اهلا يا سمسومة، بصي يا ستي هو الواحد احيانا بينشغل بحاجات كتير عن انه يهتم بنفسه بس برضه لازم نحاول نهتم ببشرتنا لانها زي اي جزء في جسمنا محتاجة عناية و رعاية. بالنسبة لبشرة الوجه محتاجة: تنظيف برغوة منظفة او ميلك و انا عن نفسي بافضل الرغوة + ملطف و ده هو التونر او التونيك و ممكن اوي تستخدمي ماء الورد ماركة اليمامة من السوبر ماركت حلو جدا او تستخدمي اي ماركة من اللي حنقولها كمان شوية + الكريم المرطب و فيه للنهار بعامل حماية من اشعة الشمس و فيه لليل للتغذية و اتعويض البشرة عن اللي بتفقده من نضارة بسبب عوامل الجو و تقدم العمر

عندك ماركات كتير ممكن تستخدميها حاكتبهالك بترتيب اسعارها من الارخص فالاغلى بس كلها حلوة و الفرق هو الجودة الاعلى

كلير اند كلين من جونسون

اوريفليم

نيفيا فيزاج

كلارينز

كل واحدة من دول فيها للبشرة الجافة و للدهنية و للحساسة و للعادية و للمركبة، انتي بشرتك دهنية يبقى لازم تجيبي اللي يناسبها لان بيبقى فيها مادة قابضة بتقلل افراز الدهون و تقفل المسام.

عموما حاولي انك ما تغسليش وشك بمية سخنة او دافية اوي و اغسليه بمية باردة من الحنفية عشان المسام تتقفل بعد التنظيف. و لازم تختاري زي ما قلت لك تونر للبشرة الدهنية.

عندك ماسكات سهلة اوي ممكن تعمليها في البيت بتشد البشرة و تخليها نضرة و اسهلها ماسك الترمس المطحون (هاتيه من عند العطار) و تضيفي له اما شوية لبن او شوية زبادي او حتى معلقة عسل نحل و شوية مية ورد و اعمليه زي العجينة و حطيه لوشك و رقبتك، حلو اوي الماسك ده و بيرطب كمان. لو انتي مرتاحة على مجموعة تنظيف افون يبقى هاتيها و امشي عليها و متغيريش، اما لو مش عاوزاها جربي مجموعة من اللي قلت عليها و امشي عليها بانتظام و صدقيني حتحسي بالفرق.

اما بالنسبة للجسم، و ده مش بس اليدين و القدمين زي ما البعض فاكرين، لا اقصد الجسم بالكامل من الداخل، لازم يكون عندك بادي سكراب تعمليه كل فترة يعني مرة في الاسبوع مثلا للتخلص من الجلد الميت و يكون عندك كريم للجسم او بادي بوتر و بعد كل حمام تدهني جسمك بيه عشان تحافظي على نضارة البشرة و نعومتها و ريحتها الحلوة كمان، و ده موجود في ماركات كتير زي اوريفليم و افون و فروتيني و لورا فالديني و غيرها كتير و متوافرة في الصيدليات و اماكن بيع العطور و مستحضرات التجميل و لو عاوزة اماكن محددة اقولك.

نسيت اقولك ان فيه سكراب للوجه حلو اوي هو St Ives اللي بالمشمش ده روعة و تستخدميه لتغيير الجلد الميت للوجه.

فيه سنفرة طبيعية للجسم باستخدام زيت الزيتون و معاه ملح مجروش او سكر سنترفيش و الاتنين حلوين. و قناع الترمس اللي قلتلك عليه برضه بيعمل كسنفرة خفيفة للوجه

للقدمين بقى لازم حمام مريح ليهم من فترة للتانية بالماء الدافي و الملح و بعدها الفرك بالحجر الخفاف او المبارد المنتشرة بكثرة دلوقت و بعدين دهنهم اما بكريم خاص للقدمين او اي كريم عندك او فازلين وز لبس شراب عليهم للصبح و صدقيني بتبقى ناعمة و زي الفل

هاه؟؟؟ محتاجة ايه كمان؟؟ قوليلي بس و انا اقولك على كل الخبرة اللي عندي في الحواديت ديبس اهم حاجة المداومة و عدم اللخبطة في المنتجات المستخدمة

انتى كنتى فين من زماااااااان يا نودى .. يا عم مش تقول لنا انك عندك المعلومات دى .. قولى افادكم الله ...
شفتى مش انا كمان قفلت معايا خالص وبردوا حاسه بسخونه ودوخه :( عماله اقول ااقوم اروح وبعدين قلت خلاص فاضل ساعه تهون بدل ما الواحد ياخد اذن ولا كلمتين من حد ربنا يستر .. لو اختفيت ابأوا اسألوا عليا وصيتكم العيال (الى حجرى وراهم )

و الله يا شيري كأنك اخدتي الكلام من على لساني!!! انا لسه بأسأل دلوقت هو المدير مش حيمشينا بدري النهاردة لان انا كمان دفيت و دماغي بتتطوح و لبست السويتر التقيل بتاعي لاني مش قادرة حاسة اني باتكتك، عموما بقى العيال حد غيري يجري وارهم لاني شكلي حانضملك و نعمل سرير بدورين!!!!!

و يا ستي، انا باكلم نفسي من زمان في المواضيع دي و محدش كان بيهتم، قلت يبقى البنات مش عاوزين يتكلموا في الحاجات دي و سكت، لكن لو عاوزة تعرفي اي حاجة او تتكلمي في اي حاجة بخصوص العطور و الاهتمام بالبشرة و الماكياج و خلافه، اتفضلي لان دي واحدة من اهتماماتي و هواياتي المتعددة >>>>> 7 صنايع و في الاخر مترجمة صحفية قال!!! ايه جاب السياسة للماكياج و المطبخ و خلافه بس!!!!

متشكرة قوى يا نودى على معلوماتك دى
انا الحقيقه باجيب كلين اند كلير رغوة وبعدين باستخدم مياه ورد كتونر
وبعدين اليومين دول باستخدم نفيا للصباح والمساء وكمان نيفيا للعين
بس بصراحة انا دايما بانس بليل عشان كدة باحس ان الموضوع مش ماثر
بالنسة لسنفرة الجسم كنت جايبة منتج من stives بس عايزة اسال باستخدمه ازاى

يااااااااااااااااااااا رب وفق فريق دبي و خليه يفوز على الفريق التاني النهاردة، يا رب نولها اللي في بالها و اسعدها يا رب

يا رب يسر لاحلام امورها و حقق لها كل اللي بتتمناه

يا رب وفق زوج كهرمانه في العثور على وظيفة ثابتة و يسر لهم امورهم و فرج كربهم و غمهم يا رب

هاه، مين تاني عاوز دعوات؟؟؟

يا رب اشفيني انا و شيري و كيوت جمانة!!!