لا للخلطات @la_llkhltat

كبيرة محررات

بنات ليش ما تروحون تفحصون ؟؟؟؟؟؟ وش السبب يعني ؟؟؟؟؟؟

السلام عليكم ورحمة الله وبركاته ..

بنات لاحظت كثييييير عندنا جهل متفشي حول الفحص لسرطان الثدي .
كوني ادرس في الخارج الاجنبيات غالبا تجي تفحص والمرض توه في بدايته ومراحله المبكرة ..لذلك يسهل علاجه كثير ويكون علاجه ناجح باغلب الحالات

لكن عندنا الحالات للاسف ماتجي الا بمراحل متأخرة جدااااااااااا :44: ..لما ينتشر الورم والعياذ بالله
المشكلة اغلب الحالات كان ممكن علاجها لو اكتشتفت بدري بس المشكلة انهم مــــــــــايجوون ابدااا ..وللاسف العالم العربي وتحديدا المملكة جدا متأخرة والوعي ضعيف

شفت صور لمريضات سعوديات الله يعافيهم ويرفع عنهم .. اقل ما يقال عنها انها شنيييعة وبشعة جدااااااا

كنت راح انزل لكم بعض الصور عشان تعرفوا كيف الامر خطير ... بس ما حبيت اضيق صدوركم

المشكلة بهذا كله ممكن نتلافاه بشي بسيــــــــــــط .. الفحص الدوري والفحص الذاتي

الفحص الذاتي اكيد كلكم عارفينه وماراح أدخل في التفاصيل ..

XXXX

اللي حابة ممكن تبحث بالنت وتقرأ اكثر

والفحص السنوي بالماموقرام للنساء من سن اربعين فما فوق ... ضروووري جداااا لا تتعذرين بالمشاغل او اي شي ..ماراح ياخذ غير عدة دقائق ممكنها تحفظ حياتك بعد ارادة الله

وللنساء اللي عندها اخت او ام مصابة في المرض تكون احتمالية اصابتها اكثر الله يكفينا الشر .. بس ممكن تبدأ الماموقرام في عمر أبكر مثلا بالثلاثينات ..والافضل تكلمي دكتورتك عنه.

ما يمنع انكم تسئلوا الطبيبات ..لو رحتي لأي مراجعة نسائية مثلا متابعة حمل او علاج التهابات او اي حاااجة ..اسئلي طبيبتك اي اسئلة تخطر ببالك

لو رحتي لأي طبيبة عامة ممكن تطلبي منها تعلمك طريقة الفحص الذاتي ..وخلاص تسوينه لنفسك في البيت

وعلمي بنتك , علمي اختك , علمي امك

بنتك ابدي علميها من بعد البلوغ عشان تعتاد وتصير عندها عادة ..

وامك اذا كانت ما تدخل النت ولا تقرأ انتي خذي بيدها احجزي لها موعد ماموقرام وخذيها .. هذا من حقوق والدتك عليك اذا كنتي تعزينها

واذا حسيتي بأي شي مثلا تغير في ملمس الثدي ولون الحلمة او شفتي منها افراز غير عادي او حسيتي بكتلة ..لا تشاورين على طول روحي للدكتورة

لا تخلين الخوف والقلق يرددك .. حتى لو كان الموضوع يخوف شوي اهماله يخوف اكثر واكثر
اما لو كان حجمه صغير ممكن بسهولة يستأصل او يتعالج بالاشعة

وجراحة الثدي نوعين, استئصال للورم ..والاستئصال الكامل .. مووو شرط انه اي وحدة تشوف كتلة معناته خلااص راح تفقد ثديها ..هذي من الافكار المغلوطة الشائعة ..ممكن الحفاظ على الثدي اذا كانت الحالة تسمح من حجم الورم وموقعه ومدى انتشاره

وكذلك مو كل وحدة راح تتعالج مثلا بالكيماوي وبيسقط شعرها .. الكيماوي ينكتب في حالات معينة ومو شرط يطيح الشعر ..وحتى ولو طااح ينبت ان شالله من جديد

اما اللي تقول زوجي بيتركني بيتزوج علي ..بقول لها بسلامته الله لا يرده ..العمر غالي يا غاليات

وترا النفس وايذاءها واهمالها حرام ..واخاف اللي تهمل الفحص والعلاج عمداً انها تدخل في حكم اللي اذت نفسها والمنتحرة والعياذ بالله

فيه برضو اللي تقول الصحة والمرض من الله ولازم نقبل بالمرض زي ماهو ونتوكل على الله !! .. وهذي من اغبى الافكار اللي سمعت !!..الدين والثقة بالله والتوكل عليه عمرها ماكانت تتعارض مع الاخذ بالاسباب والبحث عن العلاج

اوكي تعالجي بالقران ارقي نفسك ليل نهار .. لكن روحي اكشفي وتعالجي .

وكذلك من الامور المتخلفة اللي ينشرها الجهلة ..الخلطاات , وياريتهم ينصحون باستخدامها ويسكتون :09: الا يقول لك وقف العلاج الكيميائي او ارمي ادوية الاطباء في الزبالة الله يعزكم وداوم بس على هالخلطة !!
عن جد جهل جهــــــــــــــل !!

ودك تاخذي خلطة معينة مافي اشكال ..اسئلي طبيبك او اخصائية التغذية.. وسمي بالله واكليها
لكن توقفي العلاج من نفسك عشان جهلة في الانترنت مافي مصدر موثوق على كلامهم هذا شي خطير !

وعلى طاري المصادر الموثوقة ياريت يا بنات نتعلم اسس البحث العلمي ..ونعرف كيف طرق الوصول الى معلومة موثوقة .. مو كل شي نقراه يتصدق ولا كل شي نسمعه نطبقه على انفسنا زي فئران التجارب ..صحيح الغريق يتعلق بقشة لكن لا تتركوا للجهلة مجال يسوقون بضاعتهم عليكم

اتبعي العلاج اللي يكتبونه الاطباء ..لا يمنع انك تشاوري اكثر من طبيب اذا ماكنتي مقتنعة , لا يمنع انك تناقشي وتاخذي وتردي وتعطي ..
واقري على نفسك في بيتك وتوكلي على ربك وان شاءالله مافي الا كل خير وعافية.

اعذروني على كلامي واسلوبي ادري كلامي مو مرتب ولا منسق ..بس يعلم ربي اني اتمنى لكم الخير من كل قلبي .. ولا كتبت الا لما شفت اللي اذى عيني وادمى قلبي

وابي منكم وعد انه كل وحدة تعمل بنفسها على توعية المجتمع اللي حولها ..انا وانتي نقدر نسوي تغيير باذن الله :27:

وياريت اللي عندها تعليق مثلا تحب تناقش اسباب تردد وتخّوف النساء من الذهاب للفحص, او غيره من الامور

والله لا يفجعنا في انفسنا واحبتنا بهذا المرض ولا غيره ..ويشفي مرضانا ومرضى المؤمنين والمؤمنات..امين يارب العالمين.
تحياتي وتقديري لكم

يلزم عليك تسجيل الدخول أولًا لكتابة تعليق.

تسجيل دخول

ام ابرار وابراهيم • 13 سنة

جزاك الله خير

لا للخلطات • 13 سنة

هنوتي :

لا يمكنك مشاهدة هذا التعليق لانتهاكه شروط الاستخدام.

امين ويحفظك ربي ومن تحبين

هلا هنوتي
المعلومات ياعزيزتي موجودة ومتوفرة, وماشاءالله مجهودكم واضح وكبير الله يجزيكم عليه كل خير ويعافيكم باذن الله
بس المشكلة يا قلبي انهم ماااايروحون يفحصون نهااائي ونسبة قليلة عندنا اللي تكتشف مبكر الاغلبية العظمى في المراحل المتأخرة ..وهالشي جداا جدا محزن, عشان كذا حبيت بهالموضوع اسلط الضوء على هذي النقطة تحديداً وارد على بعض الـ myths او الخرافات الشائعة حول الفحص والعلاج.

والله يعافي كل مبتلاة ويحفظ كل مسلم ومسلمة .

اكبر شوشه • 13 سنة

الله يعطيك العافيه خلوطه <<<< دلعتك دلع مابعده ولا قبله خخخخخخ

ماراح نندم الا لما تحل المصيبه وبعدين نقول ياليتنى وياليتنى

عندها لاينفع الندم

لا للخلطات • 13 سنة

اكبر شوشه :

الله يعطيك العافيه خلوطه <<<< دلعتك دلع مابعده ولا قبله خخخخخخ ماراح نندم الا لما تحل المصيبه وبعدين نقول ياليتنى وياليتنى عندها لاينفع الندم

الله يعطيك العافيه خلوطه <<<< دلعتك دلع مابعده ولا قبله خخخخخخ ماراح نندم الا لما...

ان شاءالله يا غالية مافي مصيبة ولا ندم ..الله يحفظنا ويحفظ كل مسلم ومسلمة
تسلمين لي يا الغلا

...
الاخت المشرفة معليش الصورة اللي حذفتيها مافيها حاجة ..مجرد رسمة توضح الفحص الذاتي
ماراح نتطور كذا اذا حتى رسمة تعليمية تحرمونها و تحذفونها!!!

نونه بس شطوره • 13 سنة

الله يرزقك الجنه بغير حساب.....

الله يشفي كل مريض..
" اللهم إني أعوذ بك من البرص والجنون والجذام وسيء الأسقام".

مشكوره اختي