مساء الخير يا أحلى بنات
اول حاجة أرحب بأجدد عضو فى الشلة راندة وواضح انك هتحملى لقب طباخة الشلة ما شاء الله عليكى شكلك شاطرة قوى وشكلى هاستغلك أسوء استغلال، ربنا يرزقك بالذرية الصالحة ويجعلها قرة عينيك باذن الله انت وكتكوتة ومصرية رقيقة وكل اللى نفسه يا رب. نسيت أعرفك بنفسى انا جولدى موطنى الاصلى اسكندرية وحاليا استوطن أبوظبى عندى ملك هتم 3 سنين فى شهر يوليو حاليا عاطلة عن العمل بعد ما اتهفيت فى عقلى وقدمت استقالتى من شهر بس فى الصيف ان شاء الله هابدأ مشروع تين شوكى قد الدنيا على بلاج ستانلى.

انا حاولت انشرلكم الرسالة اللى وصلتنى بس مش عارفة ليه مظهرتش عموما انا بعتها لشطورة على الايميل وهى ان شاء الله تنزلها هى عن رجل أعمال سعودى اسمه معن الصانع تبرع بتكاليف 60 عملية زرع كلى فى مستشفى فى الدمام وصلتهم للآن 4 حالات فقط فلو تعرفوا حد محتاج فعلا لعملية من النوع ده الارقام الاتصال موجودة فى الرسالة أو حتى اللى يعرف ازاى نوجهم لحالات فى مصر يا ريت بدل ما الناس بتموت وهى مستنية دورها فى العلاج.

نداء عاجل لكل من الست ام ايزابيلا بيلا يعنى اللى لقى احبابه نسى أصحابه طيب ادخلى طمنينا عليكى وعلى ايزابيلا بسرعة. رانيا احنا مستنينك تفتحى بارت 2 من بدل ما تتفركش لمتنا ونرجع نتسوح فى الاقسام التانية بعد ما كنا معززين مكرمين فى ملفنا.

بما انكم كلكم قاعدين تكتبوا وصفات قلت اشمعنى انا طلعت الدفتر والحمد لله لقيت كذا وصفة سلمون كنت جربتهم وطلعوا حلوين دول مخصوص لبنت مصر لانها كانت بتسأل عن طرق للسلمون.

سلمون بصوص المشروم:

1 علبة مشروم فريش مقطعة شرايح رفيعة ( ممكن تزودى أكتر لو بتحبى المشروم أنا عن نفسى باحط علبتين)
فصين توم مفرومين
علبة زبادى صغيرة
2 معلقة أكل نشا
2 معلقة زيت زيتون
4 شرايح سلمون
ملح، وفلفل
كوب ماء مدوب فيه مكعب ماجى أو الاحسن لو عندك شوربة.

شوحى المشروم فى زيت الزيتون على نار عالية لغاية لونه ما يبقى بنى فاتح بس مش تحطى عليه ملح لان ده بيخلى الميه اللى فيه تنزل. زودى التوم وخليه مدة دقيقتين مع التقليب المستمر زودى الفلفل الاسود والزبادى والنشا وقلبى كويس علسان ميعملش كتل ولما يدوب النشا كويس وتبدأ الزبادى تغلى زودى الشوربة ووطى النار خالص مع التقليب المستمر لغاية ما يبقى ماسك شوية وخليه على جنب. تبلى شرايح السلمون والملح والفلفل وشوحيهم فى طاسة تيفال لمدة 10 دقايق او لو عندك جريلر حطيهم عليه. بعد ما يستوى السلمون حطيه فى طبق بايركس وعليه الصوص.

الوصفة التانية زى الهنى بيبر سلمون اللى بيقدمه ابل بييز بالظبط انا كنت مطلعاها من على النت وطلعت حلوة.

4 شرائح سلموون الواحدة 8 اونس.
4/3 كوب عسل.
3/1 كوب صويا صوص
4/1 كوب سكر بنى
2 معلقة أكل عصير ليمون
4/1 كوب عصير اناناس
معلقة أكل خل ابيض
2 معلقة أكل زيت زيتون
معلقةصغيرة فلفل اسود مطحون
2/1 معلقة صغيرة بابريكا
4/1 معلقة صغيرة بودرة توم

حطى كل المحتويات مع بعض ما عدا السمك وارفعيها على نار هادية لمدة 15 دقيقة مع التقليب من وقت للتانى. تبلى السلمون بالملح والفلفل وادهنيه بزيت زيتون وحطيه على الجريلر، وقدمى الصوص جنبه.
يا رب تعجبكم، بس متفهمونيش غلط انا مش صديقة للمطبخ انا كل ما كان حد يدينى وصفة أسأل الاول بتاخد وقت قد ايه لو أكتر من نص ساعة بلاش.

يعنى كلكم قاعدين تبعتوا لبعض على الخاص وانا مفيش حد معبرنى، طيب ممكن حد يقولى اظبط التوقيع ازاى بدل ما هو جاى على جنب كده.

فعلا يا جولدي الخبر ده ...... بس كان في أول الصيف اللي فات
والطبيب اسمه معن الصانع وهو صاحب مستشفى سعد التخصصي في الخبر
واللي أعرفه إنه كان عليه إقبال شديد جدا وعموما ح سال بكرة من المستشفى مباشرة وأقول لكم النتيجة

وشكرا على الأكلات ......... واضح إنها يم يم

جولدى حبيبتى توقيعك ملفت اوى وربنا يخليلك ملك حبيبتك حاولى توسطنى الرابط فى مكان التوقيع يمكن يظبط بس انا نفسى افهم ازاى كتبت الاسم فى التوقيع

سمسوم خدت البنات لحسابك ايوا يعم ماشيه معاك بتكلم على الماسنجر