بنات مصر تعالوا نجدد ايامنا الحلوة

يا بنات ياريت كل واحدة تحكيلنا هتعمل ايه فى العيد حد ناوى يسافر و لا كلنا هنقعد محلك سر
و يا ترى الغردقة و شرم الشيخ يبقى جوهم حلو فى العيد لو حد حب يسافر؟
آه صحيح اخبار الكحك ايه؟

السلام عليكم
ازيكم كلكم فعلا ياريت نجدد ايامنا الحلوة مرة تانية لان الصحبة ده لايمكن تتعوض تاني و احنا مستنيين الكل يرجع يشارك معانا من جديد
بالنسبة للعيد اناطبعا مش في مصر و للاسف مش هاقدر اقضيه في مصر بس لسة ما حطتش خطة ازاي هيعدي عليا العيد
هو هنا بيعملوا حفلة كبيرة للاطفال هيعملوها ان شاء الله يوم الاحد اللي بعد العيد لان هو ده يوم الاجازة اللي ممكن الكل يتجمع فيه
الحفلة ده بتكون حلوة اوي بيجيبوا العاب مختلفة للاطفال و رسم على الوش و ساحر و خلافه كتير ان شاء الله السنة ده تكون حلوة كمان

اهلا رواء منورة الصحبة الحلوة هنجددها بيكى و بكل البنات ياريت تقوليلى كمان هل المسلمين كتير فى المانيا ؟ و هل فى جوامع كتير مخصصين فيها اماكان او ساحات لصلاة العيد ؟

شوفي يا وسام هو انا البلد اللي انا فيها فيها مسجد واحد للعرب و مش عارفة يمكن اتنين او اكتر للاتراك و فيه مساجد تانية لاقليات مسلمة تانية في البلد
طبعا عدد المسلمين مش كتير اوي و احنا بنصلي العيد في مسجد العرب و قبل ما المسجد يكون موجدود كان فيه زي غرفة صغيرة في الجامعة لصلاة الجمعة و طبعا في رمضان و العيد ماكنتش بتنفع فكنا بناجر صالة كبيرة لصلاة التراويح و التهجد في رمضان و لقضاء العيد فيها

السلام عليكم و رحمه الله و بركاته
فكرة جميله التجمع الجديد دة يا بنات بارك الله فيكى يا وسوسه على الفكرة دى
بالنسبه للعيد هقضيه مع الاهل و الأقارب ان شاء الله و طبعا بقسم الأيام ما بين أهلى و اهل زوجى و بس كدة مافيش حاجه جديدة
أما بالنسبه للسفر فانا مش بحب السفر فى العيد لأن الدنيا بتبقى زحمه اوى
أما الكحك بقه مش هقولكم لسه عامله كحك و خلافه جاهز إنما ايه يجنن ( مش هقدر اقول عمايل ايديه و حياة عينيه ) فأنا بجيب كميات بسيطه لأنى ماليش فى الحاجات دى يعنى آكل منها نادرا جدا بس جوزى هو اللى بيحبه
و كل عام و انتم بخير