طلع الكريمات في مادة كيماوية والله راح أدخلج السجن وألعن بو أسلافج ..

والله بتصدقون انها سكرت التليفون ويوم كان زوجي يتصل بها يلقى موبايلها مغلق ..

وقام زوجي وقال لي عطيني الكريمات وخذها حاطاها بكيس وعلقهم على باب الصالون والله شاهد مامروا أسبوعين إلا الصالون مسكر مدري وش صار له ؟؟

بس في النهاية البطل زوجي أنقذني من النصب هاااااااااااااه نسيت أقول ان زوجي يشتغل في الشرطة..

أدري طولت بس والله من يومها من أروح أي مكان ماعاد أستحي لو أحد جبرني ولا عاد أنحرج وأشتري حاجة مب مقتنعة فيها لأن شرات ماقال المثل "اللي اختشوا ماتو"

معوضه خير الله يحاسبهم

فعلا انا صارلي كذا بس والله ماسبتهم لين رجعوا فلوسي النصابين:angry2::icon33:
لكن مو نفس الشركه غيرها والحين اي شركه تتصل اقولهم سوووووووري ماابغا حتى اللي من شركات تانيه مكانس واجهزه وغيررره :42:

يالله الله يعوض عليكي حبيبتي:26:

يووووووووه

انا جاتلي مندوبتهم بعد ما اتاخرت وجلست 4 ساعات
احرجتني مره ومعها صور لبنتها ماتزوجت تسويلها
دعايه وصور لكل افراد العائله وطبعا تسب بالجو
لانا كنا بالحر وتلعن السواق اللي اتاخر عليها حطها عندي وتركها وتطلب.. وش تعرفين تسوين قلت لها ماعندي الا شاي جبت الشاي ماعجب الاخت تبغى كوب على مزاجها والخ...
ماطلعت الاوانا حايمه كبدي منها واسلوبها ودقوا علي بعدها كم مره وهاوشتهم قلت اسم المندوبه واسلوبه الوقح ولاعاد تتصلوا فيني
طبعا اخذت حليب منظف فقط لانها احرجتني وكان ارخصها سعر140ريال