السلام عليكم ورحمه الله
بنات انا زوجي امه متوفيه ومافي بيت للعائله يجمعهم وهما كبار اعمارهم بالاربعين والخمسين
وبماانه مايجتمعون مع حريم عيالهم دايم صارت علاقتي فيهم رسميه جدا ومحترمتهم بقوووه وماحب اجرح احد فيهم او اضايقه بشي ماحب احد يزعل علي لو حسيت بس اني زعلت احد فيهم ماانام ذيك الليله من التفكير
احبهم وربي شاهد مع اني مااشوفهم كثير مااروح لهم الا اذا ناودني انا وبناتي انا ساكنه بشقه صغيره جدا وهما بفلل كبيره ماشاء الله يعني تخيلوا يابنات مااجتمع معاهم الا اذا ناودني كل 6 شهور مثلا او كل 5 شهور
ببنتي الصغيره مع ان علاقتي فيهم رسميه وعاديه وجوني بنفاسي
ومن عقبها ماشفتهم مع انه زوجي اخوهم الوحيد تخيلوا تعرفون الوحده لطلعت من النفاس تبي تلبس وتفرح وتروح لحمولتها فرحانه بالكشخه بعد الحمل والنفاس ومع هذا ماناودني الا يوم صار عمر بنتي 7 شهور
تخيلوا ماصدقت من الفرحه ان اخته نادتني بجمعه خواتها فرحت مرره ورحت لسوق وزوجي معي فرحان
انهم نادوني (( لاتقولون لي ليش انتي ماتعزمين نفسك وتروحين لهم لان ماحب هالتصرف ماحب اعزم نفسي احب كلن على راحته الي يعزمني اروح ماحب احرج احد )) واذا عزمتهم ببيتي يرفضون يقولون حنا عوايل كبيره وبيتك صغير صعبه نجيكم تعالي انتي وبناتك اخف مننا
وواضح على زوجي مستغرب قطاعتهم بس مايحب يصرح بهالشي
وهو مايقصر يزورهم ببيوتهم لحاله بدون بناتي يسلم عليهم كل وحده لحالها ببيتها كل بين فتره او يكلمهم
انا برضوا كنت بين فتره وفتره ادق عليهم واسال عنهم
بس الي مضيق صدري بنات خواته كبار متزوجات مو صغار يحاولون انهم يجرحوني بكلمه او يسوون حركه يذلوني فيها وكنت صابره ومتحمله بس قبل كم شهر صار موقفين موقف من اخته وموقف من بنت اخته
بعدها احس خلاص ماعاد قلبي يقدر يتحمل اكثر من كذا ومحتااااره جدا
الموقف الاول / انا قبل كم سنه اخت زوجي طلبت مني صوره لي من صور زواجي وانا مستحيل اطلع اي صوره لي لانها خاصه فيني واخاف تضيع بس هي اصرت وقالت الا ابيها بوريها وحده من اهل زوجي ووافقت خفت تزعل علي وتصير مشكله وعطيتها وكل ماسالتها عن صورتي تصرفني مع العلم ان اول زواجي كانت فرحانه فيني وعطتني صوره لها قالت خليها مع صورك وفرحت فيها وكل هالسنين انا اسالها عن صورتي وهي تصرفني
بس اخر مره شفتها كان معاي زوجي وقالت لاتجين المره الجايه الا ومعاك صورتي بناتي يبونها (( هي خلت صورتها كل هالفتره عارفه اني حريصه على الصور واني معتبره صورتها صور من صوري من غير ان صورتها ببيت اخوها مو بيت احد غريب )) قلت خلاص بجيبها بس وحده بوحده (( اقولها ببتسامه عشان ماتصير مشكله ) انا بعد ابي صورتي قالت اي صوره قلت صورتي الي اخذتيها زمااان .. شكلها ضيعتها وماتدري وين صورتي وصارت تسال بناتها ( (فلانه تذكرون صوره ام افنان وينها قالوا لا مانذكر )) يعني ضيعت صورتي مع ان بيتها مليان شباب متزوجين وماتزوجو من غير زوجها تعرفون يابنات كل شي صار يخوف بسبب الانترنت ممكن تنتشر صورتي واروح فيها ومع هذا ماحاولت تعتذر او تقول سامحيني ضيعتها بالعكس قالت (( عندي صور لمرت ولدي من صور زواجها )) بس مافي مقارنه بيني وبين مرت ولدها مرت ولدها اكيدخوان زجها ا يشوفونها دايم وحافظينها لانها عايشه عندهم لاكن انا احس عيب وحرام لاني مرت خالهم وصورتي عندهم صعبه صعبه
بالاخير بدل ماتعتذر التفتت على بنتها وقالت قومي يافلانه ( بنتها ) جيبي صورت فلانه ( مرت ولدها ) عشان بوريها اخوي >>>>بالله مو حرااام مو عيب
تبي توري زوجي صوره حرمه ماتحلله زوجي انصدم وسكت احترام لاخته لانها اكبر منه مايبي مشاكل
بس بنتها ماقامت مدري ليه
الموقف الثاني / مع بنت اخته الثانيه هي متزوجه وبعمري كنت معزومه لزواج وماكان في احد اعرفه بالزواج الا اخت زوجي وبناتها وقلت فرصه اشوفهم واقعد معهم وننبسط دخلت لقيت بنت اخته جالسه على طاوله ومعها بنات متزوجات اقارب زوجي توني اسلم عليها هي والبنات حتى ماامداني اجلس فجأءه قامت وخلتني وراحوا البنات الي كانوا معها كلهم لحقوها وغيروا مكانهم بعييييييييييييد عني بطاوله ثانيه يعني خلوني جالسه على طاوله بجنب الكوشه لحالي وقدام الناس مع اني جايه عشانها وهي عارفه اني ماعرف احد بالزواج الا هي وكلن صار يطالع راحمني صعبه علي ..كان فيه مكان فاضي لي اجلس معهم مو زحمه وكلهم بعمري
والله كل ماتذكرت هالموقف اقعد ابكي ليه الكبر مافي احلى من التواضع حتى لو كارهتني او ماتبيني تجاملني نص ساعه على الاقل وصعبه يابنات اكلم زوجي اقوله بطلع وهو توه جاي بقسم الرجال اظطريت اقعد ساعتين مع طاوله كلها عجايز مايعرفوني ولا اعرفهم
حسبي الله ونعم الوكيل
كنت اكلم خوات زوجي بين فتره وفتره بس بعد هالموقفين كبر قلبي عليهم واهم شي كرامتي
بس ارحم بناتي دايم يسالوني عن بنات عماتهم وودهم يشوفونهم داايم بس حتى بناتي مايسلمون من شرهم يعني لو رحت مع بناتي لخوات زوجي بناتهم الصغار يدخلون بغرفهم يجمعون فيها بنات الضيوف ويخلون بناتي برى ويسكرون الباب تخيلوا بزران يفرحون اذا قلت بنروح لعمتك فلانه لاكن يجون من عندهم مكسورات الخاطر يجلسون طول الوقت لحالهم
(( بس بنتين )) تخيلوا كل اربعاء او خميس يسالوني نفس السؤال ياماما ليش مانروح بيت عماتي ليش مانروح معاهم استراحه مثل بنات خالاتي
اتمنى يحترموني مثل مااحترمهم
لاحول ولا قوه الا بالله العلي العظيم الله يسمحهم.
وش رايكم يابنات بكلامي كله هل اواجه خوات زوجي بمواقفهم معي مع اني عارفه نفسي بنص المكالمه ببكي واندم اني كلمت وفشلت نفسي ..؟؟ ولا ايش اسوي.؟
ادعولي ربي يسخر لي اهل زوجي ويجمعني فيهم دايم على خير طوول العمر ومن قال امين يارب
الله يسعد ويحقق اماني كل من دعتلي او حاولت تساعدني ياارب .
aum afnan @aum_afnan
محررة
يلزم عليك تسجيل الدخول أولًا لكتابة تعليق.
عتيبية ذوق
•
عيشي حيااااااااتك وطنشيهم وش تبين فيهم اذا هم مايبونك لاتزعلين مني ابي مصلحتك الله ييسر امووورك ويشغلهم عنك خليهم اخر اهتماماتك اللي يقدرك قدرية واللي يعزك عزية الله يووووووفقك
والله يااختي ماقدر افيدك بشئ الا اني ابوضح لك نقطه ان اللي حاصلك مو لحالك انا نفس وضعك بناتنا كبار ولهن بنات متزوجات واحبهم واحترمهم ولي عشر سنوات معهم وكانت خالتي الله يغفرلها ويرحمها برحمته تحبني وترحمني فكانت تعزمني عليه اذا تجمعوا .. بس بعد وفاتها اقعد بالشهور ورادين فيني ولا كانهم يعرفوني يجتمعون ويعزمون اخوهم وعيالي معه وانا يعرفون اني بالبيت لحالي ولا لي احد اروح له ومع هاذا مطنشين ولا هميتهم ..
احيانا ازعل وبالتالي طنشت وقلت بكيفهم وانا لي حياتي ولا هي وقف عليهم .. وعاملهم بالمثل ..
فانتي لاتصيرين حساسه بتتعب نفسيتك صدقيني .. طنشي واللي لها حق عليك امهم ماتت الله يرحمها ..
احيانا ازعل وبالتالي طنشت وقلت بكيفهم وانا لي حياتي ولا هي وقف عليهم .. وعاملهم بالمثل ..
فانتي لاتصيرين حساسه بتتعب نفسيتك صدقيني .. طنشي واللي لها حق عليك امهم ماتت الله يرحمها ..
مالي حض
•
عااااادي اللي مايبيك بستين داهيه ولا عليه حلا هذا اللي باقي ابكي على شيف
الحمدلله والشكر على النعمه عيشي حياتك بالطول وبالعرض ولاتحسسينهم انهم شي وانك
حزينه على لمتهم الله واللمه عاد ان كيدهن عظيم الله يصلح الحال
الحمدلله والشكر على النعمه عيشي حياتك بالطول وبالعرض ولاتحسسينهم انهم شي وانك
حزينه على لمتهم الله واللمه عاد ان كيدهن عظيم الله يصلح الحال
الصفحة الأخيرة